Hakenu Seho ku Vifua via Cili via Vakuenu
Citanga
Ku lihalesa ce ku koka kahangu. Mukua ku lihalesa ue ku limona ngue ua hiana seho vakuavo. Kaha ue ku limona vukama na ku popolola vantu vaze va liseza neni ku vimo viuma, kaha muntu uose ouo a hasa ku uila mu ngandzo yaco. Limo livulu li va sana nguavo Encyclopædia Britannica ngualio: “Cingi ca vantu va ku visemua via vingi ve ku singanieka nguavo yoyesi yavo, via kulia, zalesi, vi va tsiliela, vi va singimika, na viuma vikuavo via hiana via vakua visemua vieka.” Vati tu hasa ku viana visinganieka viaco via ku henga?
Vi ya Handeka Mbimbiliya
“Vunoni mu ku konkama umo a yongole mukuavo mukua ku hiana ivene.”—FILIPU 2:3.
Vika ca lomboloka? Linga tu viane ku lihalesa tua pande ku pua vakua ku likehesa. Muomu nga tu pua va ku likehesa tu ka nongonona ngecize vakuetu va tu hiana mu vimo. Ka kua kele na umo muyati uahi ua kala na vifua via cili lika.
Talenu lungano lua vaStefan. Va zindile vakua vifuti vieka vunoni va hasele ku vula kahangu.
Nguavo: “Nja nongonona nguange ku mona vakuetu ngecize va tu hiana, ca pua ca seho linga tu hase ku vula kahangu. Ka nji tantekeya viose kaha nji hasa ku lilongesa vimo ku vakuetu.”Vi mu Hasa ku Linga
Lihakelenu kapandi ka ku pua vakua vusunga, na ku litavela ngecize nenu mue ku sevuka. Kaha tavenu nguenu vakuenu va hasa ku linga vuino vimo viuma ku mi hiana. Cikuavo naua, ka mua pandele ku singanieka nguenu vantu va ku muyati umo vose va fua mumo lika.
Mu cihela ca ku singaniekela via ku vihia muntu ua ku muyati umo, lihulenu nguenu:
Tavenu nguenu vakuenu va hasa ku linga vuino vimo viuma ku mi hiana
-
‘Vuno vifua vi nja zinda mu muntu uaco, via pua vene via ku vihia ni via liseza lika na viange?’
-
‘Vuno muntu uaco a hasa ku mona visevuka viange ni?’
-
‘Mu viuma vika muntu uaco ua nji hiana’?
Nga mu pua vakua vusunga mu ku kumbulula evi vihula, ka mu ka vulu lika kahangu vunoni mu ka tantekeya naua vifua vikuavo muli ikeye vi ka mi komouesa cikuma.