MUA KU MANUSUILA VIZINDO
4 | Vulenu Vizindo na Vukuasi vua Njambi
Vi ya Longesa Mbimbiliya:
“Muhako ua Sipilitu ukeuo cilemo, ndzolela, ciyulo, lukakatela lua ngozi, ngozi, vuhuanga, vusunga, ku konkama, ku lipokuesa.”—NGALATA 5:22, 23.
Vi ca Lomboloka eci Cinimbu:
Citava ku vula vizindo na vukuasi vua Njambi. Sipilitu santu yeni, i hasa ku tu kuasa ku kala na vifua via cili, vize halumo ka citava ku kala navio ku ndzili yetu vavene. Ngeci mukemuo, mu cihela ca ku vula vizindo ku ndzili yetu vavene, tu puenu na ku kulahela mu vukuasi vue ku tu hana Njambi. Nga tu lingamo, tu ka livua ngue mua livuile kapostolo Paulu, uze ua sonekele ngueni: “Nji ku hasa viose muli uze ue ku nji kolesa.” (Filipu 4:13) Kaha naua, tu ka hasa ku handeka nguetu, “Vukuasi vuange vu fuma kuli Yehova.”—Visamo 121:2.
Vi mu Hasa ku Linga:
“Yehova ua nji kuasa ku aluluka ku tunda ku vuntu vua vukenia na ku pua mukua ciyulo.”—WALDO
Puenu na ku vundila kuli Yehova na mutima uose linga a mi hane sipilitu santu yeni. (Luka 11:13) Mu vundilenu a mi kuase ku muesa vifua via mu lutsilielo mu muono uenu. Lilongesenu vi ya handeka Mbimbiliya ku tuala ha vifua vize vie ku tundisa vizindo ku mutima, ngeci mua: cilemo, ciyulo, lukakatela na ku lipokuesa. Tondenu vinjila via ku mueselamo vifua viaco mu muono uenu. Kaha puenu na ku likata na vaze ve ku lihakela kapandi ka ku muesa vifua viaco. Vantu vaco, va ka mi kuasa ku pangela ha vifua ngeci mua “cilemo na vipanga via ku viuka.”—VaHevelu 10:24.
