Vati Tekinologia ye ku Kuata ku Cifua ci mue ku Singaniekelamo?
Vantu kasi ve ku tualelelaho ku lilongesa viuma via vingi omo lia sikola, vipanga, ni viuma vieka. Kaha tekinologia i hasa ku kuasa. Ano matangua cinasiua cikuma ku tantekeya mizimbu ya yingi ambe nga muntu ka tundile ha ndzivo yeni, ni cipue vene ku katuka ha cituamo.
Vutuhu ngoco vantu vavengi ve ku pangesa cikuma tekinologia . . .
-
ve ku tanguka nga vali na ku tanda.
-
ka ve ku hasa ku tuala mana ku viuma vi ve ku linga.
-
ve ku futuka vuasi nga vali lika liavo.
VI MUA PANDE KU TANTEKEYA
KU TANDA
Vamo ve ku pangesa cikuma computador, telephone ni tablet ka va kele na lukakatela lua ku tanda muzimbu uose, ve ku tuntila lika haze hali muzimbu u va tonda.
Ku tanda lika ha muzimbu u tu tonda ce ku kuasa nga tu tonda lika cikumbululo. Vunoni, ku lingamo ka ci mi kuasa nga mu tonda ku ivuisisa mpundu cimpande caco.
VI MUA PANDE KU HILULA: Vuno mue ku hasa ku tanda umo muzimbu ua laha ni? Vati ku lingamo ci hasa ku mi kuasa ku lilongesa via vingi? —VISIMO 18:15.
KU TUALA MANA KU VIUMA
Vamo nguavo tekinologia ye ku va kuasa ku kala na vuhasi vua ku linga viuma via vingi ha ntsimbu imo lika. Ca ku muenako, va hasa ku lilongesa oku va simutuila na vavusamba mu mesage. Vunoni ka va hasa ku vi puisamo vuino, cikumakuma nga viose vivali vi tondeka ku vi tuala mana.
Ku tuala mana ku viuma ce ku tondeka ku lipokuesa na ku lisimpitika, vunoni nga tu lihakela kapandi ka ku lingamo tu ka lilongesa via vingi. Umo muana mpuevo ua lizina Grace ngueni: “Ku lingamo ce ku tepulula ku visevuka kaha na ku ku sakalala mutima. Nja limuena nguange ci li ku lutue ku linga nkala cuma ha ntsimbu yaco linga kati tu tanguke na vieka.”
VI MUA PANDE KU HILULA: Vuno tekinologia ni ku linga viuma via vingi ha ntsimbu imo lika vie ku mi kaluuisa ku vuluka vi mua lilongesa ni? —VISIMO 17:24.
VULIKA
Vamo ka va zangele ku kala lika liavo ngeci ve ku pangesa tekinologia linga i va zangulule ni va litundise vuli. Umo mpuevo ua lizina Olivia ngueni: “Nje ku futuka vuasi nga ka nji pangesa telefone, tablet ni ku tala TV.”
Vunoni ku kala lika lienu ya pua ntsimbu ya cili ya ku singanieka ni ku hilula vi mua lilongesa, evi via pua mutamba ua ku lilongesa viuma kaha kati via vakuendze lika vunoni na vakuluntu vene.
VI MUA PANDE KU HILULA: Vuno mue ku pangesa ntsimbu i mue ku kala lika lienu linga mu singanieke ha viuma ni ku hilula ni?—1 TIMOTEO 4:15.
VI MU HASA KU LINGA
PANGESENU TEKINOLOGIA NA MANA
Mu vinjila vika mu hasa ku pangesa tekinologia i mi kuase ku lilongesa via vingi? Vati tekinologia i hasa ku tanganesa vuhasi vua ku lisimpitika na ku tuala mana ku viuma vi mu lilongesa?
CITUME CA MU MBIMBILIYA: “Niunga mangana a cili na liano.”—VISIMO 3:21.
