Va Seth * nguavo, “Nange na mpueyange va tu tundisile ha vipanga ha ntsimbu imo, tua kele miaka ivali ku yoyela ha vipanga via litangua lia ngongo. Ngeci mpueyange Priscilla uomine cikuma mutima kaha ua vavalele litima, kaha nja livuile vungoco.

“Vati tua lingile? Mpueyange Priscilla ntsimbu yose ua kele na ku vuluka mezi a Yesu a ku Mateo 6:34. Mezi a Yesu a kele na ku nji simpisa ngecize, ka tua pandele ku uma mutima via litangua lia mene, muomu nkala litangua lia kala na visoti vialio. Kaha vivundilo vieni via ku tunda ku mutima via mu hele ndzili ya ku tualelelaho. Vunoni kuli ange, mukanda ua Visamo 55:22 ua nji kaniamesele. Nja lingile ngue mukua visamo, nja mbilile citeli cange kuli Yehova, kaha nja muene vukuasi vueni. Vutuhu ntsimbu ino nja uana vipanga, tue ku yoya muono ua-uasi linga tu niunge cimamuna ca Yesu ca ku Mateo 6:20-22. Kaha tue ku livua ku suena mu hiehi na Njambi na umo na mukuavo.”

Va Jonathan nguavo, “Nja vuile liova lia kama cikuma omo mingoso yetu ya uile. Omo lia ku lua na visoti via ku hona vimbongo via ku puamo, ku lihakela kapandi ka ku panga miaka 20 ca puile ngue viuma via ngoco. Nange na mpueyange tua putukile ku lihoyela vimbongo. Kaha tua vuile vuoma vua ku landa viuma na multicaixa muomu tua singaniekele nguetu ku empreza va ka viana nguavo vimbongo vilimo ka vi ka uania.

Vunoni Lizi lia Njambi na sipilitu yeni via tu kuasele ku hangula mua cili viuma. Nja lilongesele ku tava kacipanga kose oko, kaha tua vianene ku landa viuma vize ka tu tondo mpundu. Mu ku pua Vakaleho va Yehova, tua uanene vukuasi ku vamuanetu mu lutsilielo. Va kaniamesele kapandi ketu ka ku livua mua cili na ku tu kuasa mu ntsimbu ya ikalu.”

Va Raquel nguavo, “Omo yaliange ua nji sile, ca ku hona ku nji sika, nja vuile vusiua vua kama. Vunoni nja suenene mu hiehi na Njambi kaha ua nji lembeziekele. Ciyulo ca Njambi ca niungile mutima uange mu nja kele na ku vundila tangua na tangua. Nja muene nguange ua kele na ku kanguisa mutima uange ua kele na ku vavala.”

“Ku vukuasi vua Lizi lieni, Mbimbiliya, nji hasa ku vula matoto na nkulundundu. Nja kele na ku vuluka mezi a kapostolo Paulu ku Loma 12:21 ngueni: ‘Eci ca cipi kati ci ku vule, vunoni eci ca cipi ci vule neci ca viuka.’”

“Nja kele na umo kavusamba ua cili ua nji kaniamesele. Ua nji lekesele mukanda ua Ekelesiaste 3:6 kaha ua nji lekele na ngozi ngueni kua kala ntsimbu ‘ya ku zimbalesa.’ Vutuhu ca nji vavalele ha mutima, vunoni cimamuna ceni ca nji kuasele. Vuovuno nja kala na vutumbe vueka mu muono.”

Va Elizabeth nguavo, “Nga mu vulo mu kovela vitanga kue ku tondeka vukuasi, kaha nja kele na umo kavusamba ua nji kaniamesele tangua na tangua. Ua lilile hamo nange, ua nji kaniamesele, na ku nji lingisa ku livua ngecize va nji lema ka va nji vianene. Nji li na vusunga nguange Yehova ua mu pangesele a nji sake mu vi singanieka.”

Va Luis va tua tumbula ku cimpande ca ku vuputukilo, va vavala mutima, kaha ve ku tsile luvali. Matangua ano va tondeka ku va haka ku mpundzi ya ku huima mu viola 16 nkala litangua. Va handekele nguavo, “Nje ku vundila kuli Yehova ntsimbu yose, kaha mu nima ya ku vundila sipilitu yeni ye ku nji hana ndzili. Civundilo ce ku nji hana ku simpa linga nji tualeleleho muomu nja tsiliela nguange Njambi ue ku nji niunga.”

Va Petra va li na miaka ya tuvakana 80 nguavo, “Nja lema ku linga viuma via vingi vunoni ka nji hasa naua, ce ku nji vavala ku mona ndzili yange i ya na ku tepuluka. Nje ku ivua ku hona cikuma kaha nje ku nua vihemba ntsimbu yose. Ntsimbu imo nje ku ivua ngue muze  Yesu ua lombele Ise ngueni kati a tavese vimo visoti vie ku hitile nga ca tavele. Vunoni Yehova ua kaniamesele Yesu, kaha nange ue ku nji kaniamesa. Nje ku vundila tangua na tangua. Kaha nje ku livua mua cili mu nima ya ku handeka na Njambi.”​—Mateo 26:39.

Va Julian va vavala vuvezi vua Esclerose múltipla  * (multiple sclerosis) va lingila ku puisa miaka 30 na vuvezi vuaco, ve ku handeka nguavo: “Vuno nja seza citumamo cange ca cili ca mu seketa, kaha nje ku endela mu citumamo ca ku sindumuna. Vunoni nja yoya muono ua cili muomu nje ku u pangesa mu ku pangela vakuetu. Ku muesa vuhuanga ci hasa ku tepulula ku tuyando, kaha Yehova ue ku puisamo cikulaheso ceni ca ku tu kaniamesa ha ntsimbu i tondeka. Ngeci mua kapostolo Paulu, nange nji hasa ku handeka nguange: ‘Nji ku hasa viose muli uze ue ku nji kolesa.’”​—Filipu 4:13.

Va Antonio nguavo, “Omo va tata va tsile ku mponde ya likalu, ka nja tavele nguange vusunga, ca puile vuhenge vua kama cikuma, muomu vakevo va kele na ku enda ha mikono. Vunoni viahi vi nja hasele ku linga. Va vavalele cikuma matangua atanu kaha va tsile. Vutuhu nja simpile kavundende mu nja kele hamo na va nana, vunoni nja zeyele cikuma mu nja kele lika liange. Kaha nja kele na ku lihula nguange, ‘Vika va na tsila va tata? Vika va na tsila va tata?’

“Ha matangua aco aze a ku kaluua nja kele na ku vundila Yehova ntsimbu yose a nji kuase nji kolese na ku nji hana ciyulo. Kaha nja vuile ciyulo kavundende-kavundende. Nja vulukile vi ya handeka Mbimbiliya ku tuala ha viuma ‘vie ku lisolokela ngoco’ vi hasa ku soloka ku nkala muntu. Mu ku linga Njambi ke ku handeka makuli, nji li na vusunga nguange vuovuno nji ka mona va tata mu va ka sanguka.”—Ekelesiaste 9:11; Yoano 11:25; Tito 1:2.

Va Robert va tua tumbula ku cimpande ca katete, navo va kele na visinganieka viaco. Nguavo: “Ange na mpueyange tua vuile ciyulo ci va soneka ku Filipu 4:6, 7. Tua vuile ciyulo caco mu tua kele na ku vundila kuli Yehova. Eci ciyulo ca mu ntima ca nji kuasele ku ambuluila vakua mizimbu via lutsilielo luetu lua cisangukilo. Vutuhu munetu ua tsile ku mponde ya ndeke, kasi tue ku vuluka viuma via cili vi tua kele na ku lingila hamo neni. Tue ku seteka ku tuala mana ha vivuluiso viaco.

“Omo vakuetu Vakaleho va tu muene ha televizau oku tu lombolola vi tua tsiliela na ku simpa cose, tua va leka nguetu halumo eyi ya puile njila imo ya ku muesa ku santsela omo lia vivundilo vi va kele na ku tu lingilavio etu. Ange nji tava nguange Yehova ikeye ua kele na ku tu kuasa ku hitila mizimbu yavo ya ku lembezieka.”

Aa malungano, a lekesa ngecize Njambi a hasa ku lembezieka vantu va li na ku hita mu visoti na vitanga via ku liseza-seza. Amba enu co? Mu hasa ku uana ku lembezieka na vukuasi, vutuhu mu li na ku lihita mu visoti via vikalu mu muono ambe mu ntsimbu ya ikalu *. Ngeci mukemuo lombenu vukuasi kuli Yehova. Muomu “ikeye Njambi ua ku-lembezieka cose.”​—2 Kolintu 1:3.