Cihindu ca Cili
Mbimbiliya ka ya puile livulu lia handeka via cihindu. Vunoni ya hana vimamuna vi hasa ku tu kuasa ku kala na cihindu ca cili. Aci talenu vimo vitume via mu Mbimbiliya vi hasa ku mi kuasa.
NIUNGENU MUVILA UENU
CITUME CA MU MBIMBILIYA: “Muomu na umosi uahi na zindi ntsitu yeni ivene; vunoni a i lisa na ku i lela, ngue omo Kilistu naua ue ku linga na mbunga.”—Efeso 5:29.
VI CA LOMBOLOKA: Eci citume ca tu mamuna ku linga cose linga tu niunge cihindu cetu. Vakua ku lilongesa via cihindu nguavo cingi ca mavezi eku iza omo lia cifua ci ve ku yoyelamo vantu. Ngeci mukemuo, ku hangula vuino viuma ce ku neha cihindu ca cili.
VI MU HASA KU LINGA:
Via ku lia via Cili. Puenu na ku lia vize via kala na vitamina kaha na ku nua mema a engi.
Puenu na ku Hondolola Muvila. Ku hondolola muvila ci hasa ku mi kuasa ku kala na cihindu ca cili, ambe nga mu vakuluntu ni mu vanike, ni mua kala na vumo vuvezi. Vutuhu vavusoko, vavusamba na vandotolo va hasa ku mi kuasa ku hondolola muvila, vunoni yenu mpundu mua pande ku lingako mumo linga mu uane vukuasi.
Kosenu Ntsimbu ya ku Puamo. Vantu vavengi ve ku litondela via ku linga mu ntsimbu i va pande ku kosa. Kaha eci ciizilila ca ku hona ku kosa ntsimbu ya ku puamo, ce ku va kokela ku vavala. Ngeci mukemuo, nga mu pua na ku kosa ntsimbu ya ku puamo mu ka kala na cihindu ca cili.
LIKELENU VILINGA VIA KU VIHIA
CITUME CA MU MBIMBILIYA: “Tu lilelesienu ku mazilo ose a ku muvila na ano a ku cimbembesi.”—2 Kolintu 7:1.
VI CA LOMBOLOKA: Tu ka kala na cihindu ca cili nga ka tu vihisa muvila uetu na makania muomu eku koka mavezi na ku tsa.
VI MU HASA KU LINGA: Tumbikenu litangua li mu tonda ku likela ku sipa. Ntsimbu kanda li hete litangua liaco, lingenu cose mu mbile kuti makania, livueka, mapapelo a mue ku zengela makania ni vikuavo vi hasa ku mi tangula. Kati muendele ku vihela vi va lema ku sipila vavusamba venu kaha va lekenuko vutumbe vuenu.
VITUME VIKUAVO VIA MU MBIMBILIYA
Pingenu umo Mukaleho ua Yehova ua muimbo lienu linga mu kale na Mbimbiliya yenu
LINGENU VIUMA MU NJILA YA CILI.
“Omo u tunga ndzivo ya iha, kaha u ka tunga citungu helu liayo, linga kati u nehe maninga ha ndzivo yove, nga umosi a ka lahukaho.”—NDEUTELONOMI 22:8.
LINIUNGENU KU VUTENU.
“Uze a livandeka ku vutenu a li na mana a kama-kama; Vunoni uze a zangula ku matoto a halela vuheve.”—VISIMO 14:29.
KUATENU MUTIMA.
“Kati u kale ha kati ka . . . vakua ku tsa mu ku lia.”—VISIMO 23:20.
