Vutuhu Mbimbiliya ka ya puile livulu lia cihindu, vunoni ya hana vimamuna vie ku kuasa mua kama. Vimamuna viaco, vi hasa ku kuasa muntu ali na ku pinda na cihindu ca mu visinganieka. Tu talenu amo malungano.

“Vakangule ka va hianga cimbanda, vunoni vakua ku vavala.”—MATEO 9:12.

Mbimbiliya ya muesa ngecize cimo ku vavala ci hasa ku tondeka vene tu ye ku sipitali. Cingi ca vantu va kala na vuvezi vua mu visinganieka, va hasa ku uana mizimbu mpundu i va tondeka mu ku ivuisisa vuino vitanga viavo kaha na vukuasi vua va ndotolo.

‘Ku lihondolola muvila ci silivila.’—1 TIMOTEO 4:8

Ku linga viuma vi kuasa ku cihindu cenu ca ku muvila, ci hasa naua ku kuasa ku cihindu cenu ca mu visinganieka. Viuma ngeci mua ku lihondolola muvila ku-sua kumo, ku lia via-ku-lia vi kuasa ku cihindu kaha na ku kosa ntsimbu ya ku puamo, vi hasa ku mi kuasa.

“Mutima ua ku santsuka ukeuo cihemba ca ku viuka; vunoni cimbembesi ca ku vatuka ci umisa vitsiha.”—VISIMO 17:22.

Ku tanda Mbimbiliya na ku lihakela vizango vi mu hasa ku puisamo, ci hasa ku mi kuasa ku ivua ndzolela. Ku lihakela kapandi ka ku tuala mana ku via cili na ku tsiliela ngecize viuma tangua vi ka vuaha  ku lutue, ci hasa ku mi kuasa ku kaniama omo mu lua na cihindu ca mu visinganieka.

“Mangana a kala kuli vakua ku konkama.”—VISIMO 11:2.

Halumo mu hasa ku nongonona ngecize ci na putuka ku mi kaluuila ku lilingila viuma enu vavene. Nga mukemuo, tavenu vukuasi vua vakuenu. Citava halumo vavusamba na vavusoko va tonda ku mi kuasa, vunoni ka va tantekeya vati va hasa ku lingamo. Ngeci mukemuo, va lekenu vika vi hasa ku mi kuasa mpundu. Kati mu lavelele via kama cikuma kuli vakevo kaha puenu na ku santsela ku nkala vukuasi vu va mi hana.

Nja putukile ku livua ngecize muvila uange ka uesi vuino, ngeci nja ile ku sipitali. Kaha va ka nji uanene vene na vuvezi. Eci ca nji kuasele ku tava ku aluluka ca muono uange na ku tonda sakesi i nji kuasa.”—Nicole, a ua kala na vuvezi vua transtorno bipolar.

Nja nongonona ngecize ku tanda Mbimbiliya ku-sua kumo hamo lika na mpueyange, ce ku nji kuasa nkala litangua ku kala na ndzolela kaha na visinganieka via cili. kaha ha vintsimbu vi vue ku nji koneneka vuvezi, nje ku hasa ku vuluka cimo cinimbu ce ku nji kaniamesa.”—Peter, ue ku pinda na vusiua vua ku hianesamo.

Ka nja livuile ku zituka ku lekako vakuetu via citanga cange, muomu nja kele na ntsuamua. Vunoni umo kavusamba kange ua kama, ua nji ivuisisile na ku seteka ku lihaka mu cihela cange. Ua nji kuasele ku livua vuino na ku livua ngecize ka njesi lika liange.—Ji-yoo, ue ku pinda na cimo citanga ca ku-lia.

Mbimbiliya ya nji kuasa ku pua ua ku votsika ku tuala ha ku panga na ku huima. Vimamuna viayo, via nji kuasa ku pinda na vitanga via mu visinganieka vie ku nji yandesa.—Timothy, ue ku pinda na vuvezi vua transtorno obcessivo compulsivo.