Seho ya Kala ha ku Tantekeya nga kua Kala Sakatanga
Omo lia vika ca pua ca seho ku tantekeya nga kua kala Sakatanga? Nga kuli vusunga vua mi tavesa ngecize kua kala Njambi mukua ngolo yose, halumo mu ka hilula vusunga vua muesa ngecize Njambi ikeye ua huimina Mbimbiliya. Kaha nga mua tsiliela vi ya handeka Mbimbiliya, mu ka uana vukuasi vua kama vu na hatako.
Ku likuua muono ua ndzolela
MBIMBILIYA NGUAYO: “[Njambi] ua lingile ngozi, kaha ua mi hele mema a ku fuma muilu na miaka ya vimbuto, na sulisa mitima yenu na via ku lia na ndzolela.”—Vilinga 14:17.
VI CA LOMBOLOKA: Viose vi tua kala navio ha mavu, via pua vuana vua ku tunda kuli Sakatanga. Mu ka haka cikuma seho ku vuana vuaco na ku muesa ku santsela, omo mu ka nongonona seho ya mi haka Njambi.
Vimamuna via cili vi hasa ku mi kuasa mu muono
MBIMBILIYA NGUAYO: “Amba vuose u ka tantekeya vuviuke na vuoloke, na ku-sungama, cili, njila yose ya viuka.”—Visimo 2:9.
VI CA LOMBOLOKA: Mu ku pua Sakatanga, Njambi a tantekeya vi mua tondeka linga mu yoye mu ndzolela. Kaha nga mu tanda Mbimbiliya, mu ka lilongesa viuma via vingi vi ka mi kuasa mu muono uenu.
Vikumbululo via vihula vienu
MBIMBILIYA NGUAYO: “U ka uana mana a ku tantekeya Njambi.”—Visimo 2:5, NWT.
VI CA LOMBOLOKA: Ku tantekeya ngecize kua kala Sakatanga, ci ka mi kuasa ku tantekeya vikumbululo via vihula via seho, ngeci mua: Vika va tu tangelele? Omo lia vika tue ku yanda? Vika vie ku soloka ku muntu nga a tsa? Mu hasa ku uana vikumbululo via cili mu Mbimbiliya.
Ku lavelela ngecize viuma tangua vi ka sungama
MBIMBILIYA NGUAYO: “Muomu ange nji tantekeya visinganieka vize vi nji ku singanieka kuli enu, ngueni Yehova, visinganieka via ciyulo, kati via vipi, mu ku mi hia lulavelelo ku ntsimbu yenu ya ku sulumuina.”—Yelemiya 29:11.
VI CA LOMBOLOKA: Njambi ua kulahesa ngueni, tangua a ka manusulako vupi, lamba, na kutsa. Nga mu tsiliela mu vikulaheso via Njambi, ci ka mi kuasa ku vula visoti via tangua na tangua na ku simpa.
