Likuatenu Vusamba na Vantu va ku Liseza-seza
Citanga
Nga tu sondoloka vantu va ku muyati ka tua zangele, kahangu ketu ka ka livuezelela. Kaha nga tu likuata lika vusamba na vantu va cifua cetu, tu ka singanieka nguetu cifua ci tue ku singaniekelamo na cifua ci tue ku lingilamo viuma cikeco lika ca pua ca cili.
Vi ya Handeka Mbimbiliya
“Likamesienu nenu naua.”—2 KOLINTU 6:13.
Vika ca lomboloka? Lizi ku “likamesa” li va tumbula hano, lia lomboloka ku hamesa mutima uetu ni nguetu cifua ci tue ku livuilamo. Nga tu lema lika vantu va cifua cetu, ci ka tu kaluuila ku likuata vusamba na vantu veka. Ngeci mukemuo, linga tu vule citanga caco tua pande ku likuata vusamba na vantu va ku visemua vieka.
Mua ku Likuatela Vusamba na Vantu va ku Liseza-seza
Nga tu lihakela ka ku tantekeya vuino vakuetu, tu kevuisisa omo lia vika ve ku lingila viuma mu cifua ca liseza na cetu. Kaha ku va muesa cilemo ci ka tu lingisa ku suva nguetu va liseza netu, tu ka va haka seho na ku lihaka mu cihela cavo.
Talenu lungano lua vaNazaré. Va kele na ku muesa kahangu ku vakua ku tunda ku vifuti vieka. Vika via va kuasele ku vula kahangu? Nguavo: “Nja putukile ku sikama kaha na ku panga navo. Nja nongonuene ngecize vi va kele na ku handeka vantu ku tuala hali vakevo via puile makuli. Ngeci mukemuo, nga tu likuata vusamba na vantu va ku visemua vieka, ka tu ka va paya na ku singanieka nguetu vose va fua mumo lika, vunoni tu ka va muesa cilemo na ku va haka seho.”
Vi mu Hasa ku Linga
Uanenu vukovelelo vua ku simutuila na vantu va ku cifuti, cisemua ni muyati ueka. Mu hasa:
-
Ku va hula va mi leke muzimbu uavo.
-
Ku va lania va lie hamo nenu.
-
Ku halakana vuino ku viuma vi va mi leka na vika via pua via seho kuli vakevo.
Nga tu ivuisisa vika via va lingisa ku fua mu va fua, tu ka putuka ku va mona mu cifua ca cili kaha kati vakevo lika vunoni na vantu veka vakua cisemua cavo.
