Kapostolo Paulu ua tumbuile Yehova * ngueni “ikeye Njambi ua ku-lembezieka cose. Ikeye a tu lembezieka ku lamba yetu yose.” (2 Kolintu 1:3, 4) Mbimbiliya ye ku muesa ngecize, nkala muntu a hasa ku tambula vukuasi vua Njambi kaha ka kuesi tuyando tua kama tu hasa ku tangula Tatetu ua muilu ku tu lembezieka.

Tua pande ku linga mumo nga tu tonda Njambi a tu lembezieke. Vati ndotolo a hasa ku tu kuasa nga ka tu i ku sipitali? Ngeci mukemuo Mbimbiliya ya tu lania nguayo: “Suenenu kuli Njambi, kaha ikeye a ka suena kuli enu.”​—Tiango 4:8.

Vati tu hasa ku kala na vusunga nguetu Njambi a hasa ku suena mu hiehi netu? Tu hasa ku kala na vusunga vuaco muomu, ca ku livanga, ntsimbu yose ue ku tu leka a tonda ku tu kuasa. (Talenu cikasa ci na  hatako.) Vusunga vua mu civali, vua pua muomu kua kala vukaleho vua vantu va ku laza na va ntsimbu ino, va lembeziekele Njambi.

Ngeci mua vantu vavengi ve ku tonda vukuasi vua Njambi, Muangana Ndaviti neni ua hitile mu tuyando tua ku liseza-seza. Ntsimbu imo ua lombele Yehova ngueni, “Halakana lizi lia vivundilo viange omo nji ku tambeka,” Vuno Njambi ua kumbuluile ni? Eyo. Muomu Ndaviti ua vuezeleko ngueni: “Va na nji kuasa: Ngoco vene mutima uange u viukilila cikuma.”​—Visamo 28:2,  7.

Njambi ua hana Yesu kapandi ka ku lembezieka. Ha kati ka vipanga via hana Njambi kuli Yesu vimo via pua, “ku kuta [ku kaniamesa] vakua ku vatuka mutima” na “ku lembezieka vose va linienga na vusiua.” (Isaya 61:1, 2) Kaha mua vusunga, mezi aco a lipuisilemo omo Yesu uezile hano ha mavu ua hakele seho ya kama ku vantu va kele na ku “fuitangana na ku lemuua.”​—Mateo 11:28-30.

Yesu ua lembeziekele vantu mu ku va hana vimamuna vieni via cili, ua va longesele na ngozi, halumo co, mu vintsimbu vimo, na ku va kanguisa. Tangua limo, umo yala ua kele na vuvezi vua mbumba ua lambelelele Yesu ngueni: “Nga ua zange u hasa ku nji lelesa.” Omo ua mu muene, Yesu ua mu vuililileko cikeketima, kaha ngueni: “Nji na zange: lela vene.” (Mako 1:40, 41) Kaha ua kangukile.

Vutuhu Yesu uahiho hano ha mavu linga a tu lembezieke muntu ku muntu. Vunoni Ise, Yehova, “ikeye Njambi ua ku-lembezieka cose”, a li na ku tualelelaho ku lembezieka vaze va li mu visoti. (2 Kolintu 1:3) Tu ci hilulenu ha viuma viuana vie ku pangesa Njambi mu ku lembezieka vantu.

• Mbimbiliya. “Muomu viose vi va sonekele laza, va vi sonekelele ku tu longesa, linga ku lukakatela na ku ku-lembezieka, via ku visoneka tu kale na ku lavelela.”​—Loma 15:4.

• Sipilitu ya Njambi. Mu nima ya ku-tsa ca Yesu, cikungulukilo cose ca Vakua Kilistu ca kele mu ciyulo. Omo lia vika? Muomu ca kele na “ku enda mu vuoma vua Muangana [Yehova] na mu ku-lembezieka ca sipilitu santu.” (Vilinga 9:31) Sipilitu santu, ni nguetu ndzili ya Njambi, ya kala na ngolo ya kama. Njambi a hasa ku i pangesa mu ku lembezieka muntu uose a li mu nkala cisoti.

• Civundilo. Mbimbiliya nguayo: “Na vimo viahi mu umina mitima; vunoni mu viose mu ku vundila na ku lambelela hamo na ku santsela, tumbulenu vizango vienu kuli Njambi. Kaha ciyulo ca Njambi cize ca hiana mana ose, ci ka niunga mitima yenu na visinganieka vienu muli Kilistu Yesu.”​—Filipu 4:6, 7.

• Vamuanetu Vakua Kilistu va hasa ku tu lembezieka mu ntsimbu ya ikalu, ngeci tu hasa ku va tsiliela. Kapostolo Paulu ua tumbuile vavusamba veni ngueni “vakevo va na nji lembezieka” mu ntsimbu ya “lamba yetu na tuyando.”​—Kolose 4:11; 1 Tesalonika 3:7.

Vuno halumo mue ku lihula nga citava mpundu ku vi puisamo. Tu ci talenu ha vimo vimona via vamo va luile na visoti vi tu na tumbula ku vuputukilo. Ngeci muavo, nenu mu ka zivuka ngecize Njambi kasi a li na ku puisamo eci cikulaheso “Ngue umo uze naye a mu lembezieka, Mu nji ka mi lembezieka enu.”​—Isaya 66:13.