1, 2. Vati Yehova ue ku tu muesa vuhuanga?

YEHOVA ua pua Njambi mukua vuhuanga. Viose vi tu li navio ikeye ua tu hanavio. Vupite vuose vua ha mavu vua pua vueni, kaha ue ku vu pangesa mu ku kuasa viose vi li na muono. (Visamo 104:13-15; Hangai 2:8) Mu Mbimbiliya mua kala mizimbu ya muesa vati Yehova ua pangesele viuma viaco ku hitila mu vikomoueso mu ku kuasa vantu veni.

² Ca ku muenako, Yehova ua hanene manna na mema ku vaIsaleli vose mu va kele mu vindinda mu miaka 40. (Ezundu 16:35) Mu ku lingamo, vaIsaleli va kele na viose via va kambelele. (Nehemiya 9:20, 21) Mu ntsimbu ikuavo, Yehova ua hanene ngolo kuli kapolofeto Elisa linga a vueze ku tumazi tua tundende tua umo ntuluue. Ovu vuana vua kuli Njambi vua kuasele uze mpuevo ku manusula ku fueta makongo eni, kaha kasi ua kele na vimbongo via vingi via lisukile navio na vana veni. (2 Vamiangana 4:1-7) Kaha na ngolo ya Yehova, Yesu ua lingile vikomoueso mu ku hana via-ku-lia ku vantu va vengi kaha na vimbongo ha ntsimbu i via tondekele.—Mateo 15:35-38; 17:27.

3. Vika tu lilongesa mu cilongesa cino?

 ³ Yehova a hasa ku pangesa viose ovio linga a kuase viuma via tanga. Ambe ngoco, kasi ue ku lania vangamba veni linga va hane vuana ku liya na vuhasi vuavo, mu ku kuatesa lukungulukilo lueni. (Ezundu 36:3-7; tandenu Visimo 3:9.) Omo lia vika honi Yehova ua lavelela tu mu hiluisile vupite vu tua kala navuo? Vati vangamba va Yehova va ku laza va kuatesele ku vipanga vieni? Vati lukungulukilo lue ku pangesa milambu lelo lino? Tu kevua vikumbululo ku vihula evi mu cilongesa cino.

4. Nga tu kuasa ku vipanga via Yehova vika tu li na ku mu muesa?

⁴ Tue ku hana viuma kuli Yehova muomu tua mu lema cikuma. Nga tu hilula ha viose via tu lingila Yehova, mua vusunga mitima yetu ye ku tu sindiya ku lingako mumo. Muangana Ndaviti neni ua livuile ngoco mua handekele ha viuma via tondekele mu ku tunga tembele. Ndaviti ua ambele ngueni viose vi tua kala navio via tunda kuli Yehova kaha viose vi tue ku hana Yehova via pua vize via tu hana laza ikeye.—Tandenu 1 Mizimbu 29:11-14.

5. Vati Mbimbiliya ya tu longesa ngecize ku hana na mutima uose ca pua mutamba ua ku lemesa ca vusunga?

⁵ Cikuavo naua, tue ku hana Yehova muomu nayo ya pua imo ya vinjila vi tue ku mu lemeselamo. Kapostolo Yoano, mu cimona ua vuile tungelo va Yehova muilu, vemba nguavo: “Yove ua viuka, Muangana uetu na Njambi yetu, ku tambula ku-sangaziala na kasingimiko na ngolo: Muomu yove ua tangele viuma viose, nomo cizango cove via puile, va vi tangele.” (Ku-Solola 4:11) Mua vusunga, Yehova ikeye ua fuila ku tambula kasingimiko kose na vumpahu, ngeci tua pande ku mu hana viuma via seho ya kama vi tua kala navio. Ku hitila muli Mosesa, Yehova ua lekele muyati uose ua Isaleli va pue na ku linga viuano vitatu mu muaka. Ku viuano viaco, ku hana vimo kuli Yehova naco ca puile mutamba ua ku lemesa cavo. Vose va va lekele nguavo ka va pandele ku “soloka ku meso a Yehova mavokovoko.” (Ndeutelonomi 16:16) Na lelo lino vene, ku hana na mutima uose ca pua mutamba ua ku lemesa cetu. Mu njila eyi, tue ku muesa ngecize tua haka seho ku lukungulukilo lua Yehova kaha tue ku kuatesa ku vipanga vieni.

6. Seho ika ya kala ha ku hana? (Talenu cikupulo ca ku vuputukilo.)

⁶ Ca pua ca cili kuli etu ku pua vihuanga, kati lika ku tambula. (Tandenu Visimo 29:21.) Singaniekenu kanike ue ku tambuola tumo tumbongo ku visemi veni, kaha a nonaho vimo a landela visemi veni vumo vuana. Vati visemi va kevua ku mitima mu ku vu mona? Ni co, aci singaniekenu mukuendze ua pua pioneiro a hana vimo vimbongo ku visemi mu ku va kuasa ku landa via-ku-lia ni vimo via tondeka mu ndzivo. Halumo visemi ka va lavelele nguavo vikevio via linga, vunoni va tava vuana vuaco. Omo lia vika? Muomu eyi ya pua njila i a li na ku mueselamo ku santsela ceni ku viose vi ve ku mu lingila visemi.  Na vuno vene, Yehova ua tantekeya ngecize ca pua ca cili ku hana vimo via seho ya kama vi tua kala navio.

7, 8. Lungano luka va muesa vangamba va Yehova mu va hanene milambu (a) ya ku kuasa mpundu ku cimo cipanga? (b) ya ku kuasa ku nkala vipanga vikuavo via Yehova?

⁷ Mu Mbimbiliya mua kala mizimbu ya muesa ngecize vangamba va Yehova va kele na ku hana milambu mu ku kuatesa ku cipanga ceni. Hamo hamo va kele na ku hana mu ku kuasa mpundu cimo cipanga ca tondekele. Ca ku muenako, Mosesa ua mamuine vaIsaleli linga va hane milambu mu ku kuasa ku cipanga ca ku tunga tavenakulu. Mu nima ya ntsimbu, Muangana Ndaviti neni mukemuo vene mua lingile mu ku tunga tembele. (Ezundu 35:5; 1 Mizimbu 29:5-9) Mu ku sika ca Muangana Yehoase, vasasendote va pangesele milambu ya vimbongo vi va hanene vantu mu ku tungulula tembele. (2 Vamiangana 12:4, 5) Ku sekulu ya ku livanga, Vakua Kilistu mu va vuile nguavo mu Yundeya mu li ndzala kaha vamuanaye va tondekele vukuasi, muntu ku muntu ua hanene vuana ku liya na vuhasi vueni, linga vu ka kuase vamuanaye va kele kuimbo liaco.—Vilinga 11:27-30.

⁸ Vangamba va Yehova navo va hanene milambu ya vimbongo mu ku kuasa vaze va kele na ku tuamenena cipanga ceni. Ca ku muenako, ku liya na Masiko a Mosesa, vaLevi ka va kele na vusuana na vumo vuahi. Ngeci mukemuo miyati ikuavo ya mu Isaleli ya hanene kuli vaLevi cimo ku likumi lia viuma vi va kele navio. Eci ca kuasele vaLevi ku tuala lika mana ku vipanga via ku tavenakulu. (Numelu 18:21) Mukemuo naua mu va lingile vamo vampuevo vakua vuhuanga mu kuasa Yesu na vapostolo veni.—Luka 8:1-3.

9. Ku laza, kulihi ya kele na ku tunda milambu?

⁹ Milambu yaco ize ya tundilile kua kuingi. Citava vaze vaIsaleli va lambuile mu ku kuasa ku tunga tavenakulu va hanene viuma via cili vi va tundile navio ku Ingito. (Ezundu 3:21, 22; 35:22-24) Kaha ku sekulu ya ku livanga, vamo Vakua Kilistu va landesele vi va kele navio, ngeci mua mehia ni vindzivo, na ku tuala vimbongo viaco kuli vapostolo. Kaha vapostolo va vi pangesele mu ku kuasa vamuanaye va tondekele vukuasi. (Vilinga 4:34, 35) Vakua Kilistu vakuavo co va kele na ku tulika vimo vimbongo na ku vi lambula linga vi ka kuase ku cipanga ca ku ambulula. (1 Kolintu 16:2) Ngeci mukemuo, cipue mpite cikuma ni uze ua ku hutua cikuma, vose va hasele ku lambula vimo.—Luka 21:1-4.

10, 11. (a) Vati tu hasa ku tambuluisa vuhuanga vua vangamba va Yehova va ku laza? (b) Vati mue ku livua ku tuala ha ku kuasa cipanga ca Vuangana?

¹⁰ Matangua ano, citava lukungulukilo lu hasa ku tu mamuna ku lambula omo lia vumo vutumbe. Ca ku muenako, halumo cikungulukilo cenu ci tondeka ku tungulula Ndzivo ya Vuangana ni ku tunga imo ya iha. Ni vene  Mbetele ya mu cifuti cenu i tondeka ku i tungulula. Ni halumo tu li na vuhasi vua ku kuasa ku viuma via ndando vi ka tondeka ku cimo ciuano cetu ca muhato. Ni vamo vamuanetu va ku vihela vieka va tondeka vukuasi omo lia viyovo via mavu. Milambu yetu ye ku kuasa naua vamisionaliu, vapioneiro va ku lifuila, tuniungi va ku zinguluka, kaha na vaze ve ku pangela ku cikota cetu ca mu mavu ose na ku viMbetele. Kaha cikungulukilo cenu ci hasa naua ku tuma imo milambu i ka kuase ku ku tunga Vindzivo via Viuano ni vene Vindzivo via Vuangana via ku mitamba ikuavo ya mavu.

¹¹ Tu vose tu hasa ku hanako vimo mu ku kuatesa cipanga ci lu li na ku puisamo lukungulukilo lua Yehova kuno ku matangua a ku kotokela. Cingi ca milambu ka ye ku iza na mazina a vaze va na i hana. Mua vusunga mu tue ku haka vimbongo mu vikasa via milambu mu Ndzivo ya Vuangana ni ku hitila mu saiti jw.org, ka tue ku lekako na umo uahi cingahi tu na lambula. Vuno vati co nga mue ku singanieka nguenu milambu i mue ku hana ka ya kele na seho muomu ya indende cikuma? Tantekeyenu ngecize cingi ca milambu i lue ku tambula lukungulukilo ya pua ya indende-indende, kati ya kama houe. Ambe vamuanetu vaze ka vesi na vimbongo via vingi navo ve ku temunuina Vakua Kilistu va ku Masendonia. Vutuhu vuhutu vuavo vua puile vua “ku hiana cikumakuma,” vunoni va lambelele ku va tavesa navo va haneko milambu yavo, kaha va hanene na mutima uose.—2 Kolintu 8:1-4.

12. Kapandi kaka lue ku lihakela lukungulukilo ku tuala ha ku pangesa milambu?

¹² Vakua Civunga ca Vantuamena ve ku muesa vunongotima na ku silikinia ku tuala ha ku pangesa milambu. (Mateo 24:45) Vamuanetu va mu civunga caco ve ku vundila ntsimbu kanda va hangule vimo, kaha ve ku lihakela kapandi ka ku hilula na civando vati va pangesa milambu. (Luka 14:28) Ku laza, vamala va vuoloke vaze va kele na ku tala via milambu va lihakelele kapandi ka ku kala na vusunga ngecize milambu yaco va i pangesele lika mu vipanga via Yehova. Ca ku muenako, omo Ezela ua hilukile ku Yelusalema, ua ile na milambu ya yingi ya seho ya mu hanene muangana ua ku Pelesia, ngeci mua olu, palata, kaha na vupite vukuavo, viose via tuvakanene 100 ca makulukazi a viDolare, nga ku matangua ano. Ezela ua muene vuze vuana vuaco ku pua milambu i va hanene kuli Yehova. Ngeci ua mamuine vaze va i ambatele, va i niunge mua cili mu vifuti via vusonde vi va hitile, linga i ka hete mu vutuntu. (Ezela 8:24-34) Mu nima ya miaka ya yingi, kapostolo Paulu neni ua tambuile milambu ya vimbongo linga i ka kuase vamuanaye va kele mu vukalu. Ua lingile cose ngecize vaze va tualele vimbongo, va linge cipanga caco na “vusunga, kati ngue ku meso a Muangana lika, houe, vunoni na ku meso a vantu naua.” (Tandenu 2 Kolintu 8:18-21.) Na lelo lino vene, lukungulukilo lua Yehova lue ku tambuluisa Ezela na Paulu mu ku pangesa milambu na ku silikinia cose.

13. Omo lia vika lukungulukilo lu na alulula vimo viuma ku matangua ano?

¹³ Ca ku muenako, vusoko vu hasa ku lingako vimo mu ku alulula cifua ci ve ku pangeselamo vimbongo linga kati va vi sanduole ngoco. Ni halumo va hasa ku tonda vinjila via ku asiuisilamo muono uavo linga va hase ku vueza ku ntsimbu yavo mu ku pangela Yehova. Mukemuo mu lue ku linga na lukungulukilo lua Yehova. Matangua ano, mu lukungulukilo lua Yehova mu li vipanga via viha via vingi, kaha mu vintsimbu vimo, ce ku tondeka  ku pangesa vimbongo via vingi ku tuvakana vize vi lue ku tambula ku hitila mu milambu. Ngeci mukemuo, lukungulukilo lue ku tonda vinjila via ku asiuisilamo vipanga linga kati lu sanduole vimbongo via vingi, kaha lu hase ku puisamo viuma via vingi via cili na milambu i mue ku hana na mitima yenu yose.

14-16. (a) Vati lukungulukilo lue ku pangesa milambu yenu? (b) Vukuasi vuka mua tambula omo lievi vipanga viaco?

¹⁴ Cingi ca vaze va li mu vusunga miaka ya yingi ve ku handeka nguavo matangua ano tue ku tambula vuana vua vuingi ku lukungulukilo ku hiana laza. Lua sokolola visaiti jw.org na JW Broadcasting. Lua tuhula Mbimbiliya ya Tradução do Novo Mundo mu malimi a engi. Kaha mu 2014/2015, ciuano ca muhato ca mu mavu ose ca matangua atatu ca mutue “Continue a Buscar Primeiro o Reino,” ca hitilile mu mapela a kama cikuma a mu vimbonge via ku pua 14 via mu vifuti via ku liseza-seza. Uose ua ileko ua viukilile cikumakuma!

¹⁵ Va vengi ve ku santsela cikuma ku viuma vi lue ku tu hana lukungulukilo lua Yehova. Ca ku muenako, umo yala na mpueyeni va pangela ku Asia va sonekele nguavo: “Tue ku pangela mu kalimbo ka kandende. Ngeci vintsimbu vimo tue ku livua vulika, na ku suva vukama vua vipanga via Yehova. Vunoni mu tue ku tala viprograma viose via mu JW Broadcasting, tue ku vuluka ngecize nkuma netu tua pua mutamba ua civunga cose ca vamuanetu. Vamuanetu vose mueka va lema TV yetu JW Broadcasting. Lua luingi tue ku vevua va handeka nguavo mu nima ya ku tala viprograma via nkala ngonde, ve ku livua ngue va li mpundu mu hiehi na Vakua Civunga ca Vantuamena. Matangua ano ku pua mutamba ua lukungulukilo lua Yehova ce ku va vuisa ndzolela ya kama-kama.”

¹⁶ Mu mavu ose, va li na ku tunga ni ku tungulula Vindzivo via Vuangana via ku pua kampe 2.500. Vamuanetu va kala mu cimo cikungulukilo ca ku Honduras va handekele  nguavo ku kala na Ndzivo ya Vuangana ca puile ku lota lika, vunoni lelo lino va li na yavo mpundu. Vakevo va sonekele nguavo: “Ce ku tu vuisa ndzolela ya kama ku pua mutamba ua vuno vusoko vua Yehova, na ku kala mu civunga cose ca vamuanetu hano ha mavu.” Vamuanetu vakuavo navo ve ku santsela cikuma mu ve ku tambula Mbimbiliya na mikanda ikuavo mu malimi avo, mu ve tambula vukuasi ku vamuanaye nga va na hiti mu cimo ciyovo ca mavu, ni mu ve ku mona vantu va vengi veza mu vusunga omo lia cipanga ca ku ambuluila ha mbunga ci ve ku linga muimbo liavo.

17. Vika vie ku tu lingisa ku tava ngecize Yehova a li na ku tuamenena lukungulukilo lueni lelo lino?

¹⁷ Cingi ca vaze ka va puile Vakaleho va Yehova ka ve ku ivuisisa vati tue ku hasa ku linga viose evi mu ku pangesa lika milambu. Umo ntuamena ua imo empreza ya kama, ua ka menekele imo Mbetele kaha va mu lekesa limo lia makina eku tuhula mikanda yetu. Ua komokele cikuma mua muene ngecize vipanga viose ve ku vi linga ku vamuanetu va lihana ku cizango cavo, kaha ka tua kele na vivunga via mingoso, viose tue ku vi linga na milambu lika. Ngeci ua ambele ngueni ka citava ku linga viose vi tue ku linga mu ku tsiliela lika ha milambu. Cili vene! Netu tua tantekeya nguetu tue ku hasa lika ku puisamo evi vipanga, muomu Yehova ikeye a li na ku tu tuamenena.—Yombi 42:2.

18. (a) Vivezikiso vika tue ku tambula nga tu hana milambu mu ku kuasa Vuangana? (b) Vati tu hasa ku longesa vana vetu na vaze va vaha ku lingamo?

¹⁸ Yehova ue ku tu hana civezikiso ca ku kuatesa ku cipanga eci ca Vuangana. Kaha ua tu kulahesa ngueni nga tu lingamo, a ka tu vezikisa. (Malakiya 3:10) Yehova ua kulahesa ngueni nga tu pua vakua vuhuanga, viose vi tu linga vi kenda mua cili. (Tandenu Visimo 11:24, 25.) Ua tu leka naua ngueni nga tu pua vakua ku hana tu ka viukilila cikuma muomu, “ku-hana ca hiana ku tambula mu ku vezika.” (Vilinga 20:35) Ku hitila mu mezi na mu vilinga vietu, tu hasa ku longesa vana vetu na vaze va vaha mu cikungulukilo ngecize navo va hasa ku kuatesa ku cipanga eci kaha na ku tambula vivezikiso via vingi.

19. Vati cilongesa cino ci na mi kaniamesa?

¹⁹ Viose vi tua kala navio Yehova ua tu hanavio. Nga tu mu hiluisilavio, tu li na ku mu muesa ngecize tua mu lema kaha tua haka seho ku viose via tu lingila. (1 Mizimbu 29:17) VaIsaleli mu va hanene milambu yavo mu ku kuasa ku ku tunga tembele “va viukililile, omo va hanene na cizango, muomu na mutima ua ku tantuluka va hele na cizango kuli Yehova.” (1 Mizimbu 29:9) Netu cizango cetu nguetu tu tualelelenuho ku uana ndzolela na ku viukilila mu ku hiluisa kuli Yehova vize via tu hana.