Haka Mpundu ua Hitukila Muono Uenu ua ku Lutue?
Vantu vavengi via tsiliela nguavo, kua kala imo ngolo ka tue ku mona, ikeyo ye ku tuamenena miono ya vantu. Omo lia ku tsiliela muli evi, vamo ve ku linga vimo viuma linga vi va nehele soliti ni ku va puisa va ku vezika.
VI VA TSILIELA VAVENGI
KU TAHESA VINTANGA-NTANGA: Vamo vantu va tsiliela nguavo, muono uavo ua ku lutue ua hitukila ha cifua ci va nonekelelemo vintanga-ntanga ha litangua li va semukile. Ngeci ve ku ya kuli vakua ku tahesa vintanga-ntanga ni vi horóscopo linga va tantekeye vika vi ka va solokela ku lutue na vati va hasa ku liniunga ku luvinda.
FENG SHUI: Vamo va tsiliela nguavo, ku tunga vindzivo viavo mu cimo cifua, ci ka va nehela vivezikiso. Umo yala ua lizina Lo Wing * ua ku Hong Kong ngueni: “Umo mukua ngombo ya Feng Shui, ua nji lekele ngueni nga nji haka limo livundungulu mu imo mbango ya ku hangula ya venda yange, nji ka pupa vimbongo via vingi.”
KU LEMESA VAKULU: Kasi kua kala vakuavo va tsiliela nguavo va na pande ku kombeleya viuma ku vakulu ni ku vanjambi va ku liseza-seza, linga va va niunge na ku va vezikisa. Umo mpuevo ua lizina Van, ua ku Vietnam, ua handekele ngueni: “Ange nja tsilielele nguange nga nji pua na ku kombeleya ku vakulu, nange na vana vange tu hasa ku yoya muono ua cili mu ntsimbu ino kaha na ku lavelela vivezikiso vikuavo ku lutue.”
KU SEMUKA VINTSIMBU VIA VINGI: Vavengi va tsiliela nguavo, muono ue ku lizenga. Ni nguetu muntu ue ku semuka kaha a tsa kaha a semuka naua, ngoco-ngoco lika. Va tsiliela nguavo, luvinda ni ku vezika ci va kala naco lelo lino, ca hitukila ha muono ua ku livanga u va yoyele.
Vunoni vavengi nguavo, evi viuma viaco via pua vizila via ngoco. Vamo ve kuya ku vingombo, kuenda na mifuka, ku likutiya viuma mu vimbunda ni ku mavoko, ku mina vimpelo, na vikuavo. Kaha va tsiliela nguavo ku linga evi, ci ka va kuasa ku yoya vuino na ku tantekeya via ku lutue.
VIKA VIE KU IZAMO?
Vuno vantu va tsiliela mu viuma viaco, ve ku yoya mpundu muono ua cili na ku liniunga ku visoti via ku lutue ni?
Halakanenu via lihitile navio Hào ua ku Vietnam. Ua putukile kuya ku vakua ku tahesa vintanga-ntanga, feng shui, na ku lemesa vakulu, linga evi viuma viaco vi mu tuamenene. Vuno ua puisilemo via tondele ni? Ivene ngueni: “Mingoso yange ya uile, nja likovelesele mu makongo, nja lipindisile na vavusoko na ku putuka ku lisosomua cikuma.”
Kaha Qiuming ua ku Taiwan, neni ua tsilielele mu vakua ku tahesa vintanga-ntanga, mu ku semuka vintsimbu via vingi, mu soliti, mu feng shui, na ku lemesa vakulu. Mu nima ya ku hilula vuino evi viuma, ua handekele ngueni: “Vilongesa na vilinga viaco ka via litombuele cimo na cikuavo. Kaha via vikalu ku vi ivuisisa. Nja nongonuene ngecize vi ve ku handeka vakua ku tahesa vintanga-ntanga, vintsimbu via vingi ka vie ku lipuisamo. Kaha co ku tuala ha ku semuka vintsimbu via vingi, nga muntu ke ku hasa ku vuluka na vimo viahi mu muono ueni ua katete, vati honi a hasa ku tantekeya ha na pande ku pangela mu muono ueni ua ku lutue?”
“Nja nongonuene ngecize vilongesa na vilinga viaco, ka via litombuele cimo na cikuavo kaha naua via vikalu ku vi ivuisisa.”—QIUMING, TAIWAN
Ngue mua nongonona Hào, Qiuming na vakuavo vavengi, muono uetu ua ku lutue ka ua hitukilile ha soliti, vintanga-ntanga, vakulu ni ku semuka vintsimbu via vingi. Vuno eci ca lomboloka ngecize ka tuesi naua na ndzili ku tuala ha muono uetu ua ku lutue ni?
Vavengi ve ku singanieka nguavo, linga va ka yoye vuino ku lutue, va na pande ku lilongesa mua kama na ku tonda vupite. Vika via solokela vamo va linga cihangula caco?