MUA KU MANUSUILA VIZINDO
2 | Kati mu Lingule
Vi ya Longesa Mbimbiliya:
“Kati mu lingule. . . . Nga ci tava, ngue na cizango cenu cose, kalenu na ciyulo na vantu vose. Vakua cilemo cange, kati mu lilinguile enu vavene, . . . muomu va ci soneka, nguavo, ‘Ku-lingula ci na kundama kuli ange; yange nji ka lingula, mua na handeka Muangana’” Yehova.—LOMA 12:17-19.
Vi ca Lomboloka eci Cinimbu:
Vutuhu ka ca puile vupi ku ivua matoto nga muntu na tu vulumuina, Njambi ua tu vindika ku lingula. Vunoni ua tu mamuna ku lavelela kuli ikeye, muomu vuovuno a ka sungamesa vuhenge vuose.—Visamo 37:7, 10.
Vi mu Hasa ku Linga:
Nga vantu va ku hona ku tantuluka va lingula, eci ce ku sema naua vizindo. Ngeci mukemuo, nga muntu na mi vulumuina kati mu lingule. Vunoni setekenu ku kumbulula mu ciyulo na ku lipokuesa. Vintsimbu vimo ku ecela mulonga, ce ku tepulula ku visoti. Vutuhu ngoco, vintsimbu vimo ca tondeka vene ku tuala mana ku cimpande caco. (Visimo 19:11) Ca ku muenako, nga muntu uaco na mi vulumuina cuma ca kama, cize ca pua mulonga na ku nguvulu, mu hasa ku hangula ku hetesa cimpande caco ku masiko.
Ku lingula, ca pua ku livula etu vavene
Vati co nga ci soloka ngue ka kuesi imo njila yeka yahi ya ku manusuilamo cimpande caco mu ciyulo? Vati co nga mu na lihakela kapandi kose ka ku manusula cimpande mu ciyulo, vunoni kasi ci li na ku tualelelaho? Kati mu lingule. Muomu ku lingamo ci hasa lika ku vuezelela vitanga. Vunoni tukulenu muzi ua vizindo mu mutima uenu. Citava mu lilongese ku kulahela mu cifua ce ku manusuilamo Njambi vitanga. “Kundika njila yove kuli Yehova; Mu tsiliele naua, kaha a ka ci lingisa.”—Visamo 37:3-5.
