Omo lia Vika tua Tondeka Vuangana vua Njambi?
Ku vuputukilo vua ku tanga ca viuma, Sakatanga uetu, Ikeye lika ua kele na ku sika vantu. Sakatanga uetu, Lizina lieni Yehova. Ua puile Muangana ua cilemo. Ua pangele limbo lia cili, ni nguetu citungu ca Endene, linga vantu va yoyelemo. Kaha naua ua va hakelelemo via-ku-lia via vingi. Cikuavo naua ua hele vantu vipanga via ndzolela. (Njenisisi 1:28, 29; 2:8, 15) Vantu nga va tualeleho ku yoya mu ciyulo, nga va tualeleleho ku ononoka ku sika ca Njambi yetu ua cilemo.
Vantu va katete va vianene Njambi ku pua Muangana uavo
Mbimbiliya ya muesa ngecize umo kangelo ua lisino, u va lukile mu nima ya ntsimbu nguavo Satana Ndiavu, ua alulukilile ku sika ca Njambi. Ua muesele ngecize vantu va hasa ku yoya mu ndzolela ca ku hona ku tuamenena cipue ku va sika kuli Njambi. Vunoni ca vusiua ku handeka ngecize, visemi vetu va katete, Andama na Eva, va kavele lungano lua Satana na ku muesa lisino kuli Njambi.—Njenisisi 3:1-6; Ku-Solola 12:9.
Mu ku linga va Andama na Eva va vianene Njambi ku pua Muangana uavo, va zimbalesele citungu na lulavelelo lua ku yoya miaka yose na cihindu ca ku tantuluka. (Njenisisi 3:17-19) Cihangula cavo ce ku kuatele na ku vana va ve ku semene mu nima ya ntsimbu. Mbimbiliya ya muesa ngecize mu ku linga Andama ua vulumuine, “vupi vua kovelele hano ha mavu, na ku-tsa ha vupi.” (Loma 5:12) Vupi vua kokele naua luvinda lukuavo: vantu va putukile ku lisika vavene. Mbimbiliya nguayo: “Umo [muntu] ali na mpoko kuli mukuavo mu ku lipihisa ivene.” (Ekelesiaste 8:9) Ca pua luvinda muomu nga vantu va sika vakuavo vantu, noho ku kale visoti.
VANTU VA PUTUKILE KU LISIKA VAVENE
Nimelonde ua alulukilile Njambi
Muntu ua katete u ya tumbula Mbimbiliya mu ku sika vakuavo ua puile Nimelonde. Kaha tunde ku matangua a Nimelonde, vantu vakua vukama ve ku pangesa ngolo mua ku vihia. Imo miaka 3.000 ku nima, Muangana Solomone ua sonekele ngueni ua muene “masozi a vaze va muene mapakeso, kaha ka va kele na mukua ku lembezieka; kaha ku mutamba ua vakua ku va pakesa kua kele zindzili.”—Ekelesiaste 4:1.
Kaha cipue lelo lino ku sika ca vantu ka ca alulukile. Mu 2009, umo muzimbu ua vakua Nações Unidas ua handekele nguavo: “Tuli na ku mona ha toma ngecize ku sika mua ku vihia cikeco ce ku koka cingi ca visoti vi ve ku pinda navio vantu.”
NTSIMBU YA KU LINGAKO MUMO!
Ano mavu a tondeka vamiangana va cili na nguvulu ye ku sika mua cili. Kaha evi vikevio via na kulahesa Sakatanga uetu!
Cipue vanguvulu va cili cikuma va hano ha mavu va honoua ku manusula visoti via kama via vantu
Njambi ua tumbika vumo Vuangana, ni nguetu nguvulu, ika tundisako vinguvulu viose via vantu, kaha vukevuo lika “vu ka mana ku miaka yose ya ya-ye.” (Ndaniele 2:44) Ovu vukevuo Vuangana, vu ve ku vundila vantu vavengi. (Mateo 6:9, 10) Vunoni Njambi kati ikeye a ka sika vuangana vuaco. Ua hangula Muangana ueka, a tantekeya visoti via vantu muomu neni ua puileho laza muntu. Muangana iya?
Halumo mu Hasa ku Lema Naua Evi
VIHULA VIA MBIMBILIYA VI VA KUMBULULA
Vuno Vuangana vua Njambi vua Kala mu Mutima Uenu Ni?
Vika a lomboloka “vuangana vua Njambi vu li mu kati kenu”?
