Ci hasa ku tu puila ca cikalu cikuma nga umo kavusamba ali na ku pinda na vumo vuvezi vua mu visinganieka. Vunoni tu hasa ku muesa seho i tua mu haka, mu ku mu kuasa ku pinda na citanga ceni. Mu njila ika?

‘Kalenu na vuasi mu ku halakana.’—TIANGO 1:19.

Imo njila ya cili cikuma i mu hasa ku kuaselamo kavusamba kenu, ya pua mu ku mu halakana nga a tonda ku handeka. Kati mu ivue ntsindiye ya ku kumbulula ku viose via handeka. Ivuisisenu via ali na ku handeka na ku seteka ku lihaka mu cihela ceni. Kalenu na mutima ua ku ivuisisa viose via ali na ku handeka. Kati ku mu singaniekela viuma ni ku mu paya. Vulukenu ngecize vintsimbu vimo. Kavusamba kenu a hasa ku handeka vimo viuma ka tondele mpundu ku handeka kaha mu nima yaco a hasa ku ka liveya via handekele.—Yombi 6:2, 3.

‘Mu simpisienu.’—1 TESALONIKA 5:14.

Citava halumo kavusamba kenu na lisosomua ni ali na ku pinda na visinganieka via ku livua vungoco. Ngeci mukemuo, mu muesenu seho, mu ku lingamo mu ka hasa ku mu lembezieka na ku mu kaniamesa ambe nga ka muesi na mezi a cili a ku mu kaniamesa.

“Kavusamba a lema ntsimbu yose.”—VISIMO 17:17.

Vakuasenuko vimo. Kati mu singanieke ngecize mu tantekeya mpundu vukuasi vuka va tondeka, vunoni vehulenu mpundu. Nga mu mona ngecize  ci li na ku va kaluuila ku mi lomboluela vi va tondeka mpundu, setekenu ku va hula vimo vi mu hasa ku linga hamo lika navo. Ngeci mua kuya na ku liololako mu mikono ni mu hasa ku lihana mu ku ka va landelako vimo, ku va kombelako ha ndzivo ni nkala cipanga ceka.—Ngalata 6:2.

“Kalenu na lukakatela.”—1 TESALONIKA 5:14.

Vintsimbu vimo, kavusamba kenu ka kala na cizango ca ku simutuila. Vunoni mu hanenu vusunga ngecize hose ha ka tondela ku simutuila mu ka mu halakana. Omo lia ku vavala ceni, halumo kavusamba kenu a hasa ku linga vimo ni ku handeka vimo vi mi vavala ku mutima. A hasa ku tsiha imo nkuminio u mu na lingi neni ni ku kala na mateko-teko. Kalenu na lukakatela kaha setekenu ku mu ivuisisa omo mu mu kuasa.—Visimo 18:24.

“Nje ku linga cose linga kavusamba kange a kulahele ngecize nji hasa ku mu kuasa. Vutuhu ka nji hasa ku manusula visoti vieni, vunoni nje ku lihakela kapandi ka ku mu halakana vuino. Vintsimbu vimo, ue ku tondeka vene ku mu halakana linga a livue vuino.”—Farrah, a ua kala na kavusamba keni ua kala na cimo citanga ca ku lia, ku lisosomua na vusiua vua ku hianesamo.

“Umo ua vavusamba vange ua kala na ngozi kaha ue ku nji kaniamesa. Ua nji laniene kuya ku ndzivo yavo na ku ka nji zumbula na via ku-lia via ku tovala. Kaha ha ntsimbu yaco, hakeho ha nja lizivile ku zituka mu ku handeka mpundu via kele mu mutima uange. Vize via nji kaniamesele mua kama!”—Ha-eun, ua kala na vuvezi vua ku lisosomua mua kama.

“Ku muesa lukakatela ca pua ca seho. Nga mpueyange na nji lingi vimo vi na nji vuisa matoto, nje ku livuluisa ange ivene nguange, vuvezi vueni vukevuo vu na mu lingisamo, kati ikeye mpundu a tonda ku vi linga. Eci ce ku nji kuasa linga kati nji niengue vuasi kaha na ku mu muesa ngozi.”—Jacob, ua kala na mpueyeni ua vavala vusiua vua ku hianesamo.

“Mpueyange ue ku nji kuasa mua kama na ku nji lembezieka. Omo musongo uange ua ku lisosomua mua kama ue ku livuezelela, ke ku nji sindiya ku linga viuma ka nji tondo. Kaha eci ca lomboloka ngecize neni ue ku likela ku linga vimo viuma via lema mua kama. Ku lihana ceni na vuhuanga vue nji muesa, via pua via ku lifuila cikuma.”—Enrico, ua vavala vuvezi vua ku lisosomua mua kama.