Makulukazi a vantu va pangesaho laza vitume vi tu na mono mu vilongesa vi na hiti, kaha va na uana vukuasi vua kama mu ku litundisa kahangu mu mitima yavo. Vunoni ku handeka vusunga, ka tu hasa ku manusula kahangu etu vavene. Vuno kahangu tangua ka kahua mu vutuntu ni?

Nguvulu ya vantu ya honoua ku manusula kahangu. Vuno eci ca lomboloka ngecize na imo nguvulu naua yahi i hasa ku manusula kahangu ni?

Linga nguvulu i hase ku manusula kahangu ya tondeka:

1. 1. Ku kuasa vantu va alulule cifua ci ve ku singanieka na ku muenamo vakuavo.

2. 2. Ku manusula vitamba vie ku lingisa vantu va muese kahangu, kaha ve ku singanieka nguavo vali na vusunga vua ku muesa kahangu muomu navo ve ku va muesako.

3. 3. Ku kala na vantuamena va ku hona kahangu.

4. 4. Ku pandakana vantu va ku miyati yose.

Vunoni Mbimbiliya ya tu hana vusunga ngecize, Njambi ua tumbika nguvulu i hasa ku puisamo evi viose. Nguvulu yaco ya pua “vuangana vua Njambi.”—Luka 4:43.

Talenu vi i ka linga nguvulu yaco.

“Vandambo va ha mavu va [ka] lilongesa vuviuke.”—ISAYA 26:9.

“Cipanga ca vuviuke ci ka pua ciyulo; Na ku-pangesa ca vuviuke, ku-holoka na ku-tsiliela ku miaka yose.”—ISAYA 32:17.

Vika ca lomboloka? Vuangana vua Njambi vu ka longesa vantu via cili. Nga vantu va lilongesa ku tepesa via cili ku via vipi, vuviuke ku vuhenge va ka alulula cifua ci ve ku singaniekelamo ku tuala ha vakuavo. Vantu vose va ka nongonona ngecize ca pua ca cili ku lema vantu va vifua viose.

Njambi “a ka hunda masozi ose ku meso avo; na ku-tsa ka ci ka kala naua; cipue ku-linienga na vusiua ka ci ka kala naua, cipue ku lila, cipue ku vavala: viuma via ku livanga vi na hiti.”—KU-SOLOLA 21:4.

Vika ca lomboloka? Vuangana vua Njambi vu ka manusula lamba i vue ku koka vuhenge. Vose va ve ku muesa kahangu ka va kevu naua ku vavala ni ku vuila nkulundundu vaze ve ku va muesa kahangu.

“Ka li ka sompa mu ku kava via ku mona na meso, Cipue ka li ka teta lizi mu ku kava via ku ivua na matuitui eni; Vunoni a ka sompela vahutu na vuviuke, Na vakua ku konkama ha mavu a ka va sompela na vusunga; Kaha a ka veta mavu na mulamu ua kanua keni; Na muku ua milungu yeni a ka tsiha vakua vupi.”—ISAYA 11:3, 4.

Vika ca lomboloka? Yesu Kilistu Muangana ua Vuangana vua Njambi vua muilu, a ka sika vantu ca ku hona kahangu. Kaha naua Yesu ka lemene lika umo muyati ukuavo kuahi houe, cikuavo naua masiko eni a ka panga mu mavu ose.

Vuangana vua Njambi vue ku longesa vantu va pue ‘vakua mutima umo lika, cilemo cimo lika, vakua ku litavasiana kumo kaha na mutima umo lika.’—FILIPU 2:2.

Vika ca lomboloka? Vantu va vu ka sika Vuangana vua Njambi, ka va ka muesa lika ku likuata kumo ca helu-helu. Vunoni va ka pua mpundu “vakua mutima umo lika” muomu va ka lilema umo na mukuavo mu vusunga.