Mu cimpande ci na hiti, tu na simutuilile ha citantekeyeso ca hele Yesu, citantekeyeso caco ca hele vukaleho ngecize, Vuangana vua Njambi vua putuka ku sika kaha Yesu ikeye Muangana ua Vuangana vuaco.

Mbimbiliya ya muesa ngecize, Yesu mua londele ha Vuangana, ua sekuile Satana na vandemone muilu. Muilu ka ve ku hetamo naua, vunoni ha mavu lika ve ku pangela, ngeci mukemuo visoti via mavu via livuezelela cikuma tunde mu muaka ua 1914.—Ku-Solola 12:7, 9.

Vutuhu visoti vi li na ku livuezelela hano ha mavu, Yesu mu ku pua Muangana ua Vuangana vua Njambi, na lingi viuma via vingi mu ku kuasa vantu mu mavu ose. Cipanga ca ku longesa vantu Mbimbiliya mu mavu ose ca tumbuile Yesu, ci li na ku kuasa va vengi ku lilongesa vitume via mu Mbimbiliya na ku vi pangesa mu miono yavo tangua na tangua. (Isaya 2:2-4) Va vengi va lilongesa njila ya cili ya ku muenamo vipanga, vati va hasa ku tuala miono yavo ku lutue, kaha na vati va hasa ku kala na vupite ca ku hona ku pua vangamba vavuo. Ava vantu vaco va li na ku lilongesa viuma vili na ku va kuasa mu ntsimbu ino vene, kaha va li na ku liviukisila ku pua vantu va tonda Njambi va ka kale ha mavu omo Vuangana vua Njambi vu ka sika.

Vutuhu Yesu na pu laza Muangana muilu, mavuangana a vantu kasi ali na ku sika ha mavu. Vunoni Njambi ua lekele Yesu ngueni: “Sika ove ha kati ka vitozi vove.” (Visamo 110:2) Vuovuno Yesu a ku nongesa vitozi veni vose kaha na ku patula vaze ve ku ononoka Njambi.

Mu ntsimbu yaco, Vuangana vua Njambi

• Vu ka nongesa malombelo a makuli. Malombelo ose eku longesa via makuli ku tuala hali Njambi kaha eku kaluuisa miono ya vantu, va ka a nongesa. Mbimbiliya ya setekesa malombelo a makuli ku mpuevo mukua ku linga vupangala. Ku nonga cao ci ka tungumuna vavengi.—Ku-Solola 17:15, 16.

• Vu ka manusula mavuangana a vantu. Vuangana vua Njambi vu ka nongesa mavuangana ose a vantu.—Ku-Solola 19:15, 17, 18.

• Vu ka nongesa vakua ku linga via ku vihia. Amba co vaze vakua ku linga via ku vihia, kaha ve ku viana ku ononoka Njambi? “Vunoni vakua vupi va ka va vatula ku cifuti, na vakua vungungu va ka va tukulamo.”—Visimo 2:22.

• Vu ka nongesa Satana va vandemone. Satana na vandemone va ka va kuta “linga kati a onge naua vifuti.”—Ku-Solola 20:3, 10.

Vati evi vi ka kuasa vaze ve ku ononoka Vuangana vua Njambi?

Mu vu ka sika Vuangana vua Njambi muilu, Yesu a ka puisamo viuma via vingi ku hiana va vize vi va hasa ku linga mavuangana a vantu. A ka sika hamo lika na va 144.000, vaze va va hangula ha mavu. (Ku-Solola 5:9, 10; 14:1, 3) A ka linga cose linga cizango ca Njambi va ka ci linge hano ha mavu. Vika Vuangana vua Njambi vu ka lingila vantu ha mavu?

• Vu ka manusula mavezi na ku-tsa. “Kaha mundambo ka li ka handeka ngueni, Nji ku vavala,” kaha “na ku-tsa ka ci ka kala naua.”—Isaya 33:24; Ku-Solola 21:4.

• Vu ka neha ciyulo ca vusunga na ku lembama. “Ciyulo ca vana vove ci ka kama,” kaha “va ka tumama muntu ku muntu muintsi lia muti ueni ua viniu, na muintsi lia mukuyu ueni; kaha na umo uahi a ka va vuisa vuoma.”—Isaya 54:13; Mika 4:4.

• Vu ka hana vipanga via cili ku vantu. “Vaze va nji na hangula va ka viukilila vipanga via mavoko avo ntsimbu ya kama. Ka va ka panga ngoco.”—Isaya 65:22, 23.

• Vu ka vezikisa livu. “Zindinda na mpambo vi ka zolela; Na makango a ka viukilila, Na ku tema ntsani ngue loza.”—Isaya 35:1.

• Vu ka longesa vantu mua ku yoyela miaka yose. “Muono ka ue ku hua ukeuo ou, ku ku tantekeya ove Njambi umo lika ua vusunga, na uze i ua tumine, ikeye Yesu Kilistu vene.”—Yoano 17:3.

Njambi a tonda nenu mu ka tambule vivezikiso viose evi. (Isaya 48:18) Cimpande ci na hatako ci ka lombolola vi mu hasa ku linga vuovuno linga mu puisemo via tondeka mu ku tambula ou muono ua ndzolela.