“Va na tumbika citumamo ca vuangana muilu, kaha umo ua tumamene ku citumamo; na uze ua tumameneko mu ku mu tala ua lifuile na livue lia yasepe na ngue salendoniu: na nkongolo ua zingilikile citumamo, mu ku mu tala ua lifuile na esemianda.”​—Ku-Solola 4:2, 3.

“Ceke ca mu zingilikile. Ngue cifua ca nkongolo a li ku liselua ku litangua lia ku noka mema, mu ca fuile cifua ca ceke ca zingilikileko. Eci cikeco cifua ca ciseteko ca vumpahu vua Yehova.”​—Ezekiele 1:27, 28.

Evi vimona, vi va muesele kuli kapostolo Yoano na kuli kapolofeto Ezekiele, via soluele vumpahu vua Njambi Mukua ku Hiana Viose, Yehova, mu viuma vi tu hasa ku mona​—mavue a cili a ku tezimina, nkongolo, na citumamo ca vumuene. Vi tu lekesa ngecize vukalo vua Yehova vua pua vua ku vuaha, na vukameso, na vumpahu.

Ku solola Njambi mu cifua oco ca litombola na mezi a mukua visamo uze ua sonekele ngueni: “Muomu ua kama Yehova ua ku sangaziala cikumakuma: ua ku vuila vuoma mu ku hiana vanjambi vose. Muomu vanjambi vose va vantu vakevo tumponia; vunoni Yehova ua tangele melu. Kasingimiko na vukama vu li ku meso eni.”​—Visamo 96:4-6.

Vutuhu Yehova ua pua Mukua ku Hiana Viose, kasi ue ku tu lania linga tu mu suene mu hiehi ku hitila mu civundilo kaha naua ua tu kulahesa ngueni a ka tu ivua. (Visamo 65:2) Njambi ua tu lema cikuma kaha ue ku tu niunga, ngeci kapostolo Yoano ua handekele vusunga mua sonekele ngueni: “Njambi ikeye cilemo.”​—1 Yoano 4:8.

“[Ndongesi Mukua Kilistu Setefanu] ua sulile na sipilitu santu, ua talele muilu ntoma, kaha ua muene vumpahu vua Njambi, na Yesu na mana ku livoko lia cilio lia Njambi, kaha ua handekele, ngueni, Talenu nja mono lilu lia sokoloka, na Muana muntu na mana ku livoko lia cilio lia Njambi.”​—Vilinga 7:55, 56.

Omo Setefanu ua muene eci cimona mua hitile ntsimbu ya indende lika tunde haze ha va songangeyelele ku tsihia Yesu. Vunoni vaze vakuluntu va handekele Setefanu tele kanda a ci mone eci cimona vakevo va tsihile Yesu​—vakuluntu va vaYundeya. Cimona caco ca soluele ngecize Yesu ua sangukile kaha ua tambuile kasingimiko. Kapostolo Paulu ua sonekele ku tuala ha cimpande eci, ngueni: “[Yehova] na mu sanguile [Yesu] ku vatsi, kaha mua mu tumbikile muilu ku cilio ceni, kuze a hiana ku ku-sika cose, na mpoko yose, na vukama vuose, na vuangana vuose, na lizina liose li va tumbula, kati ku ntsimbu ino lika cahi, vunoni na ize i keza.”​—Efeso 1:20, 21.

Mu ku muesa ha citeli ca kama ca Yesu, Visoneka nguavio Yesu ue ku niunga vantu ngue mue ku lingilamo Yehova. Mu kuenda ca cipanga ceni ha mavu, Yesu kanguile vavezi na vakua ku vavala, na ku sangula vatsi. Nkombelo yeni, ya muesa cilemo ceni kuli Njambi na vantu. (Efeso 2:4, 5) Mu ku linga Yesu nemana ku livoko lia cilio lia Njambi, vuovuno Yesu a ka pangesa mpoko yeni na ku vezikisa vose ve ku mu ononoka kuose oko ku va kala.

“Nja talele noho Va tumbikile vitumamo, Na umo ua kele fume ku ntsenkulu [Yehova] ua tumameneho. . . .Makulukazi a makulukazi a mu pangelele Na likumi lia makulukazi lia ku kulisa va mene ku meso eni.”​—Ndaniel 7:9, 10.

Omo Ndaniele ua muene muilu ku hitila mu cimona, ka muene lika kangelo umo vunoni makulukazi a tungelo. Mua vusunga ca puile cimona ca ku komouesa cikuma! Tungelo va pua vantu va mivila ya sipilitu va kala na ndzili kaha va hiana ku mana. Kua kala vivunga via vaselumbini na va selafini. Tungelo va va tumbula lua luingi mu Mbimbililiya ku hiana 250.

Tungelo ka va puile vantu va yoyele laza ha mavu houe. Njambi ua tangele tungelo ntsimbu tele kanda a tange vantu. Njambi mua tangele mavu, na tungelo va mueneko kaha va tambekele na ndzolela.​—Yombi 38:4-7.

Tungelo ve ku ononoka Njambi va li na ku kuatesa mu cipanga ca seho ya kama ha mavu lelo lino​—cipanga ca ku ambulula muzimbu ua cili ua Vuangana vua Njambi. (Mateo 24:14) Kapostolo Yoano ua muene ku hitila mu cimona tungelo va kuatesa mu cipanga ca ku ambulula, ua sonekele ngueni: “Kaha nja muene kangelo ueka ua ku pulula ha kati ka lilu, ikeye ua kele na zimpande zia cili ka zie ku hua zia yaye zia ku zimbuila vaze va kala hano ha mavu, na vifuti viose, na miyati yose na malimi ose na vantu vose.” (Ku-Solola 14:6) Vutuhu tungelo ka ve ku handeka na vantu lelo lino ku laza va kele na ku handeka, ve ku tuamenena vaze va li mu cipanga ca ku ambulula ku vantu va mitima ya cili.

“Kaha muilu mua kele ndzita: Mingeli [Yesu Kilistu] na tungelo veni va ile mu ku lua ndzita na mukisi; kaha mukisi na tungelo veni va luile ndzita; Kaha ka va vulile, cipue muhela uavo, ua muilu untsa ka va uanene naua. Kaha va mbilile mukisi uze ua kama, ikeye linoka uze ua laza uze i va luka Ndiavu na Satana, mukua ku onga mavu ose; va mu mbilile ha mavu na tungelo veni va va mbilile hamo neni.”​—Ku-Solola 12:7-9.

Muilu laza tele ka mua kele ciyulo. Ku vuputukilo vua ku yoya ca vantu, kua kele umo kangelo ua kele na cizango ca ku mu lemesa ngeci ua alulukilile Yehova na ku pua Satana, lia lomboloka “Mukua Nkole.” Kaha mu ku hita ca ntsimbu vamo tungelo va lipandakanenene kuli ikeye va pua honi vandemone. Vandemone vaco va alulukila Yehova kaha va lingisa vantu vavengi ku viana ku tuamenena ca Yehova ca cilemo.

Satana na vandemone veni va pua vikenia va kama. Mueka va zinda vantu, kaha vakevo ve ku vueza ku tuyando tua tuingi ha mavu. Ca ku muenako, Satana ua tsihile vimuna va Yombi na vangamba veni. Ku tundoho, ua tsihile naua vana va Yombi va ku pua likumi. Satana ua nehele “luhundzi lua kama” lua sihuile ndzivo mua kele vaze vana va Yombi. Satana ua vetele Yombi na “mahote a api cikuma fume ku ciliatelo ca ciliato ceni na ku heta ku mbanda mutue.”​—Yombi 1:7-19; 2:7.

Vunoni vuovuno Satana va ka mu nongesa. Tunde ha va mu sekuile mu hiehi na mavu, ua tantekeya ngecize ali na “kantsimbu lika.” (Ku-Solola 12:12) Satana na paye, mua vusunga ou muzimbu ua cili!

‘Yove [Yesu] ua landelele Njambi na maninga ove Vantu va ku miyati yose, na malimi ose na vantu vose, na vifuti viose, Kaha ua va puisile kuli Njambi yetu vuangana na vasasendote: Kaha va suana ha mavu.’​—Ku-Solola 5:9, 10.

Mu ku linga Yesu ua sangukile ha mavu ku ka yoyela muilu, kua kele naua vakuavo ve ku lingilemo. Yesu ua sikile vapostolo va mu ononokele ngueni: “Nji ya mu ku mi viukisila muhela. Kaha . . . nji ku iza naua kaha nji ka mi tambula kuli ange ivene; linga oko ku nji li ange, nenu naua ku mu ka kala.”​—Yoano 14:2, 3.

Vaze va ka ya muilu ku li vimo vi va ka linga. Va ka tunga Vuangana ni nguvulu i ka sika mavu ose na ku neha vivezikiso ku vose. Ovu Vuangana vuaco vukevuo vuze vua longesele Yesu vandongesi ngueni va pue na ku vundila: ‘Tatetu u li muilu va lelese lizina liove. Vuangana vuove vu ize. Cizango cove va ci linge, Ngue muilu, ngecize ha mavu.’​—Mateo 6:9, 10.

“Kaha nja [kapostolo Yoano] vuile lizi lia kama-kama lia ku citumamo ca vuangana ku handeka, ngualio, Talenu, tembele ya Njambi i li hamo na vantu, . . . Kaha a ka hunda masozi ose ku meso avo; na ku-tsa ka ci ka kala naua; cipue ku-linienga na vusiua ka ci ka kala naua, cipue ku lila, cipue ku vavala viuma via ku livanga vi na hiti.’”​—Ku-Solola 21:3, 4.

Eci cimona ca muesele vi vu ka linga Vuangana vua Njambi, vuze vu va tunga Yesu na vaze va ka sanguka, vuka nongesa vuangana vua Satana na ku puisa mavu citungu. Viuma vie ku neha visoti ku vantu na tuyando ka vi ka kalako naua. Na ku-tsa vene ka ci ka kalako naua.

Amba co vaze makulukazi a vantu va ka sanguka linga va ka yoyele ha mavu? Ku lutue lua ntsimbu, va ka va vuahesa linga va ka ka yoye miaka yose ya ya ye mu Citungu ha mavu.​—Luka 23:43.