Vitanga via mu Mutue Vili na ku Livuezelela mu Mavu Ose
“Ntsimbu yose nje ku lisosomua, ambe vene nga nji li lika liange mu hondo.”
“Mu nje ku ivua ndzolela yange ili na ku livuezelela mua kama, nje ku lisosomua, muomu nji tantekeya ngecize vuovuno nji uila mu vusiua vua ku hianesamo.”
“Nje ku seteka ku tuala lika mana ku visoti via nkala litangua, vunoni vintsimbu vimo ku lisosomua na via ku lutue naco ce ku nji uana mu ku tungumuna.”
Aa mezi va handekele kuli vamo va kala na vitanga via mu visinganieka. Vuno nenu mue ku pinda na citanga caco ni mua kala na umo kavusoko ni kavusamba ua kala naco ni?
Nga mukemuo, kaha tantekeyenu ngecize kati lika lienu. Vantu vavengi lelo lino, ve ku pinda na vitanga via mu visinganieka ni va kala na vamo vavusoko cipue vavusamba ve ku pinda navio.
Mua vusunga, tuli na ku yoyela ku “zintsimbu zia ku kaluua,” kaha evi vie tu kokela ku lisosomua ca ku liseza-seza. (2 Tim. 3:1) Vakua ku tondesesa nguavo, mu mavu ose muntu umo ha kati ka vantu 8, ue ku pinda na vitanga via mu visinganieka. Mu 2020 omo lia musongo ua COVID-19, vitanga via ku lisosomua mua kama via livuezelele cikuma ha kati ka vantu (26%), kaha co vitanga via mu visinganieka via livuezelele (28%).
Vutuhu ca pua ca seho ku tantekeya vantu vangahi va li na ku pinda na vitanga via mu visinganieka, vunoni ca seho ya kama ku tantekeya vati nenu na vavusoko vuenu, mu hasa ku pinda navio ni ku liniunga ku vikevio.
Vika via pua cihindu ca mu visinganieka?
Cihindu ca mu visinganieka ca pua ku livua ngecize muli na ku singanieka vuino kaha muvila uenu uli na ku panga vuino. Mu hasa ku puisamo vuino vipanga ambe nga muli mu ntsindiye kaha na ku ivua ndzolela mu muono.
Vuvezi vua mu visinganieka . . .
-
KA VUE kuata muntu muomu muntu uaco ua pua ua ku zeya, houe.
-
VUA PUA mpundu citanga ca cihindu ce ku tanganesa cifua ce ku singaniekelamo muntu, ku mu kokela cikela, na ku tanganesa naua cifua ce ku livuilamo na vilinga vieni.
-
Ce ku kaluuisa muntu ku likuata vusamba na vakuavo kaha na ku puisamo vene viuma via tangua na tangua.
-
Vuvezi vuaco ka vue ku tala ku citso, cisemua, muyati, lilimi, vulombelo, sikola ni ku vupite vua muntu.
Kua ku tondela vukuasi vua mavezi a mu visinganieka
Nga mu nongonona ngecize yenu ni umo kavusoko kenu ali na ku kala na vitanga via ku kosa, ku-lia ni ku lisosomua mu ntunda ya kama, ci pua ca cili ku tonda vukuasi. Muomu ku lingamo ci mi kuasa ku nongonona citanga cika mpundu ali naco kaha vika vili na ku ci koka. Vunoni kulihi mu hasa ku uana vukuasi?
Muntu ua mana cikuma ku hiana vose Yesu Kilistu, ua handekele ngueni: “Vakangule ka ve ku tondeka ndotolo, vunoni vakua ku vavala.” (Mat. 9:12, NWT) Cili vene, nga vavezi va tonda vukuasi vua vandotolo na vihemba, va hasa ku tepulula ku vavala ci ve ku ivua, ku kala na ndzili kaha na ku yoya mu ndzolela. Ngeci mukemuo, ca pua ca seho kuli vakevo ku tonda vuasi vukuasi, nga va mona ngecize vitanga viavo via cihindu vi li na ku livuezelela ni kasi ka viesi na ku hita. a
Vutuhu Mbimbiliya ka ya puile livulu lia cihindu, vunoni mua kala mizimbu i hasa ku kuasa vaze va kala na vitanga via mu visinganieka. Ngeci tua mi lania mu hilule mizimbu i na hatako, linga mu mone vati Mbimbiliya i hasa ku tu kuasa ku pinda na mavezi a mu visinganieka.
a Vuno Vutala ka vua tsindikile mpundu ha sakesi na imo yahi, muntu ku muntu na pande kuli hiluila visakesi via kalako na ku lilingila cihangula caco ikeye ivene.
Halumo mu Hasa ku Lema Naua Evi
ESSENTIAL BIBLE TEACHINGS
Omo lia Vika Njambi Necelela Tuyando?
Vavengi ve ku lihula omo lia vika mavu a na sulu ngeci vizindo na tuyando. Mbimbiliya ya hana cikumbululo ca cili kaha ce ku lembezieka.
TUALELENUHO KU VINGILA!
Ku Livuezelela ca Citanga ca Cihindu ca mu Visinganieka ku Vakuendze—Vika Mbimbiliya ya Handekaho?
Mbimbiliya ya hana vimamuna ku vakuendze ve ku pinda na Cihindu ca mu Visinganieka.
YETU VEYA
Vundilenu Cilongesa
Simutuilenu ku tuala ha vihula via mu Mbimbiliya ni lilongesenu via vingi ku tuala ha Vakaleho va Yehova.
