1, 2. Mu 2018, ciuano cika ci ka kungulula vantu mu njila ya ku lifuila, kaha omo lia vika? (Talenu cikupulo ca ku vuputukilo.)

LIA 31 ya Março ya 2018, makulukazi a vantu mu mavu ose va ka ya ku ciuano ce ku lingika lumo lika mu muaka. Litangua liaco, mu nima ya ku lahuka ca litangua, Vakaleho va Yehova na mbunga ikuavo va ka likungulula mu ku vuluka cikombelo ca tu lingilile Yesu. Nkala muaka, Mulalelo ua ku-tsa ca Yesu ue ku kungulula vantu mu cifua ca ku komouesa, cize ca hiana viuano viose hano ha mavu.

² Mua vusunga Yehova na Yesu ve ku viukilila cikuma mu ve ku mona makulukazi a vantu mu mavu ose va ya ku ciuano caco, ola ku ola. Mbimbiliya ya handeka via “civunga ca kama, na umo uahi a hasa ku va tanda, va ku vifuti viose, na miyati yose, na vantu vose na malimi ose” ve ku tambakana nguavo: “Vuovole vu li kuli Njambi yetu, uze na tumama ku citumamo ca vuangana, na kuli Muana mpanga.” (Ku-Solola 7:9, 10) Ca pua ca cili cikuma ku mona ngecize nkala muaka ku Mulalelo,  makulukazi a vantu ve ku muesa kasingimiko kuli Yehova na Yesu omo lia viuma via kama vi va tu lingila!

3. Vihula vika tu lilongesa vuovuno?

³ Mu cilongesa cino, tu ka kumbulula evi vihula viuana vi na hatako: (1) Vati nji hasa ku liviukisila Mulalelo linga nji ka uane vukuasi vua vuingi? (2) Mu vinjila vika Mulalelo ue ku kuasa vangamba va Njambi vose ku likuata kumo? (3) Vika nji hasa ku linga nji tuale ku lutue ku likata ca vangamba va Njambi? (4) Vuno tangua ku kala Mulalelo ua ku manusuila ni? Nga mukemuo, tangua lika?

4. Vika ca puila ca seho kuli etu ku ka soloka ku Mulalelo?

⁴ Vika ca puila ca seho kuli etu ku ka soloka ku Mulalelo? Ha katete, muomu ku kunguluka ca pua imo njila ya ku lemesa Yehova. Tu li na vusunga ngecize Yehova na Yesu ve ku mona nkala muntu ue ku lihakela kapandi ka ku ka soloka ku ciuano eci ca seho ya kama mu muaka. Tu tonda Yehova na Yesu va mone ngecize tu ka linga cose mu ku ya ku Mulalelo, ku likela ku vanga noho mpano ka tuesi nomu mua ku linga mpundu. Nga vilinga vietu vi muesa ngecize viuano via Vakua Kilistu via kala na seho kuli etu, tu ka vueza ku cizango ca Yehova ca ku soneka mazina etu mu “livulu lia civuluiso.” Livulu liaco va li tumbula naua nguavo “mukanda ua muono.” Mua kala mazina a vantu vaze Yehova a tonda ku ka va hana muono ua ya-ye.—Malakiya 3:16; Ku-Solola 20:15.

5. Mu vimo visimano ntsimbu kanda litangua lia Mulalelo li hete, vati mu hasa ku liseteka “enu vavene nga mu na pu vakua ku tsiliela cili”?

⁵ Mu vimo visimano ntsimbu kanda litangua lia Mulalelo li hete, tu hasa ku hangula ntsimbu ya ku pua na ku vundila na ku hilula vuino ha ku kaniama ca vusamba vuetu na Yehova. (Tandenu 2 Kolintu 13:5.) Kapostolo Paulu ua lekele Vakua Kilistu ngueni: “Liesekienu enu vavene nga mu na pu vakua ku tsiliela cili.” Vati tu hasa ku lingamo? Mu ku lihula etu vavene nguetu: ‘Vuno nja tsiliela mpundu ngecize luno lukungulukilo lukeluo lika lua hangula Yehova mu ku puisamo cizango ceni ni? Vuno nje ku linga cose mu ku ambulula na ku longesa muzimbu ua cili ni? Vuno vilinga viange via muesa ngecize nja tava nguange tu li na ku yoyela ku matangua a ku kotokela kaha ku sika ca Satana vuovuno va ci nongesa ni? Vuno lukulahelo luange muli Yehova na Yesu kasi lua kaniama ngeci mua ha ntsimbu i nja putukile ku lilongesa Mbimbiliya ni?’ (Mateo 24:14; 2 Timoteo 3:1; VaHevelu 3:14) Ku singanieka ha vikumbululo vievi vihula ci hasa ku tu kuasa ku ‘seteka’ vuntu vuetu.

6. (a) Njila imo lika i tu hasa ku ka tambuilamo muono ka ue ku hua ya pua ika? (b) Vati umo mukuluntu ue ku liviukisila Mulalelo nkala muaka? (c) Vati mu hasa ku mu tambuluisa?

⁶ Njila imo i mu hasa ku liviukisilamo via Mulalelo ya pua ku tanda na ku singanieka ha vimpande via longesa seho ya ciuano caco. (Tandenu Yoano 3:16; 17:3.) Njila  imo lika i tu hasa ku ka tambuilamo muono ka ue ku hua ya pua ku tantekeya Yehova na ku tsiliela muli Muaneni, Yesu. Mu ku liviukisila via Mulalelo, tu hasa ku hangula mitamba ya vilongesa vize vi kaniamesa vusamba vuetu navo. Vikevio vie ku linga umo muanetu ua kala ha vukuluntu miaka ya yingi. Mu miaka ya yingi, ua kungulula vilongesa via mu Vutala via handeka via Mulalelo na cilemo ci va tu muesa Yehova na Yesu. Mu vimo visimano ntsimbu kanda litangua lia Mulalelo li hete, ue ku tanda evi vimpande viaco kaha ue ku singanieka vuino ha seho ya Mulalelo. Vintsimbu vimo ue ku vuezako cimpande cimo ni vivali ku mukana ueni. Kaha ue ku tanda na ku hilula vuino ha ku tanda ca Mbimbiliya ca mu ntsimbu ya Mulalelo. Mukuluntu uaco ua handekele ngueni mu ku lingamo, ue ku lilongesa viuma via viha nkala muaka. Ca hiana seho, ku lilongesa ceni ce ku mu kuasa ku lema cikuma Yehova na Yesu. Nenu nga mu pua na ku lilongesa mu cifua eci, cilemo cenu kuli Yehova na Yesu ci ka tualeleleho ku kola. Kaha ku santsela cenu ku viuma vi va tu lingila ci ka livuezelela, kaha mu ka lilongesa via vingi ku Mulalelo.

7. (a) Vika ua vundilile Yesu ku vutsiki vu va lingile Mulalelo ua katete? (b) Vika via muesa ngecize Yehova ua kumbulula cize civundilo ca Yesu?

⁷ Ku vutsiki vu va lingile Mulalelo ua ku livanga ua ku-tsa ca Yesu, ikeye ua lingile civundilo ca ku lifuila. Mu civundilo caco ua handekele via ku likata ca kala ha kati keni na Ise. Yesu ua vundilile naua ngecize vandongesi veni navo va likuate kumo. (Tandenu Yoano 17:20, 21.) Mua vusunga Yehova ua kumbulula eci civundilo ca lingile Muaneni. Ku viuano viose, ciuano ca Mulalelo cikeco ca muesa ngecize Vakaleho va Yehova va likuata kumo. Ha litangua liaco, makulukazi a vantu va ku vifuti na vikanda via ku liseza-seza ve ku likungulula mu mavu ose, mu ku muesa nguavo va tsiliela ngecize Yehova ua tumine Muaneni. Ku vihela vimo, vantu va ku visemua via ku liseza-seza ka ve ku likungulula hamo ku via Njambi, kaha ambe vaze ve ku lingamo ka ve ku lingamo na mutima uose. Vunoni kati mukemuo mua tonda Yehova na Yesu. Muomu va lema ku tu mona tu na likungulula ku Mulalelo.

8. Muzimbu uka Yehova ua hanene kuli Ezekiele?

⁸ Etu vangamba va Njambi, ka tue ku komoka eci ku likata ci tua kala naco. Yehova ku hitila muli Ezekiele ua muesele ngecize ku likata caco tangua ci ka kalako. Ua lekele Ezekiele a none viti vivali, cimo “ca Yunda” kaha cikuavo “ca Yosefe,” na ku vi pandakana va pue citi cimo lika. (Tandenu Ezekiele 37:15-17.) Mu “Vihula via Vakua ku Tanda” via mu Vutala vua Julho ya 2016, va lombolola nguavo: “Ku hitila muli kapolofeto ueni, Yehova ua polofetele ngecize vantu veni va ka hiluka ku Cifuti ci va va Kulahesele kaha va ka pua muyati umo lika. Vupolofeto vuaco vua muesele naua ngecize ku matangua a ku kotokela vaze ve ku lemesa Njambi va ka pua muyati umo lika.”

9. Nkala muaka ku Mulalelo, vati tue ku mona ku likata ca polofetele Ezekiele?

⁹ Tunde mu 1919, ha katete Yehova ua putukile ku kungulula na ku viukisa vaze va ku vuavesa. Vakevo va puile citi “ca Yunda.” Kaha, kavundende-kavundende, vaze va lavelela ku ka yoyela ha mavu va putukile ku iza mu ku lipandakana na vaze va ku vuavesa.  Ava va lavelela ku ka yoyela ha mavu va pua citi “ca Yosefe.” Yehova ua kulahesele ku pandakana evi viti vivali “na ku vi puisa citi cimo” mu livoko lieni. (Ezekiele 37:19) Ua pandakanene vaze va ku vuavesa na “vampanga veka” ku pua “vutanga vumo lika.” (Yoano 10:16; Zakaliya 8:23) Lelo lino, evi vivunga vivali via lipandakana mu ku pangela Yehova hamo lika. Kaha va kala na Muangana umo lika, Yesu Kilistu, uze ua luka Yehova mu vupolofeto vua Ezekiele ngueni “ngamba yange Ndaviti.” (Ezekiele 37:24, 25) Nkala muaka mu tue ku likungulula ku Mulalelo ua ku-tsa ca Yesu tue ku mona eci ku likata ca kala ha vivunga evi vivali vi va polofetele ku hitila muli Ezekiele. Vuno vika tu hasa ku linga muntu ku muntu tu niunge na ku tuala ku lutue eci ku likata?

10. Vati tu hasa ku tuala ku lutue ku likata ca kala ha kati ka vangamba va Njambi?

¹⁰ Njila ika ya katete i tu hasa ku tualelamo ku lutue ku likata ca kala ha kati ka vangamba va Njambi? Mu ku lihakela kapandi ka ku likehesa. Yesu mua kele hano ha mavu, ua mamuine vandongesi veni ngueni va pue va ku likehesa. (Mateo 23:12) Mu mavu a lelo lino vantu ve ku limona ku pua va seho ya kama ku hiana vakuavo. Vunoni nga tu pua va ku likehesa, tu ka singimika vamuanetu vaze ve ku tu tuamenena mu cikungulukilo na ku ononoka ku vimamuna viavo. Ku linga evi, cikeco ce ku lingisa cikungulukilo ku likuata kumo. Ca seho ya kama, nga tu pua va ku likehesa, tu ka ya Njambi ku  mutima, “muomu Njambi a viana vakua ku lihalesa, vunoni a hana kavumbi kuli vakua ku konkama,” na ku likehesa.—1 Petulu 5:5.

11. Vati ku singanieka ha mbolo na viniu via ku Mulalelo ci hasa ku tu kuasa ku tuala ku lutue ku likata cetu?

¹¹ Njila ika ya mu civali i tu hasa ku tualelelamo ku lutue ku likata cetu? Mu ku singanieka vuino ha vulumbunuiso vua mbolo na viniu via ku Mulalelo. Tua pande ku lingamo omo Mulalelo kanda u hete kaha cikumakuma mu vutsiki vuaco. (1 Kolintu 11:23-25) Mbolo ya ku hona cimbaluila yemanena muvila ua ku tantuluka ua Yesu, uze ua tu hele ku pua cikombelo. Viniu via ku tila, ni via ku venga, viemanena maninga eni. Tua pande ku linga vikuavo kati lika ku ivuisisa evi vilongesa via vuputukilo. Tua pande naua ku vuluka nguetu cikombelo ca Yesu ca puile cimueso ca cilemo ca kama ci va muesele vantu vavali: Yehova na Yesu. Yehova ua tu hanene Muaneni, kaha Yesu ua tu hanene muono ueni. Ku singanieka ha cilemo ci va tu muesa, netu tu kevua ntsindiye ya ku va lema. Kaha cilemo ci tua kala naco kuli Yehova ci ka kaniamesa ku likata cetu.

12. Mu cisimo ca muangana na vangamba veni, vati Yesu ua muesele ngecize Yehova ua tonda tu pue na ku ecela vakuetu?

¹² Njila ika ya mu citatu i tu hasa ku tualelamo ku likata cetu ku lutue? Mu ku ecela vakuetu na mutima uose. Nga tu lingamo, tu ka muesa ngecize tue ku santsela cikuma kuli Yehova mu ku tu ecela ku vipi vietu ku hitila mu cikombelo ca Yesu. Mu ku muesa seho ya ku ecela, Yesu ua tele cisimo ca umo muangana ua kele na vangamba veni. Sukulukambu tandenu Mateo 18:23-34 kaha lihulenu nguenu: ‘Vuno nje ku ivua ntsindiye ya ku linga via longesele Yesu mu cisimo eci ni? Vuno nje ku ivuisisa vamuanetu na ku va muesa lukakatela ni? Nja liviukisila ku kecela vaze va ka nji vulumuina ni?’ Kua kala vimo vivulumuna via kama ku hiana vikuavo. Kaha kuli etu vantu ca pua ca cikalu ku ecela vivulumuna via kama. Vunoni cisimo ca Yesu ca muesa via tonda Yehova kuli etu. (Tandenu Mateo 18:35.) Yesu ua muesele ha toma ngecize nga vamuanetu va na tu vulumuina, kaha va na liveye mu vusunga, vunoni etu ka tu vecela, Yehova neni ka ka tu ecela. Eci ca pua cimpande ca kama ci tua pande ku hilula vuino. Linga tu niunge ku likata cetu tua pande ku pua na ku ecela vamuanetu ngue mua longesele Yesu.

13. Vati tue ku tuala ku lutue ku likata cetu nga tu linga ciyulo na vamuanetu?

¹³ Nga tu ecela vakuetu, tu ka niunga ciyulo ha kati ketu na vamuanetu. Kapostolo Paulu ua tu mamuine ngueni tua pande ku lihakela kapandi ka ku tualelaho ku likuata kumo kaha na ku linga ciyulo. (Efeso 4:3) Ngeci mukemuo ku ntsimbu ya Mulalelo, cikumakuma ku vutsiki vuaco, hilulenu vuino ku tuala ha cifua ci mue ku talelamo vakuenu. Lihulenu nguenu: ‘Vuno vakuetu ve ku mona ngecize ange ka nje ku vuila matoto vaze ve ku nji vulumuina ni? Vuno vakuetu ve ku mona ngecize nje ku lihakela kapandi ka ku linga ciyulo na ku tuala ku lutue ku likata cetu ni?’ Evi via pua vihula via seho ya kama vi tua pande ku hilula.

14. Vati tu hasa ku muesa ngecize tu li na ku ‘liyandela umo na mukuavo na cilemo’?

¹⁴ Njila ika ya mu ciuana i tu hasa ku tualelamo ku lutue ku likata cetu? Mu ku tambuluisa Yehova mu ku muesa cilemo. (1 Yoano 4:8) Ka tua pandele ku handeka nguetu, “Citava nji kale na cilemo kuli vamuanetu , vunoni ka ci tondeka ku va zanga.” Nga mukemuo  mu tu singanieka, ka tuesi na ku niunga cimamuna ca Paulu ca ku ‘liyandela umo na mukuavo na cilemo.’ (Efeso 4:2) Nga mu tala vuino ha mezi aa Paulu ka handekele lika ngueni “liyandelienu ha kati kenu umo na mukuavo” vunoni ua vuezeleko ngueni “na cilemo.” Ha kala ku litepa. Mu cikungulukilo Yehova ua lanienamo vantu va vifua via ku liseza-seza. (Yoano 6:44) Ngeci mukemuo, ua kala na vusunga vua vuingi vua mu lingisa ku lema vantu vaco. Nga Njambi ue ku muesa cilemo kuli ava vamuanetu, nkuma etu ka tua pandele ku va muesaco ni? Tua pande ku kala na cizango ca ku va lema mu njila ya tonda Yehova.—1 Yoano 4:20, 21.

15. Vati tua tantekeya nguetu Mulalelo tangua u ka hua?

¹⁵ Ku lutue, tangua tua ku likungulula lua ku manusuila ku Mulalelo. Vati tua tantekeyamo? Paulu ua lekele Vakua Kilistu va ku vuavesa ngueni mu ve ku vuluka ku-tsa ca Yesu nkala muaka, ve ku “ambulula ku-tsa ca Muangana noho a keza.” (1 Kolintu 11:26) Mua polofetele via matangua a ku kotokela, Yesu ua handekele naua via ‘ku iza’ ceni. Ku tuala ha ku iza ca lamba ya kama, Yesu ua ambele ngueni: “Citantekeyeso ca Muana muntu ci ka soloka muilu: kaha miyati yose ya ha mavu va ka lila mbimbiamutue, kaha va ka mona Muana muntu a li na ku iza ha maselua a muilu na ngolo na vumpahu vua kama. Kaha a ka tuma tungelo tueni na lizi lia kama lia luneta, kaha va ka kungulula veni vaze va va hanguile, ku mitamba yose iuana, ku mutamba uze kua lenga lilu na ku hetesa ha lenga mutamba ukuavo ua lilu.” (Mateo 24:29-31) Yesu a ka “kungulula veni vaze va va hanguile” ni nguetu ku tuala muilu vose Vakua Kilistu va ku vuavesa va ka lisupa ha mavu. A ka lingamo mu nima ya ku putuka ca lamba ya kama, vunoni ntsimbu ndzita ya Alemangendo kanda i ci ize. Mu ndzita yaco, Yesu, hamo lika na 144.000 va ku vuavesa, va ka luisa vamiangana va ha mavu na ku va vula. (Ku-Solola 17:12-14) Mulalelo u tu ka linga ntsimbu kanda Yesu ‘eze’ mu ku kungulula vaze va ku vuavesa, ukeuo u ka pua ua ku manusuila.

16. Omo lia vika mua lihakela kapandi ka ku ka ya ku Mulalelo mu muaka uno?

¹⁶ Lingenu cose mu ka ye ku Mulalelo ua 31 ya Março ya 2018. Kaha vundilenu Yehova a mi kuase ku lingako mutamba uenu, linga etu vantu veni tu tualeleleho ku likuata kumo. (Tandenu Visamo 133:1.) Tangua cilika ca Mulalelo ci ka hua. Vunoni omo litangua liaco kanda li hete, tu tualelelenuho ku muesa ngecize tua haka seho ya kama ku ku likata ca cili ci tue ku kala naco nkala muaka ku Mulalelo.