Vuno kaye na muono va vi tangele kuli Njambi ni via lizilile vivene? Mezi a va handekele vafiziku ali ku vuputukilo vua cino cilongesa na vi ya muesa Mbimbiliya, via muesa vikumbululo via ku liseza cikuma. Vikumbululo viose evi vivali, vantu va vi tsiliela na mutima uose. Vunoni, vamo ka ve ku tondesesa vuino vi va tsiliela. Vavengi ve ku lihoya ku tuala ha cimpande caco ku hitila mu mavulu na viprograma via ha TV.

Valongisi ku sikola ve ku handeka nguavo, na umo Sakatanga uahi ua tangele kaye na muono, vunoni via lizilile vivene. Vuno valongisi vaco ve ku solola vusunga vua muesa ngecize Sakatanga ka keleko ni? Mua vusunga, muevaho laza vakuluntu va malombelo va longesa nguavo kua kala umo Sakatanga. Vuno ve ku mi muesa vusunga vuaco ni? Ni ve ku mi leka nguavo mua pande ku tsiliela muli Njambi ambe nga ka va mi hele vumo vusunga?

Halumo mua singaniekaho laza ha cihula caco na ku livua nguenu na umo uahi a tantekeya mpundu nga kua kala Sakatanga. Cikuavo naua, halumo mue ku lihula nguenu: Vuno ca kala na seho ku tantekeya cikumbululo caco ni?

Ino Vingilenu! ya muesa vumo vusunga vua lingisa vantu vavengi ku tsiliela muli Sakatanga. Ya muesa naua omo lia vika ca kala na seho ku tantekeya kuiko ua tunda muono.