1-3. Vika halumo via lingisile Yondia na Sintike ku hona ku litavasiana? Vati via huile vitanga viaco? (Talenu cikupulo ca ku vuputukilo)

TUA HAKA seho ku Mbimbiliya muomu tua tantekeya ngecize ya pua Livulu lia Njambi. Mbimbiliya ya kala na vimamuna vi hasa ku tu ohiela ku visoti, kaha i hasa ku tu sungamesa nga tu vulumuna. Vuno vati tue ku muenamo vimamuna vi li mo? Aci singaniekenu ha viuma via lingikile na vampuevo va ku vuavesa va ku sekulu ya ku livanga, Yondia na Sintike. Mbimbiliya nguayo va lizungile, vunoni ka ya muesele omo lia vika. Tu ci hilulenuho kavundende.

² Halumo Yondia ua laniene vamo vamuanaye va ka lile ku ndzivo yeni. Vunoni ka laniene Sintike. Ntsimbu ikuavo, omo Sintike uevuile vakuavo va simutuila ha ku tovala ca viakulia vize, ikeye ua nienguele. Halumo ua singaniekele: ‘Omo lia vika Yondia ka nji laniene! Nja singaniekele nguange tua pua vavusamba va cili.’ Sintike ua singaniekele ngueni Yondia ka mu hakele seho na ku mu viana. Ngeci Sintike neni ua lania naua vantu vaco va ka lie vunoni ka laniene Yondia! Mua vusunga vakuavo omo vevuile vitanga evi mu cikungulukilo ka va livuile mua cili. Mbimbiliya ya muesa ngecize Paulu ua handekelele ava vampuevo na ku va leka linga va lihambe. Ci moneka ngue va mu halakanene ngeci va tualeleho ku pangela Yehova na ndzolela.​—Filipu 4:2, 3

³ Na lelo lino mu vikungulukilo vietu, vintsimbu vimo mu hasa ku soloka vitanga ha kati ketu na umo muanetu ni ndumbuetu. Vunoni nga tu kava vimamuna via mu Mbimbiliya tu hasa ku manusula vitanga viaco. Mua vusunga, ci tava tu viane vitanga viaco. Kaha nga tu ononoka vi ya handeka Mbimbiliya, tu ka muesa ngecize tua haka seho ku Livulu lia Yehova.​—Visamo 27:11

4, 5. Vimamuna vika ya tu hana Mbimbiliya ku tuala ha ku niunga vutenu vuetu?

⁴ Kati ca casi ku niunga vutenu vuetu. Halumo tu hasa ku ivua vusiua ni ku tenuka nga umo na tu handeka mezi a kasahuntu ni ku tu muesa vuhenge, halumo omo lia cisemua cetu, cifua ca cikanda cetu, ni cifua ci tue ku solokelamo. Kaha tue ku ivua ku vavala cikuma nga muntu a tu handeka mua ku pihia cikumakuma nga muanetu ni ndumbuetu ikeye na tu lingimo. Vimamuna vika tu uana mu Lizi lia Njambi vi hasa ku tu kuasa?

⁵ Yehova a tantekeya vika vi hasa ku soloka nga vantu ka va niungu vutenu vuavo. Nga tu sisua ni ku tenuka, tu hasa ku handeka ni ku linga vimo vi ka tu lingisa ku liveya. Mu Mbimbiliya, Yehova ue ku tu longesa ku niunga vutenu vuetu ngeci ua handeka ngueni: “Kati u zangule mu cimbembesi cove mu ku tenuka.” Aci singaniekenu ha visoti vingahi tu hasa ku lihenga nga tu ononoka eci cimamuna mu ku likela ku tenuka vuasi-vuasi! (Tandenu Ekelesiaste 7:9; Visimo 16:32.) Mbimbiliya ya tu mamuna naua nguayo tua pande ku pua na ku ecela vakuetu. Mua vusunga, Yesu ngueni nga ka tu ecela vakuetu, na Yehova ka ka tu ecela. (Mateo 6:14, 15) Vuno mu tondeka ku pua vakua lukakatela na ku kala na cizango ca ku ecela vakuenu ni?

6. Vika vi hasa ku lingika nga ka tu niungu vutenu vuetu?

⁶ Nga ka tu niungu vutenu vuetu, tu hasa ku sisua na ku putuka ku ivua ngue na umo ua tu lema uahi. Halumo tu hasa ku sampuisako vamo mu cikungulukilo ku kala na vifua viaco. Ambe nga tu seteka ku zika-zika vutenu vuetu na indzi yetu, vakuetu va ka mona vati tue ku livua. Kaha vamuanetu va hasa ku lihangununa netu. (Visimo 26:24-26) Vakuluntu va cikungulukilo va ka pangesa Mbimbiliya mu ku tu kuasa ku seza vutenu na indzi linga tu ka konekele vakuetu. (Levitiku 19:17, 18; Loma 3:11-18) Nga va lingamo, vuno tu ka tava vimamuna via mu Livulu lia Yehova ni?

7, 8. (a) Vati Yehova ue ku tuamenena vangamba veni? (b) Vimamuna vika tu hasa ku uana mu Mbimbiliya, kaha omo lia vika tua pande ku vi ononoka?

⁷ Yehova a li na ku tuamenena vaze va li ku mutamba ua ha mavu ua lukungulukilo lueni na ku va longesa. Vati ue ku lingamo? Ua hangula Kilistu linga a pue “mutue ua mbunga,” kaha Kilistu ua hangula “mukuamanda ua cili mukua mana” a longese na ku sungamesa vangamba va Njambi. (Efeso 5:23; Mateo 24:45-47) Ngeci mua civunga ca vantuamena ca ku sekulu ya ku livanga, ou mukuamanda ua haka seho ku Mbimbiliya muomu ya pua Lizi lia Njambi. (Tandenu 1 Tesalonika 2:13.) Vimamuna vika tu hasa ku uana mu Mbimbiliya?

⁸ Mbimbiliya ya tu mamuna nguayo tua pande ku pua na ku likungulula. (VaHevelu 10:24, 25) Ce ku kaniamesa vose mu ku tava vilongesa vimo lika via mu Mbimbiliya. (1 Kolintu 1:10) Ce ku tu leka naua ku tuameka “vuangana vua Njambi.” (Mateo 6:33) Mbimbiliya ye ku tu longesa ku ambuluila ku ndzivo ku ndzivo, ku mbunga, na kuose ku va li vantu. (Mateo 28:19, 20; Vilinga 5:42; 17:17; 20:20) Ye ku mamuna vakuluntu linga va lelese cikungulukilo. (1 Kolintu 5:1-5, 13; 1 Timoteo 5:19-21) Kaha ye ku tu leka nguayo tua pande ku lelesa mivila yetu na ku viana visinganieka na vilinga via zinda Yehova.​—2 Kolintu 7:1

10. Vati livulu lia Ezekiele lia muesa mutamba ua muilu ua lukungulukilo lua Yehova?

¹⁰ Ku hitila mu Mbimbiliya, tu lilongesa ngecize vangamba va Yehova muilu navo va likungulula. Ca ku muenako, Ezekiele ua muene mu cimona likalu lia kele na ku enda kaha liendele kuose oku ku a tondele Yehova ku endela. (Ezekiele 1:4-28) Liendelo liaco liemanena mutamba ua muilu ua lukungulukilo lua Njambi, li li na vuasi vua kuenda muze mu a tonda ikeye. Kaha, mukemuo naua mo u li na ku lingilamo mutamba ua lukungulukilo lua Yehova ha mavu. Aci singaniekenu ha viuma via vingi vi na aluluka mu lukungulukilo lua Njambi ku likumi lia miaka i na hiti ngeci. Vulukenu ngecize Yehova ikeye ue ku endesa ku aluluka kuaco. Vuovuno Kilistu na tungelo va ka nongesa ano mavu a api. Kaha na umo uahi naua a ka sahula Yehova na lizina lieni ni ku paya cifua ceni ca ku sika!

via mukua manda ua cili ni?’

11, 12. Vika lukungulukilo lua Yehova lu na hasa ku linga ku matangua ano a ku kotokela?

¹¹ Tu ci simutuilenu ha vimo vi na hasa ku linga lukungulukilo lua Yehova ku matangu ano a ku kotokela. Ku tunga. Vihita na vihita via vamuanetu va lihanene mu ku tunga na ngolo yose cikota ca ciha ca kama ca Vakaleho va Yehova mu mavu ose ku Warwick, ku Nova Yorke, Estados Unidos. Ku li makulukazi a vamuanetu ve ku lihana ku cizango mu mavu ose va li na ku tunga Vindzivo via Vuangana ni viMbetele. Ava vamuanetu ve ku va tuamenena ku Seketa ye ku tala via ku Tunga mu mavu ose. Ce ku tu vuisa ndzolela ya kama ku kapandi ka ve ku lihakela! Kaha vangamba va Yehova kuose oko ku va kala ve ku linga cose mu ku kuasa ku fuetela vihela via ku vi tungila. Yehova ue ku vezikisa vangamba veni omo lia ku likehesa na ku konkama ci ve ku muesa.​—Luka 21:1-4.

¹² Ku longesa. Yehova ua lema ku longesa vantu veni. (Isaya 2:2, 3) Singaniekenu ha visikola via vingi vi tu li navio. Kua kala Sikola ya vu Pioneiru, Sikola ya Vakua ku Ambulula Vuangana, Sikola ya Ngileande, Sikola ya Vavaha ha Mbetele, Sikola ya Tuniungi va ku Zinguluka na Vampuevo Vavo, Sikola ya Vakuluntu va Vikungulukilo, Sikola ya Vipanga via Vuangana, na Sikola ya Vantuamena va Mbetele na Vampuevo Vavo. Na mu site yetu, jw.org, tu hasa ku uanamo Mbimbiliya na mavulu akuavo mu makulukazi a malimi. Mua kala naua mitamba ya ku lifuila ya vanike na vavusoko kaha naua na mutamba mua kala viuma vi na tuhuka vuvuno. Vuno nenu mue ku pangesa jw.org mu ku ambulula cenu na mu ku lemesa cenu mu vusoko ni?

13. Citeli cika va kala naco vangamba va Yehova?

¹³ Ca pua ku vezika ca kama ku kala ku mutamba ua lukungulukilo lua Yehova na ku tantekeya vi a tonda kuli etu! Mua vusunga, mu ku linga tua tantekeya vika via lema Njambi, tu li na citeli ca ku mu ononoka na ku linga evi via viuka. Kaha vutuhu vavengi va lema ku linga viuma via ku pihia, etu tua pande ku ‘zinda vupi’ ngue mua vu zinda Yehova. (Visamo 97:10) Ka tua pandele ku pua ngeci mua vaze ve ku singanieka “nguavo vipi via viuka.” (Isaya 5:20) Tu tonda ku vuisa Yehova ndzolela, ngeci ve ku tu vuluisa ngecize tu pue va ku lela mu viose. (1 Kolintu 6:9-11) Ci ka pua ca cili kuli etu nga tu ononoka ku viuma vie ku tu leka Yehova mu Mbimbiliya. Tua lema Yehova kaha tu tonda ku pua vakua vusunga kuli ikeye. Ngeci tue ku niunga vimamuna vieni cipue nga tu li ku ndzivo, mu cikungulukilo, ku sikola, ku vipanga, ni kuose oko ku tua kala. (Visimo 15:3) Singaniekenu mu vinjila vimo vi tu hasa ku pua vakua vusunga kuli Njambi.

14. Vati visemi va hasa ku pua vakua vusunga kuli Yehova?

¹⁴ Mua ku lelela vana. Mu Mbimbiliya, Yehova ua hana vimamuna ku visemi ku tuala ha ku longesa vana vavo. Vakua Kilistu va pande ku zangama linga kati va lifuise na visinganieka via tsimana mu mavu ano. (Efeso 2:2) Ca ku muenako, ku vihela vimo cisemi ua yala halumo a hasa ku singanieka, ngecize ‘Kuno, mpuevo ikeye ue ku longesa vana.’ Vunoni Mbimbiliya nguayo, cisemi ua yala ikeye na pande longesa vana via Yehova. (Efeso 6:4) Visemi va lema Yehova va tonda vana vavo va kale na vusamba vua cili neni, ngue vuze vua kele navuo Samuele mua puile kanike.​—1 Samuele 3:19

15. Vati tu hasa ku pua vakua vusunga kuli Yehova omo tu linga vihangula via kama?

¹⁵ Mua ku lingila vihangula. Ntsimbu kanda tu linge vihangula via kama mu muono, tua pande ku nongonona vika vie ku singanieka Yehova linga tu pue va vusunga kuli ikeye. Tu hasa ku uana vukuasi mu Mbimbiliya na mu lukungulukilo lueni. Ca ku muenako, matangua ano vamo visemi va nungulukila ku vifuti vieka mu ku linga mingoso va tuma vana vavo vavandende ku cifuti ci va tunda linga va ka kale na va vusoko vuavo. Ku lingamo ca va kuasele ku tualelelaho ku panga linga va nganiale vimbongo. Eyo, eci ca pua cihangula ca muntu ku muntu, vunoni yala na mpuevo va pande ku lihula, ‘Vika Yehova a ka singanieka ku tuala ha cihangula ci tu na lingi?’ (Tandenu Loma 14:12.) Ca pua ku zangama ku singanieka ha vika Mbimbiliya ya handeka ntsimbu kanda tu ci linge cihangula ca kama ku tuala ha vusoko vuetu na vipanga vietu. Tu tondeka vukuasi vua Tatetu muomu ka tu hasa ku liinikila vinanga vietu vavene.​—Yelemiya 10:23.

16. Vika ua lingile umo cisemi ua mpuevo, mua semene muneni? Vika via mu kuasele ku linga cihangula ca cili?

¹⁶ Kua kele umo yala na mpueyeni va nungulukile ku cifuti ceka, kaha mu nima yaco mpuevo ua semene kakeke ua yala, kaha va tondele ku mu tuma kuimbo ku cifuti ci va tundilile linga a ka kale na va kukueni. Vunoni ku ntsimbu yaco ize, mpuevo ua putuka ku lilongesa Mbimbiliya na umo Mukaleho ua Yehova. Ua lilongesele ngecize ku longesa muaneni via Yehova ca puile citeli ceni ivene. (Visamo 127:3; Visimo 22:6) Uze muana mpuevo ua vundilile kuli Yehova, ngue mu ya tu leka Mbimbiliya, kaha ua mu lambelelele linga a mu kuase ku linga evi via viuka. (Visamo 62:7, 8) Ikeye naua ua simutuile na ndumbuetu ua kele na ku mu longesa Mbimbiliya ku tuala ha visoti vieni kaha ua simutuile naua na vakuavo mu cikungulukilo. Vutuhu vavusoko na vavusamba veni va mu sindiyile linga a tume muana kuli va kukueni, vunoni ua muene ngecize ku lingamo kati ca cili. Yalieni ua muene vati vamuanetu va kuasele mpueyeni na munavo. Ikeye ua komokele cikuma ngeci ua putukile ku lilongesa Mbimbiliya na ku kunguluka hamo na vusoko vueni. Aci singaniekenu ha ndzolela ya vuile uze cisemi ua mpuevo mu ku nongonona ngecize Yehova ua kumbuluile vivundilo vieni!

17. Nga tu li na ku longesa Mbimbiliya na umo, cimamuna cika tua pande ku kava?

¹⁷ Vati tue ku kava vimamuna. Nga tua pua vakua vusunga kuli Njambi, tu ka kava vimamuna vi tue ku tambula mu lukungulukilo lueni. Ca ku muenako, tu ci simutuilenu ha vika tua pande ku linga mu nima ya ku longesa umo mu livulu Vika Mpundu Vi I Longesa Mbimbiliya? Ve ku tu leka nguavo tua pande ku kala na kantsimbu kamo mu nima ya nkala cilongea linga tu kuase uze muntu i tue ku longesa ku tantekeya mua cili ku tuala ha lukungulukilo lua Yehova. Tu hasa ku pangesa video Vika vie ku Hita mu Ndzivo ya Vuangana? ni brochura Veya va li na ku Linga Cizango ca Yehova Lelo? Mu nima ya ku lilongesa mu vutuntu livulu Mbimbilia i Longesa, tu hasa ku mu kuasa linga a ‘kolese mu ku-tsiliela’ mu ku lilongesa livulu “Kalenu mu Cilemo ca Njambi” ambe nga ua ku mbatiza. (Kolose 2:7) Vuno mue ku kava eci cimamuna ca mu lukungulukilo lua Yehova ni?

18, 19. Vusunga vuka vu tu lingisa ku santsela kuli Yehova?

¹⁸ Kua kala vusunga vua vuingi vu muesa omo lia vika tua pande ku santsela kuli Yehova! Ca ku livanga, “muli ikeye tu yoya.” (Vilinga 17:27, 28) Ikeye naua ua tu hana Livulu lieni, Mbimbiliya. Ngeci mua vaze Vakua Kilistu ku Tesalonika, netu tua pande ku i haka seho muomu ya pua muzimbu ua tunda kuli ikeye.​—1 Tesalonika 2:13.

¹⁹ Mbimbiliya ye ku tu kuasa ku suena muhiehi na Yehova, neni ue ku suena muhiehi netu. (Tiango 4:8) Tue ku santsela cikuma kuli Yehova muomu ikeye ua tu lania linga tu pue mutamba ua lukungulukilo lueni! Tue ku livua ngeci mua mukua visamo ua sonekele ngueni: “Santselenu kuli Yehova; muomu ikeye ua viuka; muomu ngozi yeni i kala ku miaka yose.” (Visamo 136:1) Mu vinimbu viose via samo eyi, mukua ku soneka visamo ua hilukilemo lua luingi mu ku handeka ngueni “Ngozi yeni i kala ku miaka yose.” Nga tua pua vakua vusunga kuli Yehova na ku kava vimamuna vie ku tu hana ku hitila mu lukungulukilo lueni, a ka tu hana muono ka ue ku hua na ku tu vezikisa miaka yose ya yaye!