MUA KU MANUSUILA VIZINDO
3 | Tundisenu Vizindo mu Visinganieka Vienu
Vi ya Longesa Mbimbiliya:
‘Lialuluisenu na mitima ya iha, linga mu limuene enu vavene, vati ca fua cizango ca Njambi, cize ca cili, ci a tava, ca ku tantuluka.’—LOMA 12:2.
Vi ca Lomboloka eci Cinimbu:
Njambi ua haka seho ku singanieka vietu. (Yelemiya 17:10) Tua pande ku viana ku linga ni ku handeka viuma vi muesa ngecize tua zinda vakuetu. Vunoni kati ovio lika. Vizindo, vie ku putukila mu visinganieka na mu mutima. Ngeci mukemuo, tua pande ku tukula nkala muzi ua vizindo mu mitima na mu visinganieka vietu. Mu ku linga evi, mukemuo lika mu tu hasa ku aluluka mu vusunga na ku litundisa vizindo.
Vi mu Hasa ku Linga:
Hilulenu vuino mutima uenu, mu mone vati mue ku livua ku tuala ha vantu veka, cikumakuma nga vakua cisemua ni cifuti ceka. Lihulenu nguenu: Vati nje ku va muenamo? Vuno cifua ci nje ku va muenamo, ca hitukila mpundu ha viuma vi nji tantekeya ku tuala hali vakevo ni? Ni ca hitukila ha kahangu? Kati mu pue na ku tala vivideo, vueho ni viuma via mu internete, vize vie ku muesa vizindo na vukenia.
Lizi lia Njambi li hasa ku tu kuasa ku vula vizindo via kala mu mitima na mu visinganieka
Kati ca casi ku hilula vuino visinganieka na mitima yetu. Lizi lia Njambi li hasa ku tu kuasa ku hilula “visinganieka na vizango via mutima.” (VaHevelu 4:12) Ngeci mukemuo, puenu na ku hilula Mbimbiliya ku sua kumo. Setekesenu vilongesa viayo na visinganieka vienu, kaha lihakelenu kapandi ka ku tombuesa visinganieka vienu ku vilongesa viayo. Lizi lia Njambi li hasa ku tu kuasa “ku zimangana” vizindo mu mitima na mu visinganieka vietu.—2 Kolintu 10:4, 5.
