Vika kua Kela Vizindo?
Omo lia vika mavu a sula na vizindo? Linga tu tantekeye via koka vizindo, tu ci tantekeyenu nga vizindo via pua vika, omo lia vika vantu ve ku putuka ku zinda vakuavo, na vati vizindo vie ku lisanduoka.
Vizindo via pua Vika?
Ku zinda, ca pua ku muesa lisandu lia kama ni vukenia ku muntu ni cipue ku civunga ca vantu. Ca pua naua ku tualelelaho ku kala na indzi.
OMO LIA VIKA VANTU VE KU PUTUKA KU ZINDA VAKUAVO?
Via vingi vie ku lingisa vantu ku zinda vakuavo. Vantu ve ku zinda vakuavo, kati lika omo lia vilinga viavo, vunoni cipue vene vaze ka va lingile na vimo viahi. Kaha vamo ve ku va zindila omo lia ku va singaniekela nguavo, vantu vose va ku civunga caco va pua vakua vilinga via ku vihia, va pua vusonde, ni ka citava ku va alulula. Cipue ku va mona ku pua va ku salela, ni vakua ku koka visoti. Ku hita mu vukenia, vuhenge ni vimo viuma vieka via ku vihia, ce ku lingisa vantu ku zinda vakuavo.
VIE KU LINGISA VANTU KU ZINDA VAKUAVO
Vintsimbu vimo, vantu ve ku zinda vene na vaze kanda va ci litulukue navo. Ca ku muenako, vamo vantu ve ku zinda vakuavo, muomu vavusoko na vavusamba vavo va va zinda. Evi vikevio vie ku lingisa vizindo ku lisanduoka vuasi.
Ku ivuisisa vati vizindo vie ku lisanduoka, ca tu kuasa ku ivuisisa omo lia vika via lana cikuma. Vunoni linga tu hase ku vula vizindo, tua pande vene ku putukila ku ntsina. Mbimbiliya ya solola muzi uaco.
MBIMBILIYA YA SOLOLA MUZI UA VIZINDO
VANTU KATI VAKEVO VA NEHA VIZINDO HANO HA MAVU. Vizindo via putukile omo umo kangelo muilu ua alulukilile Njambi kaha mu nima ya ntsimbu va mu lukile nguavo Satana Ndiavu. Satana ua puile “mukua ku tsiha fume ha katete” mua alulukilile Njambi. Kaha mu ku pua “mukua makuli na ise yao” kasi ue ku tualelelaho ku sambeya vizindo na vukenia hano ha mavu. (Yoano 8:44; 1 Yoano 3:11, 12) Mbimbiliya ya mu tumbula ku pua mukua indzi, vutenu na vukenia.—Yombi 2:7; Ku-Solola 12:9, 12, 17.
MU KU LINGA VANTU KA VA TANTULUKILE, CA CASI KU ZINDA VAKUAVO. Ha katete, Andama ua tambuluisile Satana mu ku vulumuna kuli Njambi. Ngeci mukemuo, vantu vose va suana vupi na ku hona ku tantuluka. (Loma 5:12) Kaha Kaini ndala ya Andama, ua zindile muanaye Avele na ku mu tsiha. (1 Yoano 3:12) Vunoni vantu vavengi, ve ku muesa cilemo na cikeketima. Kaha omo lia ku suana vupi, makulukazi na makulukazi a vantu va zendamena ku vukuse, cipululu, na ku lihalesa. Evi vifua vie ku sambeya vizindo.—2 Timoteo 3:1-5.
VIZINDO VIE KU LIKULISA KUZE KULI KAHANGU. Vantu ve ku lingisa vizindo ku livuezelela mu ku tualelelaho ku sambeya vilinga via vukenia na ku hona cikeketima. Kahangu, ku tuka, mapakeso, na ku vihisa viuma via mbunga via lana cikuma, muomu “mavu ose a kundama kuli uze mukua vupi” Satana Ndiavu.—1 Yoano 5:19.
Ngeci Mbimbiliya, ka ya lengelele lika ha ku solola muzi ua vizindo. Vunoni ya muesa naua lihungu lia ku vi manusula.
