Vi ve ku Handeka Vantu ku Tuala ha ku Vundila
“Mu nje ku vundila nje kuivua ngue Njambi ali ku mukulo uange, kaha na nji kuata ku livoko na ku nji tuamenena nga nji livua ngue nja zimbala.”—VaMARÍA.
“Mpueyange ua tsile ku cancer mu nima ya ku pinda na vuvezi vuaco mu miaka 13. Nja kele na ku vundia kuli Njambi tangua na tangua kaha nja vuile nguange ua kele na ku nji halakana. Nja vuile ku lembama ca kama.”—VaRAÚL.
“Ku vundila ca pua vuana vua seho ya kama vua hana Njambi ku vantu.”—VaARNE.
Ngue mu tua mono kuli vaMaría, vaRaúl na vaArne, cingi ca vantu ve ku mona civundilo ku pua vuana vua ku lifuila. Muomu ku hitila mu civundilo, va hasa ku handeka na Njambi, ku mu santsela kaha na ku mu lomba vukuasi. Va tsiliela na mutima uose vi ya kulahesa Mbimbiliya ku tuala ha ku vundila kuli Njambi nguayo: “Eci cikeco ku-simpa cize ci tu li naco, ngecize nga tu vundila vimosi via litombola na cizango ceni, ikeye a ku tu ivua.”—1 Yoano 5:14.
Vunoni vantu vavengi ce ku va kaluuila ku tsiliela vi ya handeka Mbimbiliya ku tuala ha ku vundila. VaSteve va vulukile vati va livuile ku tuala ha ku vundila, nguavo: “Tele njili na miaka 17 vamo vavusamba vange vatatu va tsile ku vimponde vivali, umo ua tsile ku mponde ya likalu kaha vavali va tsile mu ndonga.” Vika va lingile vaSteve? Vavene nguavo: “Njehuile Njambi omo lia vika viuma viaco via solokele, vunoni ka nji kumbuluile. Ngeci nja lihuile nguange, ‘Seho ika honi ya kala ha ku vundila?’” Ngeci mua vaSteve, vavengi ve ku livua nguavo vivundilo viavo Njambi ke ku vi kumbulula, ngeci ve ku lihula nguavo, seho ika honi ya kala ha ku vundila?
Kua kala naua viuma vikuavo vie ku lingisa vantu ku mona nguavo ku vundila ka ce ku kuasa. Vakuavo nguavo, Njambi a tantekeya viuma viose kaha ue ku mona vi tue ku tondeka na lamba i tue ku hita, ngeci mukemuo, ka ci tondeka tu mu lekevio naua.
Vamo va tsiliela nguavo, Njambi ke ku halakana vivundilo viavo omo lia visevuka vi va lingile ku laza. VaJenny va handekele nguavo: “Citanga cange ca kama ca pua ku livua vungoco. Nja lingile viuma vi nje ku liveya na lelo lino, ngeci nje ku singanieka nguange ka nja fuililile ku nji halakana kuli Njambi.”
Amba enu co, vika mue ku singanieka ku tuala ha ku vundila? Nga nenu mue ku kankasiana ku tuala ha ku vundila, kalenu na vusunga ngecize Mbimbiliya i hasa ku mi lembezieka na ku manusula ku likanuuela cenu. Mu hasa ku kulahela vi ya handeka Mbimbiliya ku tuala ha ku vundila; * kaha i hasa ku mi kuasa ku uana vikumbululo ku vihula ngeci mua:
-
Vuno Njambi ue ku halakana mpundu vivundilo vietu ni?
-
Omo lia vika Njambi ke ku kumbulula vimo vivundilo?
-
Vati mua pande ku vundila linga Njambi a halakane vivundilo vienu?
-
Vati ku vundila ci hasa ku mi kuasa?
^ cin. 9 Mu Mbimbiliya mua kala vivundilo vi va lingile vangamba va Njambi va ku laza, hamo lika na vivundilo via Yesu Kilistu. Kaha mu Visoneka via ciHevelu ni nguetu Testamentu ya Laza, mua kala vivundilo vi tuvakana 150.
Halumo mu Hasa ku Lema Naua Evi
VIHULA VI VE KU LINGA VAKUENDZE NA VAHUMBE
Omo lia Vika Nja Pande ku Vundila?
Vuno ku vundila ce ku tu lembamesa lika mutima ni ca kala na vukuasi vukuavo?
