Cilongesa caco ca muesele ngecize kua kala cimpande cimo lika ca kuata ku vantu vose na tungelo: Ku lelesa lizina lia kama lia Yehova. Kaha mpoko ya Yehova ya ku sika, ka ya puile cimpande ca ku liimanena. Ca pua mutamba ua cimpande ca kama ca ku lelesa lizina lia Yehova. Cikuavo naua cimpande ca vantu ku pua vakua vuoloke kuli Yehova, naco ca pua mutamba ua cimpande ca kama.

Vika via tu lingisa honi ku handeka nguetu cimpande ca kama ca pua cimo lika: ku lelesa lizina lia Yehova? Tu hilulenu vusunga vutatu.

Vua katete, Satana ua vihisile lizina lia Yehova ni nguetu lutsimo lueni lua cili, mu citungu ca Endene. Vutumbe vua cihula ca Satana kuli Eva vua puile ku muesa ngecize Yehova ka puile cihuanga kaha ue ku vingilika cikuma vangamba veni. Satana ua aluluile mezi a Yehova, linga a soloke ngue mukua makuli. Mu ku lingamo, ua kuitile mazilo ku lizina lia Yehova. Ngeci ua himpukile ‘Ndiavu’ lia lomboloka “mukua makuli.” (Yoa. 8:44) Mu ku linga Eva ua tavele makuli a Satana, ua muesele lisino kuli Njambi na ku alulukila ku sika ceni. (Njen. 3:1-6) Na lelo lino, Satana ue ku kuita mazilo ku lizina lia Njambi, mu ku mu vangeya viuma via ku vihia. Vaze ve ku tsiliela visaki viaco ve ku heta vene na ha ku muesa lisino kuli Yehova. Ngeci mukemuo, kuli Vakua Kilistu va Vusunga, ku kuita mazilo ku lizina lia Yehova, ca pua vuhenge vua ku hiana. Kaha cikeco ca koka visoti viose na vupi hano ha mavu.

Vua mu civali, linga a kuase via-ku-tanga viose, Yehova ua likuminia ku lelesa lizina lieni ku mazilo ose. Ku lingamo ca pua ca seho ya kama kuli ikeye. Ngeci ua handeka ngueni: “Nji ka lelesa lizina liange lia kama.” (Eze. 36:23) Kaha Yesu ua muesele ha toma cimpande ca pande ku kala na seho mu vivundilo via vangamba va Yehova, ngueni: “Va lelese lizina liove.” (Mat. 6:9) Vintsimbu via vingi, Mbimbiliya ya tsindika ha seho ya ku zumbangeya lizina lia Yehova. Talenu lika vimo vimueso: “Tumbuilenu Yehova vumpahu vuze vua pande lizina lieni.” (1 Miz. 16:29; Visa. 96:8) “Imbenu via vumpahu vua lizina lieni.” (Visa. 66:2) “Kaha nji ka zumbangeya lizina liove ku miaka yose ya ya-ye.” (Visa. 86:12) Imo ya vintsimbu via handekele Yehova ku tundilila muilu ya puile omo Yesu ua handekele neni ku tembele mu Yelusalema. Yesu ua handekele ngueni: “Tata zumbangaya lizina liove.” Kaha Yehova ua kumbuluile ngueni: “Nji na lizumbangeya, [kaha] nji ka lizumbangeya naua.”—Yoa. 12:28. a

Vua mu citatu, vutumbe vua kama vua Yehova vua likuata na lizina lieni, ni nguetu lutsimo lueni. Aci singaniekenu: Mu nima ya Likulukazi lia Miaka ya ku Sika ca Kilistu, vika vi ka hatako? Vuno vantu na tungelo va ka tualelelaho ku litepa omo lia cimpande ca kama, ni nguetu ku lelesa lizina lia Yehova ni? Linga tu kumbulule  eci cihula tu vulukenu viuma vivali via likuata: Ku kakatela ca vantu ku lizina lia Yehova na mpoko ya Yehova ya ku sika. Vuno ci ka tondeka vantu va lutsilielo va ka tualeleho ku hangula mutamba ua Yehova mu nima ya Likulukazi lia Miaka ni? Houe. Muomu va ka pua va ku tantuluka kaha va kueseka laza mu vifua viose. Va ka tambula muono ka ue ku hua. Vuno cimpande ca ku hakuila mpoko ya Yehova ya ku sika ci ka pua naua ca kama, ni vene ku koka matepeso ha kati ka vantu na ha kati ka tungelo ni? Houe. Ka ci ka tondeka naua ku muesa nga Yehova ua pua Muangana ua cili ni kuahi. Muomu ku ntsimbu oyo, vakua melu na mavu va ka likuata kumo, na ku tava Yehova ku pua Muangana uavo. Amba lizina lia Yehova co?

Lizina lia Yehova va ka lilelesa mu vutuntu. Vunoni li ka tualelelaho ku pua cimpande ca hiana seho cipue muilu ni ha mavu. Muomu va ka mona Yehova a tualelelaho ku linga viuma via ku komouesa. Kaha Yesu na ku likehesa cose, a ka hana ku sika cose kuli Yehova, linga Yehova ‘a ka pue viuma viose ku vose.’ (1 Kol. 15:28) Mu nima yevi, vantu va “ka kovela mu vuovoke vua vumpahu vua vana va Njambi.” (Loma 8:21) Kaha Yehova a ka pua puisamo vutumbe vueni vua kama. Vutumbe vuka? Ku puisa tungelo muilu na vantu ha mavu, ku pua vusoko vumo lika vua kama.—Efe. 1:10.

Vati evi vi ka vuisa vusoko vua Yehova muilu na ha mavu? Mua vusunga, vi ka va vuisa cizango ca kama cikuma-kuma ca ku tualelaho ku zumbangeya lizina lia Yehova. Mukua visamo Ndaviti va mu huiminine ku soneka, ngueni: “Ua ku sangaziala Yehova Njambi, . . . Kaha lia ku sangaziala lizina lieni lia vumpahu ku miaka yose ya ya-ye.” (Visa. 72:18, 19) Cili vene, tu ka tualelelaho ku uana vusunga vua ku sangaziala Yehova ku miaka yose.

Lizina lia Yehova, liemanena viose via kuata kuli Ikeye. (1 Yoano 4:8) Tu ka vuluka ntsimbu yose ngecize Yehova ua tu tangele omo lia cilemo, kaha ua muesele ngecize ua pua mukua vuoloke mu ku tu sika na cilemo. Cikuavo naua, tu ka tualelelaho ku mona Yehova a muesa cilemo ca kama ku viuma via tangele. Ku miaka yose, tu kevua cizango ca ku tualelelaho ku likuata vusamba vua kama neni na ku sangaziala lizina lieni lia ku lela.—Visa. 73:28.