“Mpueyange Sophia a mua tsile, tele tuli mu vulo miaka 39. Ua vavalele mu ntunda ya kama. Nja tambuile vukuasi vua kama ku vavusamba kaha nja kele na via vingi via ku linga. Vunoni mu muaka ua mutuntu nja vuile ngue va na nji tavula ha kati. Ntsimbu yose nja kele mu ciluua-luua, aha ngue ndzolela, aha ngue vusiua. Ambe mu ntsimbu ino vene, vutuhu mu na hiti miaka itatu tunde ha tsila mpueyange, vintsimbu vimo nje ku uila mu vusiua vua kama, vua ku linga naha ha vu na tundu vene hahi.”—Kostas.

Vuno mua tsisaho laza muntu u mua lema ni? Nga mukemuo, halumo nenu mue ku livua ngeci mua Kostas. Ka kuesi viuma vie ku tu vavala mua kama ku mutima, ku hiana ku tsiha mukua ndzivo yetu, kavusoko ni kavusamba ua ha mutima. Vakua ku lilongesa via vusiua navo va tava vusunga vuaco. Umo mukanda nguauo: “Tue ku zimbalesa viuma via vingi, vunoni ku tsisa cikeco ca hiana viose.” (The American Journal of Psychiatry) Ku vavala ku mutima ce kuivua muntu nga na tsisa, ca kama cikuma, vamo ce ku va lingisa ku lihula nguavo: ‘Tangua ku vavala caco ci ka hita vene? Tangua nji kevua naua ndzolela? Vati nji hasa ku uanako vuhuimino?’

Ino Vingilenu! ya kumbulula vihula viaco! Cimpande ci na hatako ci mi kuasa ku mona vi mu hasa ku lavelela nga mu na tsisa. Kaha vikuavo vi muesa vinjila via ku tepuluilamo vusiua vuenu.

Tua vundila ngecize vilongesa vi na hatako vi lembezieke na ku kuasa enu vose muli na ku pinda na vusiua vua ku tsisa.