“A ove mukua ku ivua vivundilo, kuli ove ntsitu yose i keza.”—Visamo 65:2.

Vamo ve ku vundila muomu ve ku handeka nguavo ku lingamo ce ku va vuisa vuino, vutuhu ka va tsiliele nguavo kuli umo a va halakana. Vunoni ka tua pandele lika ku vundila na vutumbe vua ku uana vukuasi tu lue na visoti vietu, houe. Mbimbiliya ya tu hana vusunga ngecize “Yehova * a li mu hiehi na vose vaze va mu tambakana, na vaze va mu tambakana mu vusunga. . . . A kevua mutambi uavo naua, na ku vohiela.”—Visamo 145:18, 19.

Tu hasa ku kala na vusunga nguetu, Yehova Njambi ue ku halakana vivundilo via vakua ku mu lemesa. Na cilemo cose Njambi ngueni: “Mu ka nji tambakana, kaha mu ka ya na ku vundila kuli ange, kaha ange nji ka mi halakana.”—Yelemiya 29:12.

“Kakatelenu mu ku vundila.”—Loma 12:12.

Mbimbiliya ya tu kaniamesa tu pue na “ku vundila ntsimbu yose.” Mua vusunga, Yehova Njambi ua tonda tu mu vundile.—Mateo 26:41; Efeso 6:18.

Omo lia vika Njambi ua tonda tu vundile kuli ikeye? Aci singaniekenu: Cisemi ua yala ue kuivua ndzolela nga muaneni ua mundende a mu lomba vukuasi. Cili vene, halumo cisemi a tantekeya vukuasi vua tonda muana na cifua ca li na ku livuilamo, vunoni nga a halakana muaneni a mu lomba vukuasi, ce ku muesa ngecize muaneni ua mu kulahela kaha ua pua kavusamba keni. Na vuno vene, nga tu vundila kuli Yehova Njambi, tu ka muesa ngecize tua mu kulahela kaha tu tonda ku mu suena mu hiehi.—Visimo 15:8; Tiango 4:8.

“Mbilenu cisoti cenu cose kuli ikeye, muomu ikeye a mi lela.”—1 Petulu 5:7.

Njambi ua tonda tu vundile kuli ikeye muomu ua tu lema na ku tu haka seho. A tantekeya visoti vietu viose na viuma vie ku tu umisa mutima, kaha a tonda ku tu kuasa.

Muangana Ndaviti, mu muono ueni uose ua vundilile kuli Yehova Njambi mu ku mu lomba vukuasi kaha na ku mu leka visinganieka vieni na cifua ca kele na ku livuilamo. (Visamo 23:1-6) Vati Njambi ua muenenemo Ndaviti? Njambi ua lemene Ndaviti kaha ua halakanene vivundilo vieni. (Vilinga 13:22) Na vuno vene, Njambi ue ku halakana vivundilo vietu muomu ua tu haka seho.

Aa mezi va a handekele kuli mukua ku soneka vimo via visamo mu Mbimbiliya. Ua kele na vusunga ngueni Njambi ua kele na ku halakana vivundilo vieni, kaha eci ca mu kuasele cikuma. Cikuavo naua, ua likuatele vusamba na Njambi kaha ua kele na ndzili ya ku lua na visoti vieni na vusiua.—Visamo 116:1-9.

Nga tu kala na vusunga nguetu Njambi ue ku halakana vivundilo vietu, tu ka tualelelaho ku vundila kuli ikeye. Aci talenu lungano lua vaPedro va kala ku Espanha. Va tsisile muanavo ua yala ua miaka 19 ku mponde. Omo lia vusiua, va vundilile kuli Njambi kusua kumo na ku mu leka vati va kele na ku livua linga Njambi a va lembezieke na ku va kuasa. Vika via solokele? VaPedro nguavo: “Yehova ua kumbuluile vivundilo viange ku hitila mu ku lembezieka na vukuasi vu tua tambuile na mukua ndzivo yange ku vakuetu Vakua Kilistu.”

Vutuhu ku vundila ka ca hiluisile muanavo, vunoni ca kuasele cikuma vaPedro hamo na vusoko vuavo. Mukua ndzivo yavo vaMaría Carmen va vuluka nguavo: “Ku vundila ca nji kuasele ku kolesa. Nja tantekeyele nguange Yehova ua kele na ku nji ivuisisa, muomu mu nja kele na ku vundila nja kele na kuivua ciyulo na ku lembama.”

Mbimbiliya na viuma vi va lihitile navio vantu vavengi, via muesa ngecize Njambi ue ku halakana mpundu vivundilo. Vunoni ci soloka ngecize, Njambi ke ku kumbulula vivundilo viose. Omo lia vika Njambi ue ku kumbulula lika vimo vivundilo vikuavo kuahi?