1, 2. Omo lia vika Vakaleho va Yehova va kala na vitume ku tuala ha zalesi yavo? (Talenu cikupulo ca ku vuputukilo.)

UMO mukanda ua mizimbu, ku Holanda, ua handekele via zalesi ya vamo vakuluntu va malombelo ku viuano viavo. Ua handekele nguauo: “Vose va zalele ngoco, cikumakuma ku mutana omo lia ntuima.” Vunoni ou mukanda uaco, ua handekele naua via cifua ca ku zala ca Vakaleho va Yehova ku ciuano. Ua handekele nguao vanike va vamala na vakuluntu vali mu tuzaku kaha vana va vampuevo va na zala visaya via laha via ku puamo. Vakaleho va Yehova ve ku va sangala ntsimbu yose, omo lia zalesi yavo. Kapostolo Paulu ua handekele ngueni Vakua Kilistu va pande ku zala “vuzalo vua va pande,” vuze vua fuila vangamba va Njambi. (1 Timoteo 2:9, 10) Vutuhu Paulu ua handekele via vampuevo, na vamala Vakua Kilistu navo va pande ku niunga cimamuna caco.

² Mu ku pua vangamba va Yehova tua pande ku kala na zalesi ya cili, muomu Njambi u tue ku lemesa neni ua ci  haka seho. (Njenisisi 3:21) Mbimbiliya ya muesa ngecize Yehova, Sukulu ua melu na mavu, ua haka vitume via vati va na pande ku zala vantu veni. Ngeci mukemuo ka tua pandele lika ku zala vuzalo muomu tua vulema houe, vunoni vuzalo vuaco vua pande naua ku ya Sukulu Yehova, Muangana uetu, ku mutima.

3. Vika tu hasa ku lilongesa ha masiko a hele Njambi vaIsaleli ku tuala ha ku zala?

³ Mu Masiko a Mosesa, mua kele amo masiko ohielele vaIsaleli mu ku yoya ngue vakua vifuti va lihatele navo, muomu va kele na vilinga via ku pihia. Masiko a muesele ngecize Yehova ua zindile zalesi ya lingisile vamala ku moneka ngue vampuevo na vampuevo ngue ku vamala. Matangua ano, kasi zalesi yaco ku ya kala, ya pua zalesi ka ye ku tepesa vamala ku vampuevo. (Tandenu Ndeutelonomi 22:5.) Kuliya na masiko, tu hasa ku limuena ngecize Yehova ua zinda ku zala ce ku lingisa vamala ku moneka ngue vampuevo, na vampuevo ku moneka ngue vamala, ni ku zala ci hasa ku lingisa vantu ku hona ku tepesa yala na mpuevo.

4. Viuma vika vi hasa ku kuasa Vakua Kilistu ku zala vuino?

⁴ Vitume via Mbimbiliya vi hasa ku tu kuasa ku hangula vuzalo vuetu. Kaha vitume viayo citava ku vi kava cipue nga tua tunga ku cihela ca ntuima cikuma ni kua ku tontola, kasi vie ku panga naua ku nkala cisemua. Ka citondeka tu kale na mukana ua vuzalo vu tua pande ku zala ni kuahi. Tua pande lika ku kava vitume via mu Mbimbiliya, muomu vi ka tu tavesa ku zala vuzalo vu tua lema. Tu ci talenu vimo vitume via mu Mbimbiliya vi hasa ku tu kuasa ku hangula vuzalo vua litombola na “cizango ca Njambi, cikeco ca cili, ca mu leme, ca ku tantuluka.”—Loma 12:1, 2.

5, 6. Vati ku zala cetu ci hasa ku kuata vakuetu?

⁵ Kapostolo Paulu va mu huiminine ku soneka eci citume ca seho ya kama ca ku 2 Kolintu 6:4. (Tandenu.) Ku zala cetu ce ku hana muzimbu ku vakuetu, kaha cingi ca vantu va hasa ku tu singaniekela vimo, kuliya na cifua ci tue ku monekelamo. (1 Samuele 16:7) Mu ku pua vangamba va Njambi, ka tue ku zala lika ngoco vuzalo vu tua lema. Omo tu kava vitume via Mbimbiliya via pande ku tu kuasa ku viana vuzalo vue ku sata ha muvila, ni vua ku hulula, cipue vue ku katula masungu. Eci ca lomboloka ngecize, ka tue ku tava ku zala vuzalo vue ku solola muvila cipue vuntselentsele. Vuzalo vuetu ka vua pandele ku lingisa vantu ku tala kueka nga va tu mona.

⁶ Nga tu hangula vuzalo vua cili na ku zala mua vutongue, vantu va hasa ku tu singimika mu ku pua vangamba va Sukulu Yehova Muangana uetu. Kaha halumo va hasa ku muesa cizango ca ku tantekeya Njambi u tue ku lemesa, ku singimika lukungulukilo luetu, kaha citava va ka kala na cizango ca ku halakana ku muzimbu ua cili linga va kovoke.

7, 8. Kulihi cikumakuma tua pande ku zalela vuzalo vua tu pande?

⁷ Tua kala na likongo lia ku zala mua cili kuli Njambi, ku vamuanetu Vakua Kilistu na ku vantu vose, muomu ku lingamo ce ku sangaziala Yehova na muzimbu u tue ku ambulula. (Loma 13:8-10) Tua pande ku hangula vuino vuzalo vuetu nga tu ya mu ku kunguluka na mu ku ambulula. Tua pande ku zala  mu cifua ca litombola na vakua ku lemesa Njambi. (1 Timoteo 2:10) Kua kala vuzalo vu va tavesa ku vihela vimo, ku vihela vikuavo co kuahi. Mu ku pua Vakaleho va Yehova ka tua pandele ku zala vuzalo vu vavalesa vakuetu ha mutima ku nkala cihela ku tua kala.

⁸ Tandenu 1 Kolintu 10:31. Nga tu ya ku viuano via limbo na viuano via mihato, tua pande ku zala vuzalo vua tu pande. Ka tua pandele ku temuinina ku zala ca vakua mavu. Cipue nga ntsimbu ya ciuano kanda i putuke ni munima yaco kaha omo tu ya na ku tonda vihela via ku tulila ku Hotele, ka tua pandele ku zala ngoco. Nga tu lingamo tu kevua ndzolela ya ku litumbula nguetu tu Vakaleho va Yehova, kaha tu ka livua ku zituka na ku ambulula nkala ntsimbu.

9, 10. Vati Mukanda ua Filipu 2:4 ua kuata ku zalesi yetu?

⁹ Tandenu Filipu 2:4. Omo lia vika tua pande ku singanieka ha vati vuzalo vuetu vue ku kuata ku vamuanetu Vakua Kilistu? Vusunga vua ku livanga vua pua muomu vangamba va Njambi ve ku lihakela kapandi ka ku niunga eci cimamuna: “Tsihenu vilio vienu via ha mavu: vupangala, mazilo, lisungu, cizango ca cipi.” (Kolose 3:2, 5) Vamo vamuanetu tele kanda va lilongese vusunga va likovelesele  mu via vupangala, kaha citava kasi ve ku lua na vizango via vipi. Nga ka tua zangamene, vuzalo vuetu vu hasa ku kaluuisa vamuanetu ku niunga vimamuna via Mbimbiliya na ku lua na vizango via vipi. (1 Kolintu 6:9, 10) Mua vusunga ka tu tondo ku kaluuisa ku lua ca vamuanetu, ni vati?

¹⁰ Mu tue ku kala ha kati ka vamuanetu, tue ku livua ku patuka ku vantu va lema ku sambeya via masungu. Zalesi yetu ye ku vueza ku ku lela caco, cipue nga tu li mu ku kunguluka ni mu ku sikama. Vutuhu tua kala na mpoko ya ku lihanguila vi tua pande ku zala, tua kala naua na kapandi ka ku zala vuzalo vu ka kuasa vakuetu ku singanieka na ku handeka viuma via cili ku meso Njambi. (1 Petulu 1:15, 16) Cilemo ca vusunga “ka ce ku lisahuisa, ka ce ku lilengeyela viuma via civene.”​—1 Kolintu 13:4, 5.

11, 12. Vati mukanda ua Ekelesiaste 3:1, 17 u hasa ku tu kuasa ku zala vuino?

¹¹ Vangamba va Njambi mu ve ku hangula vuzalo, va tantekeya ngecize “kua kala ntsimbu ya vutumbe vuose na vupange vuose.” (Ekelesiaste 3:1, 17) Cifua ca cihela ku tua tunga, nga kua tontola ni kua ntuima, yoyesi yetu, na viuma vi tue ku panga vi hasa ku kuata ku zalesi yetu. Vunoni vitume via Yehova kasi ka vie ku aluluka.​—Malakiya 3:6.

¹² Ku cihela ca ntuima, ci hasa ku pua ca cikalu ku zala vuzalo vu muesa kasingimiko. Vunoni vamuanetu ci ka va ya ku mutima nga ka tu zala vuzalo vua ku sata ha muvila ni vua ku hulula cikuma vu solola via mu kati. (Yombi 31:1) Cikuavo naua, nga tu ya mu kueha ha ndonga ni ku tana mu cisali ca hembo, tua pande ku tana na vuzalo vua tu pande. (Visimo 11:2, 20) Vutuhu cingi ca vantu va mu mavu ve ku zala vuzalo vue ku solola vuntselentsele, tua pande ku kala na vusunga ngecize vuzalo vuetu vue ku hana kasingimiko kuli Yehova Njambi.

13. Omo lia vika cimamuna ca ku 1 Kolintu 10:32, 33 ca kuata ku zalesi yetu?

¹³ Kua kala naua citume cikuavo ca pande ku kuata ku zalesi yetu. Tua pande ku zangama linga kati tu vulumune mitima ya vakuetu. (Tandenu 1  Kolintu 10:32, 33.) Ka tua pandele ku tava vuzalo vu hasa ku sevuisa vamuanetu na vaze ka ve ku pangela Yehova. Kapostolo Paulu ua sonekele ngueni: “Yetu vose muntu ku muntu, a leme mukuavo na vilinga via cili via ku mu kolesa navio.” Paulu ua vuezeleko ngueni: “Kilistu naua ka lingile cizango ceni ivene.” (Loma 15:2, 3) Ngeci mua Yesu, ku linga cizango ca Njambi na ku kuasa vakuetu ca pande ku pua ca seho ku hiana vizango vietu. Ngeci mukemuo, ka tu ka hangula ku zala vuzalo vu tua lema vunoni vu tangula vantu ku halakana ku muzimbu ua cili.

14. Vati visemi va pande ku longesa vana vavo ku zumbangeya Njambi mu cifua ci ve ku zalelamo?

¹⁴ Visemi Vakua Kilistu va kala na kapandi ka ku longesa vana vavo ku kava vitume via mu Mbimbilya. Ve ku lingamo mu ku kala na vusunga ngecize zalesi yavo na ya vana vavo vie ku vuisa Njambi ndzolela. (Visimo 22:6; 27:11) Vati visemi va hasa ku longesa vana vavo ku singimika Njambi yetu ua ku lela na masiko eni? Va pande ku muesa lungano lua cili ku vana. Kaha na ku va longesa mu cilemo, kulihi na vati va hasa ku uana vuzalo vua va pande. Vanike ka va pandele ku lihanguila vakevo vavene vuzalo muomu va na vu leme kuahi, vunoni va na pande ku hangula vuzalo vuze vu ka sangaziala Yehova, Njambi uze u ve ku imanena.

15. Vika vi hasa ku tu kuasa ku hangula viuma na mana?

¹⁵ Mu Mbimbiliya mua kala vimamuna via vingi vi hasa ku tu kuasa ku linga vihangula vize vi ka sangaziala Njambi. Vunoni, vi tue ku zala vie ku solola vuntu vuetu. Vifua via vuzalo vu tua lema na vuzalo vu tu hasa ku landa halumo vi hasa ku litepa na via vakuetu. Vunoni vuzalo vuetu kasi vua pande ku pua vua vutongue, ka vuesi na mazilo, vua cili, vu tondeka ha ntsimbu yaco, kaha vua litombola na muimbo lietu.

16. Omo lia vika ca pua ca seho ku lihakela kapandi ka ku zala mua cili?

¹⁶ Mua vusunga, kati ca casi ku uana vuzalo vua ku tu fuila matangua ano. Cingi ca vakua mingoso va lema ku landesa vizalo via tsimana. Ngeci ce ku tondeka ntsimbu ya ku hangula vi saya, vikovelo, vi fatu na tulasa ka vie ku satula ha muvila. Vunoni vamuanetu va ka mona kapandi ka tua lihakela ka ku zala vuzalo vue ku soloka vuino ku mbunga. Kaha ndzolela i tue ku ivua mu ku hana vumpahu kuli Tatetu ua muilu uze ua tu lema, ye ku tu sindiya ku zala mu cifua ca mu ya ku mutima.

17. Viuma vika na pande ku singanieka muanetu ku tuala ha ku niunga muezi?

¹⁷ Vuno citava vamuanetu va vamala ku niunga muezi ni? Ku Masiko a Mosesa vamala va va tumine ku niunga muezi. Vunoni, Vakua Kilistu ka vesi naua muintsi lia Masiko a Mosesa cipue ku a niunga. (Levitiku 19:27; 21:5; Ngalata 3:24, 25) Ku visemua vimo, muezi ua ku puamo ve ku u tava na ku u singimika kaha ku u hasa ku tangula vantu ku halakana ku muzimbu uetu. Kaha ku li vamo vakuluntu va cikungulukilo ve ku niunga muezi. Vunoni kasi ku li vamo vamuanetu ka va lemene ku niunga muezi. (1 Kolintu 8:9, 13; 10:32) Kaha ku visemua vikuavo na vihela vimo, muezi ka ve ku u pangesa kaha va u vindika ku Vakua Kilistu. Ku vihela viaco ku niunga muezi ci hasa ku tangula muanetu ku hana Njambi vumpahu muomu a li na “aha ha ku payela.”​—1 Timoteo 3:2, 7; Loma 15:1-3.

18, 19. Vati mukanda ua Mika 6:8 u hasa ku tu kuasa?

¹⁸ Ca pua ku vezika ku tantekeya ngecize Yehova ke ku tu hana mukana ua vuzalo vu tua pande ku zala na vize ka tua pandele ku zala. Vunoni ua tu hana mpoko ya ku lihanguila viuma vi tua lema kuliya na vitume via mu Mbimbiliya. Kaha cipue nga tu hangula vimo ku tuala ha vuzalo, tua pande ku muesa ngecize tu vakua ku konkama mu ku pangela Njambi.​—Mika 6:8.

¹⁹ Tu ka tantekeya na ku likehesa ngecize Yehova ua lela kaha vitume vieni vi hasa ku tu tuamenena. Nga tu tonda ku pua va ku nkonkama na ku likehesa, tu ka kava vitume via Njambi mu muono uetu. Ku konkama ci ka tu kuasa ku singimika vakuetu na visinganieka viavo.​—Mika.

20. Vati vakuetu va pande ku muenamo ku zala cetu na cifua ci tue ku monekelamo?

²⁰ Zalesi yetu ya pande ku solola mpundu ngecize tu vangamba va Yehova. Yehova ua kala na vitume vieni via seho ya kama, kaha tua vezika mu ku vi kava. Vamuanetu vose cingi cavo ve ku zala vuino ngeci tu va sangaziala mu ku zala cavo ca cili. Ve ku kokueya vakua mitima ya vusunga ku muzimbu ua cili na ku hana vumpahu na ndzolela kuli Yehova. Nga tu hangula na mana vuzalo vuetu, tu ka tualelelaho ku hana vumpahu kuli Uze “na zala kasingimiko na vukama.”​—Visamo 104:1, 2.