Vantu ka ve ku muesa lika kahangu ku vakua vifuti, muyati ni cisemua ceka houe, vunoni ve ku muesa naua kuli vakua vulombelo vueka, vahutu ni vampite. Vamo co ve ku hisa vakuavo omo lia citso cavo, nga va lilongesa ni kuahi, vumo vulema ha muvila ni cifua cavo. Vutuhu ngoco, kasi ve ku mona nguavo ka ve ku muesa kahangu.

Vuno nenu kahangu ka hasa ku mi kuata ni? Ca pua ca casi ku mona nguetu vakuetu va kala na kahangu. Vunoni ci hasa ku tu kaluuila ku mona ngecize netu tua kala na kahangu. Ku handeka vusunga, tu vose tua kala na kamo kahangu. Mulongisi David Williams ngueni: “Nga vantu ve ku singanieka viuma via ku vihia ku tuala ha umo muyati, mu ve ku uana umo ua ku muyati uaco ve ku va muesa kahangu ca ku hona ku nongonona nguavo va na lingimo.”

Ca ku muenako, ku cimo cifuti ca ku Europa ku va kala vaJovica, kua kala umo muyati ua vantu va vandende lika. Kaha vaJovica va handekele nguavo: “Nja singaniekele nguange na umo uahi ua ku muyati uaco ua pua muntu ua cili, vunoni ka nja nongonuene nguange nja puile mukua kahangu. Muomu mu kati kange nja singaniekele nguange vusunga vene.”

Vanguvulu vavengi ve ku tumbika masiko a vindika kahangu. Vutuhu ngoco kahangu kasi ka li na ku tualelelaho. Omo lia vika? Muomu masiko aco emana lika ha vilinga via vantu. Kaha kahangu ke ku putukila mu mutima na mu visinganieka via muntu, vunoni vanguvulu ka va kele na ngolo ya ku mona visinganieka ni vati vantu ve ku livua. Vuno tangua kahangu ka kahua vene ni?