Cihindu ca mu Visinganieka
Mbimbiliya ya tu mamuna ku viana vifua via ku liana kaha ya tu kaniamesa ku kala na vifua vi hasa ku tu kuasa.
VUTENU
CITUME CA MU MBIMBILIYA: “Uze a livandeka ku vutenu na hiana mukua ngolo.”—Visimo 16:32.
VI CA LOMBOLOKA: Mue ku iza via cili nga tu lihakela kapandi ka ku tula mutima. Vutuhu vintsimbu vimo tu vose tue ku tenuka, vunoni nga ka tua huimine mutima tu hasa ku koka viuma via vingi. Muomu nga muntu na niengua, ue ku linga ni ku handeka viuma via ka liveya ku lutue.
VI MU HASA KU LINGA: Lilongesenu ku kuata mbunge ntsimbu kanda mu vihise via vingi. Vamo ve ku singanieka nguavo vakua vutenu va pua vakua ndzili vunoni kuahi va pua va ku zeya. Mbimbiliya nguayo: “Uze ka hasa ku sika cimbembesi ceni Na fu ngue limbo lia ku sihuka kaha ka liesi na cimpaka.” (Visimo 25:28) Njila ya cili ya ku kuatelamo vutenu vuenu, ya pua ku tantekeya vuino vati vi nende viuma. Ngeci Mbimbiliya nguayo: “Liano lia muntu li mu vandekesa ku vutenu; Na vumpahu vueni vukevuo ku ecela ku civulumuna.” (Visimo 19:11) Ca pua ca cili ku halakana ni ku hula vuino vati vinende vimpande.
KU SANTSELA
CITUME CA MU MBIMBILIYA: ‘Santselenu.’—Kolose 3:15.
VI CA LOMBOLOKA: Vantu vakua ku santsela, vakevo lika ve ku kala na ndzolela. Vikevio vi va limuena vaze va tsisaho ni va zimbalesa vimo via seho ya kama mu muono. Ve ku handeka nguavo viuma via va kuasele ku pinda na visoti viaco via puile ku santsela ku viuma vi va li navio kati ku singanieka lika vize vi va na zimbalesa.
VI MU HASA KU LINGA: Tangua na tangua sonekenu ni singaniekenu ha viuma vi mu hasa ku santsela. Ka citondeka vi pue lika viuma via kama, mu hasa ku singanieka ha viuma ngeci mua kuca ca litangua, ku simutuila ca cili na kavusoko ni kavusamba ni halumo omo lia cihindu. Evi viuma vi hasa ku mi vuisa ndzolela nga mu uana ntsimbu ya vi hilula na ku vi santsela.
Mu hasa ku uana vukuasi vua kama nga mu muesa ku santsela omo lia ku kala na vusoko ni vavusamba. Cikuavo naua, nga mua lema vimo vifua via vakuenu, va lekenu vati mue ku livua kaha citava mu va sonekele kamukanda ni messagem mu telefone. Ku lingamo ci ka kaniamesa vusamba vuenu kaha mu kevua ndzolela muomu mu li na ku lingila vakuenu via cili.—Vilinga 20:35.
VITUME VIKUAVO VIA MU MBIMBILIYA
Mu hasa ku tupulula Mbimbiliya i va tanda laza. Ili mu jw.org mu malimi 40
KATI MU LIKANDULE VIMPATA.
“Ku-sangumuka ca luozi ci na fu ngue ku zikula ku mema: Ngoco vene likele ku zimpata, ntsimbu kanda ku kale luozi.”—VISIMO 17:14.
KATI MU LISOSOMUE NA VIA MENE.
“Ngoco vene kati mu umine mitima ku litangua lia mene: muomu litangua lia mene li komina mutima likelio livene. Kayando ka na lipuisila litangua liako.”—MATEO 6:34.
SINGANIEKENU VUINO NTSIMBU KANDA MU LINGE VIMO OMO LIA MATOTO.
“Liano li ka ku vingila; mana a ka ku niunga.”—VISIMO 2:11.
Halumo mu Hasa ku Lema Naua Evi
VINGILENU!
Nga mua Sakalala Mutima, Vika mu Hasa ku Linga?
Talenu vimo vitume via seho vi hasa ku mi kuasa ku tepulula ku ku sakalala mutima.
