Vantu vavengi ve ku handeka nguavo, ka tu hasa ku tantekeya cipue kavundende via muilu muomu uahi ua ileko. Vunoni visinganieka viaco kati via vusunga. Omo lia vika? Muomu Yesu Kilistu ua yoyele muilu na muvila ua sipilitu ntsimbu tele kanda eze ha mavu. Ua lekele vakuluntu va malombelo va ku sekulu ya ku livanga ngueni: “Nja fumine muilu kati mu ku linga cizango cange, vunoni ngecize nji ka linge cizango ca uze ua nji tumine.” Mua vusunga Yesu ua handekele muzimbu ua vusunga mua lekele vapostolo veni ngueni: “Mu ndzivo ya Tata mua kala vikalo via vingi.”​—Yoano 6:38; 14:2.

Ise ya Yesu ua pua Njambi kaha lizina lieni Yehova kaha “ndzivo” ya Yehova ya kala muilu. (Visamo 83:18) Ngeci mukemuo, ka kuesi ueka a hasa ku lombolola vuino via muilu ku hiana Yehova Njambi na Yesu Kilistu. Vakevo va sololuele viuma via vingi ku tuala ha vaze va kala muilu ku hitila mu vimona vi va muesele vamala va vuoloke.

Cimpande ci na hatako ci ka muesa imo mizimbu ya mu Mbimbiliya ya lombolola vimona vi va muene vantu. Omo mu tanda vimona viaco vulukenu ngecize mu melu ka mua kele cuma, ci tu hasa ku kuata na mavoko ni ku ci mona na meso. Ngeci mukemuo Njambi ua hangula ku tu lombololuela viose mu ku pangesa viuma vize vi tu hasa ku ivuisisa vuino, muomu nga ua vi lomboluele na mezi a sipilitu nga ka tu vi ivuisisa. Evi vimona viaco vi ka mi kuasa ku tantekeya veya va kala mu melu “mua kala vikalo via vingi.”