Muzimbu ua cili ua Vuangana vua Njambi vali na ku u ambulula mu mavu ose, ngue muze mua polofetele Yesu. (Mateo 24:14) Mu Mbimbiliya ku mukanda ua Ndaniele va muesa ngecize ovu vuangana vua pua nguvulu ya Njambi. Mu kapitulu ka mu civali mua kala vupolofeto vua handeka via mavuangana a vantu ni vanguvulu tunde ku Mbambilone ya ku laza na ku ntsimbu ino. Cinimbu 44 ca muesa vi ka soloka ku lutue nguaco:

“Njambi ua muilu a ka tumbika vuangana vumosi vuntsa ka va kenieka ku miaka yose ya ya-ye, cipue mpoko yavuo ka va yeca ku vantu veka; vunoni vukevuo vu ka vatuola na kulia mavuangana aa ose, kaha vu ka mana ku miaka yose ya ya-ye.”

Ovu vupolofeto na vukuavo vua vuingi vua handekele laza ngecize Vuangana vua Njambi vu ka hinga mavuangana a vantu ose na ku neha ciyulo na ku litavasiana ha mavu. Muono ua cifua cika va ka yoya vantu omo vu ka sika vuangana vua Njambi? Talenu vivezikiso vi ka lipuisamo vuovuno.

• UAHI A KA LUA NDZITA NAUA

  Visamo 46:9 Nguayo: “[Njambi] A lingisa zindzita ku likela na haze ha lenga mavu; a pokola vuta vua lungusa, kaha a vatula ha kati likunga; a tsimika makalu a ndzita mu tuhia.”

  Mu ku mona cenu, vati ano mavu e ku fuile nga vimbongo viose vi ve ku sanduola mu ku landa mata na ku lilongesa vutongue vua ku a pangesa vie ku ile mu ku kuasa vantu kati mu ku va tsiha? Mua vusunga Vuangana vua Njambi vu ka vi puisamo mpundu.

• UAHI A KA VAVALA NAUA

  Isaya 33:24 Nguayo: “Mundambo ka li ka handeka ngueni, nji ku vavala.’”

  Singaniekenu ku yoyela mu mavu a ku hona vuvezi vua mbunge ni mutima, cancer, malaria, ni nkala vuvezi. Visipitali na vihemba ka vi ka kalako naua. Ku ka kala cihindu ca ku tantuluka—ou ukeuo muono u va lavelela vantu va ka yoya ha mavu.

• KU KA KALA VIA-KU-LIA VIA KU PUAMO

  Visamo 72:16 Nguayo: “Ku ka kala ku-lana ca mbuto ha mavu helu lia mincinda; Vusuka vuao vu ka ninganga ngue Livano: Na vaze va kuimbo va ka sokolokela ngue muila ua ha mavu.”

  Mavu aka soka via-ku-lia via ku puamo ku vantu vose, ci ka pua ca casi ku vi uana. Ndzala na mavezi a ndzala vi ka hita.

• KU VAVALA, KU LINIENGA NA KU-TSA VI KA HITA

  Ku-Solola 21:4 Nguayo: “Kaha a ka hunda masozi ose ku meso avo; na ku tsa ka ci ka ka kala naua; cipue ku-linienga na vusiua ka ci ka kala naua, cipue ku lila, cipue ku vavala viuma via ku livanga vi na hiti”

   Eci ca lomboloka muono ka ue ku hua ha mavu mu vutantuluke mu citungu! Evi vikevio via na tu kulahesa Sakatanga Uetu, Yehova Njambi.

Vamo ve ku singanieka ngue kati via vusunga ni vati? Vutuhu cingi ca vantu va kala na cizango ca ku ka yoya ou muono u va kulahesa mu Mbimbiliya, vavengi ce ku va kaluuila ku ivuisisa via ku yoya miaka yose. Vali na vusunga vuaco, muomu ka kuesi muntu ua yoyeleho laza miaka yose a tu leke vati ua fua muono uaco.

Fumeko etu vantu tua kala mu vundungo vua vupi na ku-tsa kaha mueza viteli via ku vavala, tuyando, na visoti vieka na vieka mu miaka na miaka. Kaha eci ca lingisa vantu ku tenguka na cifua ca muono uaco ngue ukeuo lika ua kalako. Vunoni ou muono ua ntsimbu ino, ua liseza cikuma na cifua ca muono ua tondele Sakatanga uetu Yehova Njambi.

Njambi ua tonda tu tsilielele na mutima uose mu mezi eni, ngeci ua handekele via Lizi lieni ngueni: “Ka li ka nji hilukila ngoco, vunoni lika lingisa vize vi nja lema, kaha li ka vezika ku cize ku nji ka li tuma.”—Isaya 55:11.

Mu Mbimbiliya Yehova va mu tumbula ku pua Njambi uze “ka hasa ku onga.” (Tito 1:2) Mu ku linga ikeye mpundu ua likuminia ku puisamo evi viuma ku lutue, tua pande ku lihula nguetu: Vuno citava vene vantu va ka yoye miaka yose mu citungu ci va kulahesa ni? Vika tua pande ku linga tu ka tambule vivezikiso via kulahesa Njambi? Mu mafo a na hatako, mu ka uana vimpande via seho vi kumbulula evi vihula.