Nga tu tuala cikuma mana ha ku liseza ca kala hali yetu na vakuetu, tu hasa ku singanieka nguetu ku liseza caco ca pua vipenga via kama. Evi vi hasa ku tu lingisa ku muesa kahangu ku vakuetu. Nga tu mona vakuetu mu cifua ca ku vihia, ci ka tu kaluuila ku muesa nkeke kaha nga nkeke yahi tu ka pua vakua kahangu.

“Zolelenu na ava va zolela; lilenu na ava va lila.”—LOMA 12:15.

Vika ca lomboloka? Ou mukanda u tu longesa ngecize tua pande ku kala na nkeke. Ku muesa nkeke ca pua ku lihaka mu cihela ca mukuetu na kuivua vati ali na ku livua.

Nga tu lihaka mu cihela ca vakuetu, tu ka nongonona via vingi via litombola netu. Tu ka mona ngecize cifua ci ve ku livuilamo ni ci ve ku lingilamo viuma, mukemuo vene mu tue ku linga netu. Cikuavo naua, ku muesa nkeke ci ka tu kuasa ku mona vakuetu ngecize tu vose tu vantu vamo lika, vutuhu tua tunda ku vihela via ku liseza-seza. Ngeci mukemuo, nga tu tuala mana ku viuma vi tua litombola na vakuetu, cifua ci tue ku va muenamo ci ka aluluka.

Ku lihaka mu cihela ca vakuetu ci hasa naua ku tu lingisa tu va singimike. VaAnne-Marie va ku Senegal, va kele na ku popolola umo muyati u va tumbuile vantu nguavo va pua va ku salela. Vunoni ku muesa nkeke ni nguetu ku lihaka mu cihela ca vakuavo ca va kuasele. Nguavo: “Mu nja muene lamba i va kele na ku mona, nja lihuile nguange, nga yange nje ku yandele ngue vakevo vati nji ne ku livuile? Nja nongonuene nguange ka nja va hianene. Nange vene viahi nja kala navio vi hasa ku nji puisa ua seho ku hiana vakevo.” Mua vusunga, nga tu ivuisisa visoti via vakuetu, ci ka tu puila ca casi ku va muesa nkeke ku hiana ku va paya.

Lihakelenu kapandi ka ku hona ku tuala mana ku vipenga via vantu vunoni ku seteka ku ivuisisa ku litombola ca kala ha kati kenu navo. Ca ku muenako, aci singaniekenu vati ve ku livua nga:

• va lia hamo na vusoko vuavo

• va na fuitangana litangua liose

• va sikama na vavusamba

• va halakana ku miaso i va lema cikuma

Kaha mu nima yaco, lihakenu mu cihela cavo. Lihulenu nguenu:

• ‘Vati nji livua nga muntu a nji popolola?’

• ‘Vati nji livua nga vantu va nji hisa ca ku hona ku nji tantekeya vuino?’

• ‘Nga nja puile mukua muyati uaco, vati nje ku tondele vakuetu va nji muenemo?’