Vi mu Hasa ku Linga mu ka Yoyele mu Mavu a Aha
Vimpande via ku nima, vi na muesa ngecize vuovuno Njambi a ka nongesa vantu vakua ku linga via ku vihia hamo lika na visoti viose. Tu kalenu na vusunga ngecize vi ka lipuisamo. Omo lia vika? Muomu Lizi lia Njambi, Mbimbiliya, lia kulahesa ngualio:
“Mavu [ali na ku] hita.”—1 YOANO 2:17.
Tuli na vusunga ngecize vutuhu mavu ali na ku hita, vunoni kuli vamo va kovoka, muomu cinimbu ci tua tumbula helu ca vuezako naua nguaco:
“Vunoni ou ue ku linga-linga cizango ca Njambi a kala-kala ntsimbu yose ya ya-ye.”
Ngeci mukemuo, lihungu lia kuovoka lia pua ku linga cizango ca Njambi. Kaha linga tu tantekeye cizango ca Njambi ha katete tua pande ku mu tantekeya Ikeye.
KU OVOKA KU KU NONGA CA ANO MAVU CA HITUKILA HA “KU TANTEKEYA” NJAMBI
Yesu ua handekele ngueni: “Muono ka ue ku hua ukeuo ou, ku ku tantekeya ove Njambi umo lika ua vusunga.” (Yoano 17:3) Linga tu kovoke ku ku kotoka na ku yoya miaka yose, tua pande ‘ku tantekeya’ Njambi. Ku tantekeya Njambi ka ca lomboloke ku tantekeya lika nguetu kua kala ni ku tantekeya imo mizimbu ya indende ku tuala hali ikeye, houe. Tua pande ku likuata vusamba neni. Kaha ku kola ca nkala vusamba, ca hitukila ha ku uana ntsimbu ya ku likata na kavusamba uaco. Na vuno vene, mukemuo mu ca fua ku likuata vusamba na Njambi. Tu hilulenu vumo vusunga vua seho vu ya longesa Mbimbiliya, vuze vue ku tu kuasa ku likuata vusamba na Njambi na ku vu kaniamesa.
PUENU NA KU TANDA LIZI LIA NJAMBI MBIMBILIYA, MATANGUA OSE
Mu hasa ku kovoka ku ku kotoka ca ano mavu mu ku vundila kuli Njambi linga a mi kuase ku linga muaya cizango ceni
Tua tondeka ku-lia linga kati tu tse. Vutuhu ngoco, Yesu ua handekele ngueni: “Kati mbolo lika i yoyesa muntu, vunoni na mezi ose a ku fuma mu kanua ka Njambi.”—Mateo 4:4.
Lelo lino, mezi a Yehova a kala mu Mbimbiliya. Nga mu lilongesa eli livulu lia ku lela, mu ka tantekeya vusunga ku tuala ha viuma via tu lingilile Njambi ku nima, vi ali na ku tu lingila mu ntsimbu ino, nevi via ka tu lingila ku lutue.
PUENU NA KU VUNDILA VUKUASI KULI NJAMBI
Vati mu hasa ku linga nga mu tonda ku mi tuamenena kuli Njambi, vunoni ci li na ku mi kaluuila ku likela viuma via vindika? Mu cisoti ngeci mueci, hakeho ha ca vuahela ku tantekeya Njambi.
Tu hilulenu muzimbu ua umo mpuevo u tu tumbula nguetu Sakura, ua yoyele muono ua vupangala. Mua putukile ku lilongesa Mbimbiliya ua nongonuene ngecize Njambi ua sika vantu veni va ‘tine ku vupangala.’ (1 Kolintu 6:18) Sakura ua vundilile vukuasi kuli Njambi kaha ua hasele ku vula citanga caco. Vunoni vintsimbu vimo ue ku lua na vieseko. Ivene ngueni: “Nga visinganieka via vupangala vi nji iza mu mutue nje ku vundila na mutima uose kuli Yehova, muomu nji tantekeya mpundu ngecize ka nji hasa ku vi vula lika liange. Ku vundila ce ku nji kuasa ku likuata vusamba vua kama na Yehova.” Ngeci mua Sakura, makulukazi na makulukazi a vantu vali na ku tantekeya Njambi. Kaha Ikeye ue ku va hana ngolo i va tondeka, linga va alulule miono yavo na ku yoya mu cifua ca muya ku mutima.—Filipu 4:13.
Nga mu vueza ku kapandi ka ku tantekeya Njambi, neni a ka “mi tantekeya” mu ku pua kavusamba keni ua kama. (Ngalata 4:9; Visamo 25:14) Ku likuata vusamba neni ci ka mi lingisa kuovoka ku ku nonga ca mavu ano, na ku kovela mu mavu a aha. Vati honi a ka fua mavu a aha? Cimpande ci na hatako ci vi lombolola.
a Yehova lia pua lizina lia Njambi ngue mu ya muesa Mbimbiliya.