CITUME CA MU MBIMBILIYA: “Visinganieka via mukua ku takama vi tuala ku vuingi; Vunoni uose a zangula a lihutuisa lika.”​—⁠Visimo 21:5.

VI CA LOMBOLOKA: Litumbikilenu vumo vutumbe kaha lihakelenu kapandi ka ku vu puisamo. Vulukenu ngecize, vintsimbu vimo ka citava ku landa viose vi mu tonda. Ngeci mukemuo, pangesenu vimbongo na mana, singaniekenu vuino ntsimbu kanda mu putuke ku vi sanduola.

VI MU HASA KU LINGA:

• Sonekenu viuma vi tondeka. Sonekenu mukana ua viuma kaha na ndando ya nkala cuma ci mu tonda ku landa, vi tepenu mu mitamba ngeci mua via-ku-lia, vuzalo na vikuavo via ha ndzivo. Ca ku muenako, nga kua soloka vimo via vuasi-vuasi ni vi mua tondele ku landa ka via puilemo, citava mu none ha kambongo ka mua patekeya.

• Tepululenu ku makongo. Nga citava vene kati mu levale. Vunoni pangesenu vuino vimbongo linga mu lande vi mu tonda. Nga mue ku panga, setekenu ku landa viuma na vimbongo vienu kati ku levala linga mu fuete ku ku-hua ca ngonde. Vunoni naua nga mua levala vimo, lingenu cose linga mu fuete makongo aco.

  Vamo vakua ku tondesesa mizimbu nguavo nga muntu a pangesa kartão multicaixa mu ku landa vimo, ue ku vihisa vimbongo via vingi ku hiana uze a pangesa mpundu vimbongo. Ngeci mukemuo, zangamenu nga mua kala na kartão multicaixa.

CITUME CA MU MBIMBILIYA: “Cilenda ka tava ku lima muomu masika; Ngoco vene a ka vundila vuana ha ntsimbu ya ku tia, kaha ka li ka kala navio.”​—Visimo 20:4.

 VI CA LOMBOLOKA: Vulenda vue ku neha vuhutu, ngeci mukemuo puenu mukua ku fuitangana, kaha patekeyenu vuino kambongo kenu linga mu ka likuase nako ku lutue.

VI MU HASA KU LINGA:

• Fuitanganenu. Nga mua pua mukua ku fuitangana kaha mue ku puisamo vi va mi tuma ku linga, mukuluntu ua vipanga a ka mi lema cikuma kaha a ka tonda mu tualeleho ku panga.

• Puenu vakua vusunga. Kati mu punde ha vipanga, muomu nga mu lingamo mu ka kala na lutsimo lua ku vihia kaha na umo uahi a ka tonda ku mi kovelesa vipanga.

• Kati mu kale na lizangamena. Nga ntsimbu yose mua tunta lika mu ku tonda vimbongo, mu hasa ku tundisaho ku vavala kaha ka mu ka yoya mu ciyulo na vusoko ni vavusamba. Vulukenu ngecize vimbongo ka via hianene seho mu muono.

KATI MU VIHISILE NTISMBU NA VIMBONGO VIENU KU VIUMA VIA NGOCO.

“Mukua ku penda no uze uantsahakulia va ka heta ku vuhutu; na ku-konkoka na tulo ci ka zika muntu na zintsantso.”​—VISIMO 23:21.

KATI MU LISOSOMUE CIKUMA NA VIMBONGO.

“Kati mu ume mitima omo muono uenu, nguenu vika mu ka lia cipue vika mu ka nua; cipue omo mivila yenu, nguenu vika mu ka zala.”​—MATEO 6:25.

KATI MU PUE VAKUA CIPULULU.

“Uze a li na liso lia lipi a zanguila vupite, kaha ka tantekeya ngecize ku vu zela ci ka mu uana.”​—VISIMO 28:22.