Njambi ua Mi mi Haka Seho
MU MBIMBILIYA mua kala vimamuna via cili cikuma ku hiana mavulu ose, muomu ya tunda kuli Njambi. Kaha vutuhu ka ya puile livulu lia cihindu, vunoni i hasa ku tu kuasa mu vinjila via vingi ku pinda na visoti vie ku tu lingisa ku lisosomua. Kaha kati ovio lika, vunoni na vitanga vie ku lingisa ku hona ku singanieka vuino na visoti via cihindu ca ku muvila ni ca ku visinganieka.
Helu lia viose evi, Mbimbiliya ya tu hana vusunga ngecize Sakatanga uetu Yehova a Njambi ue ku ivuisisa visinganieka vietu na cifua ci tue ku livuilamo ku hiana vose. Kaha ali na cizango ca kama ca ku tu kuasa ku pinda na nkala visoti vi tue ku lihita navio. Ca ku muenako, tu talenu vinimbu vivali via mu Mbimbiliya vie ku lembezieka mua kama:
“Yehova a li hiehi na vaze va li na mutima ua ku tsa, Kaha ohiela vaze va li na cimbembesi ca ku vavala.”—VISAMO 34:18.
“Yange, Yehova Njambi yove, Nji ka kuata livoko liove lia cilio, Na ku handeka nove nguange, ‘Kati u ivue vuoma; Nji ka ku kuasa.’”—ISAYA 41:13.
Vati honi Yehova ue ku tu kuasa ku pinda na visoti via mu visinganieka? Ngue mu tu mona mu vimpande vi na hatako, Yehova ue ku muesa ngecize ua tu haka seho ya kama kaha ue ku tu kuasa mu vinjila via ku liseza-seza.
a Yehova lia pua Lizi lia Njambi.—Visamo 83:18.
