1, 2. (a) Cipanga cika ca kele na seho ya kama kuli Yesu, kaha omo lia vika? (b) Vika tua pande ku linga mangana tu puisemo vuino citeli ca ku pua “vangamba kumo na Njambi”?

YESU KILISTU ua puile mukua ku songa kaha mu nima yaco ua puile mulongisi. (Mako 6:3; Yoano 13:13) Ua hasele ku linga viose vivali mu vutantuluke. Mu ku pua mukua ku songa, Yesu ua lilongesele ku pangesa vikuata via kele navio mu ku panga viuma via vutongue na mavaya. Kaha mu vulongisi, ua pangesele vusunga vua ku lova vua tantekeyele mu Visoneka mu ku kuasa vantu nkala vevuisise Lizi lia Njambi. (Mateo 7:28; Luka 24:32, 45) Omo Yesu ua kele na miaka 30, ua likelele via ku songa kaha ua puile mulongisi muomu ua tantekeyele ngueni vulongisi vukevuo vua puile cipanga ca seho ca pandele ku linga. Ua handekele ngueni ku ambulula muzimbu ua Vuangana ca puile cimo ca vipanga via mu tuminine Njambi hano ha mavu. (Mateo 20:28; Luka 3:23; 4:43) Yesu ua pange muono ueni ku cipanga ca ku ambulula muzimbu ua cili, kaha ua tondele na vakuavo va lingemo.—Mateo 9:35-38.

² Cingi cetu ka tua puile vakua ku songa, vunoni tu vose tua pua valongisi muomu tue ku longesa vakuetu muzimbu ua cili. Eci cipanga ca kala na seho ya kama cikuma-kuma muomu  Njambi neni ua lihakamo. Ngeci Mbimbiliya ya tu tumbula nguayo “tu vangamba kumo na Njambi.” (1 Kolintu 3:9; 2 Kolintu 6:4) Kaha tua tava via handekele mukua visamo, ngueni: “Ku-pandakana ca lizi liove cikeco vusunga.” (Visamo 119:159, 160) Ni nguetu lizi lia Yehova liose likelio vusunga. Ngeci mukemuo tue ku linga cose linga tu pue “mukua ku panga na vuino na lizi lia vusunga” mu lihia. (Tandenu 2 Timoteo 2:15.) Ngeci tue ku lihakela kapandi ka ku pangesa Mbimbiliya na vutongue, muomu ikeyo cikuata ca kama ci tue ku pangesa mu ku longesa vakuetu via Yehova, na Yesu na Vuangana vua Njambi. Mu ku tu kuasa mu cipanga ca ku ambulula, lukungulukilo lua Yehova lua tu hana vikuata vikuavo via seho, kaha tua pande ku tantekeya ku vi pangesa. Vikuata viaco tua vi luka nguetu Vikuata via ku Longesa Navio.

3. Ku vika tua pande ku tuala mana nga tuli mu lihia, kaha vati Vilinga 13:48 i ka tu kuasa ku lingamo?

³ Halumo mue ku lihula ngueni, vika honi tua vi lukila nguetu Vikuata via ku Longesa Navio? Kati nga tua vi luka nguetu Vikuata via ku Ambulula Navio ni? Ka tua lingilemo muomu “ku ambulula” ca pua lika ku leka vantu muzimbu, vunoni “ku longesa” ca pua ku lombolola muzimbu uaco linga muntu u mu lumbunuke na ku mu vuisa cizango ca ku linga vize vi tondeka mu muzimbu uaco. Mu ku linga kua lisupu ntsimbu ya indende linga ku kotoka cize, tua pande ku tuala mana ku ku putuka vilongesa via Mbimbiliya na ku longesa vantu vusunga linga va pue vandongesi va Kilistu. Eci ca lomboloka ngecize na ntuima yose tua pande ku tonda vaze vali na cizango ca ku ka tambula “muono ka ue ku hua” na ku va kuasa va putuke ku pangela Yehova.—Tandenu Vilinga 13:44-48.

4. Vati tu hasa ku uana vaze vali na “cizango ca ku ka tambula muono ka ue ku hua”?

⁴ Vati tu hasa ku uana vaze vali na cizango ca ku ka tambula “muono ka ue ku hua”? Kuli Vakua Kilistu va katete, njila imo lika ya ku uanenamo vantu vaco ya puile ku ambulula. Yesu ua lekele vandongesi veni ngueni: “Kaha omo mu ka kovela muimbo limo, cipue ku cikandzo, hulenu mukua ku mi viukila a limo.” (Mateo 10:11) Netu tua pande ku lingamo lelo. Vunoni ka tua pandele ku lavelelela, ngecize vantu va ku hona vusunga, cipue vakua ku lihalesa ni ka va hakele seho kuli Njambi va ka tu halakana, houe. Ngeci tue ku tonda vakua vusunga, vakua ku likehesa, na vaze mpundu va tonda ku lilongesa vusunga. Tu hasa ku setekesa cipanga cetu ca ku tonda vantu na cipanga ca vukalupindelo ca lingile Yesu. Linga a songe vimo, ngeci mua lipito, mukambo ua tusitu, ni nkala viuma vieka via ku songa, ha katete ua pandele ku tonda mavaya a cili. Kaha ua nonene cikasa ceni ca vikuata, na ku pangesa vutongue vueni mu ku vi songa. Netu lelo lino, ha katete tua pande ku tonda vakua vusunga, mu nima yaco amba tu pangese vikuata vietu na vutongue vuetu mu ku va kuasa ku pua vandongesi.—Mateo 28:19, 20.

5. Vika tua pande ku tantekeya ku tuala ha Vikuata Vietu via ku Longesa Navio? Hanenu cimueso. (Talenu vikupulo via ku vuputukilo.)

⁵ Mu cikasa ca vikuata via ku pangesa, nkala cikuata ca kala na vipanga viaco. Ca ku muenako, aci singaniekenu ha vikuata via pangesele Yesu mu vukalupindelo. * (Talenu litota.) Ua tondekele vikuata via ku setekesa, ku sonekesa, ku tetesa, ku tsokuesa na ku  lambesa mavaya, na vikuata via ku sungamesesa mavaya linga a hase ku a tokakana. Na vuno vene, nkala cikuata ca mu Vikuata Vietu via ku Longesa Navio ca kala na vutumbe. Ngeci mukemuo tu lilongesenu vati tu hasa ku vi pangesa.

6, 7. (a) Vati mue ku pangesa tumapapelo tua mizimbu? (b) Vika tue ku pangesela vilanio via ku viuano?

⁶ Tumapapelo tua Mizimbu. Vutuhu tua pua tua tundende vunoni tue ku kuasa vantu vavengi ku tu tantekeya na ku va lekesa saiti jw.org. Mu saiti yetu, va hasa ku tu tantekeya vuino na ku vundila cilongesa ca Mbimbiliya. Vantu va tuvakana 400.000 va na vundila ku lilongesa Mbimbiliya mu jw.org, kaha numelu kasi i li na ku livuezelela! Ngeci mukemuo puenu na ku enda na tumo tumapapelo tua mizimbu linga mu pue na ku hana ku vantu va mu pua na ku simutuila navo.

⁷ Vilanio. Cilanio cetu ca ku viuano ca handeka nguaco: “Tua mi lania mu lilongese Mbimbiliya na Vakaleho va Yehova.” Kaha naua nguaco mu hasa ku lingamo “ku viuano vietu via mbunga ni ku lilongesela kua lika lienu.” Ngeci mukemuo cilanio ce ku leka vantu yetu veya na ku lania “vakua ku hutua mu cimbembesi” va lilongese netu Mbimbiliya. (Mateo 5:3) Vutuhu ngoco tue ku tambula na mavoko avali nkala muntu ue ku iza ku viuano ambe nga a tava cilongesa ca Mbimbiliya ni kuahi. Mu ve ku iza ku viuano vietu ve ku mona ngecize nkuma va hasa ku lilongesa via vingi mu Mbimbiliya.

8. Seho ika ya kalaho nga vantu veza ku viuano vietu? Hanenu cimueso.

⁸ Ca pua ca seho ku tualelelaho ku lania vantu va ka likungulule netu ambe lumo lika. Omo lia vika? Muomu mu ve ku izako, ve ku mona ngecize Vakaleho va Yehova ve ku longesa mpundu vusunga vua mu Mbimbiliya na ku kuasa vantu va tantekeye Njambi, vunoni malombelo a makuli ka eku lingamo. (Isaya 65:13) Ca ku muenako vamo va yala na mpueyeni va ku Estados Unidos, mazina avo Ray na Linda va muene ku litepa caco imo miaka ku nima. Va tsilielele ngecize Njambi kua kala kaha va tondele ku mu tantekeya vuino. Ngeci va hanguile ku hita mu malombelo ose a kele mu mbonge yavo na ku tondamo viuma vivali ntsimbu kanda va lihane ku vulombelo. Cuma ca katete ku lilongesa vimo ku vulombelo vuaco, ca mu civali, vakua vulombelo vuaco va pandele ku zala vene ngue vakua ku lemesa Njambi. Va lingilemo miaka ya ingi muomu mu mbonge yavo mua kele vitembele via vingi. Vunoni kuose ku va ile kua va lavesele ku mutima. Muomu ka va lilongeseleko na vimo viahi kaha vantu vaco va zalele mua ku pihia. Mu va fumine mu tembele ya ku manusuila va litepele, Linda ua ile ku vipanga kaha Ray ua ile ku ndzivo. Mua kele na ku hiluka ku ndzivo, ua hitile hamo ha Ndzivo ya Vuangana. Kaha ngueni, ‘mana nji ci ka sumbililemo namuo.’ Mua ka kovelelemo havueni! Vose va na zala vuino kaha vakua ngozi na ndzandzu! Ray ua ka tumamene vene ku citumamo ca ku lutue kaha ua lemene cikuma via lilongesele! Evi vi tu vuluisa via handekele Paulu ngueni muntu nga eza ku cimo ciuano a hasa ku likomokela ngueni: “Njambi a li muli enu cili.” (1 Kolintu 14:23-25) Fume tangua olio, Ray ua putukile ku kunguluka nkala Calumingu. Kaha ua putukile naua ku kunguluka mu kati ka simano. Linda neni ua putukile ku kunguluka, kaha vutuhu tele vendela ku miaka 70,  va lilongesele Mbimbiliya kaha va va mbatizile.

9, 10. (a) Omo lia vika vitratadu via pua via viasi ku vi pangesa? (b) Lombololenu vati tu hasa ku pangesa tratadu Vika Vuangana vua Njambi?

⁹ Vitratadu. Mu vikuata vietu via ku longesa navio mua kala vitratadu 8. Via pua via viasi ku vi pangesa kaha via cili ku putuka navio ku simutuila. Fume ha via tuhukilile via katete mu 2013 na lelo, va tuhulako laza vitratadu 5 bilhões! Vitratradu viaco viose via lifua. Ngeci mukemuo nga mu lilongesa ku pangesa imo kaha mu ka hasa ku pangesa viose. Vunoni vati honi mu hasa ku pangesa imo mu ku putuka ku simutuila na muntu?

¹⁰ Nga mu tonda ku pangesa tratadu Vika Vuangana vua Njambi? Lekesenu ku muntu cihula ci li helu na ku mu hula nguenu: “Mua lihulaho laza nguenu vika Vuangana vua Njambi ni? Vati mu kumbulula . . . ” Kaha mu lekesenu vikumbululo vitatu linga a hanguleho cimo. Mu nima yaco kati mu mu leke nga na kumbulula vuino ni kuahi vunoni fukulenu tratadu ha mutamba “Mbimbiliya Nguayo” kaha tandenu livulu liliho Ndaniele 2:44 na Isaya 9:6. Ku ntsongo ya ku simutuila cenu mu lingenu cihula ci li muintsi lia mutue “Aci Singaniekenu”: “Vati va ka yoya vantu omo Vuangana vua Njambi vu ka sika?” Na ku ci seza, linga mua ku ci kumbulule tangua lieka. Omo mu ka hilukilako citava mu ka pangese cilongesa 7 ca mu mukanda Muzimbu ua Cili u Fuma Kuli Njambi!, uze u tue ku pangesa mu ku putuka vilongesa via Mbimbiliya.

11. Vimpande via cifua cika ve ku haka mu Vutala na Despertai!, kaha vika tua pande ku tantekeya ku tuala hali ikeyo?

¹¹ Vutala vua Kaniungi na Despertai! Eyi mikanda ikeyo i ve ku tuhula na ku langulula cikuma mu mavu ose! Mu ku linga vantu va mu vifuti via ku liseza-seza ve ku i tanda, tue ku hakamo vimpande vie ku ya ku mitima ya vantu vose. Tua pande ku pangesa mikanda yaco mu ku kuasa vantu va tuale mana ku viuma via seho ya kama mu muono. Ha katete, tua pande ku tantekeya nga nkala mukanda va u sonekela vantu va cifua cika.

12. (a) Despertai! va i pangela vantu va cifua cika, kaha vutumbe vuayo vuka? (b) Vimona vika via cili mua lihita navio mu ku pangesa eci cikuata?

¹² Despertai! Va i pangela vantu vaze va tantekeya via vindende ni ka va tantekeya na vimo viahi ku tuala ha Mbimbiliya. Vaze ka va tantekeya na cimo cilongesa ca Vakua Kilistu cahi, vaze ka va tsilielele mu malombelo, ni vene vaze ka va tantekeya ngecize Mbimbiliya i hasa ku va kuasa mu muono. Vutumbe vua kama vua Despertai! vua pua ku kuasa vantu ku tsiliela ngecize Njambi kua kala. (Loma 1:20; VaHevelu 11:6) Kaha ye ku kuasa naua vantu ku tsiliela Mbimbiliya ku pua “mua vusunga vene, lizi lia Njambi.” (1 Tesalonika 2:13) ViDespertai! vitatu via tuhuka mu 2018 via kala na mitue: “O caminho para felicidade,” “12 Segredos de uma familia bem-sucedida,” na “Como lidar com a dor da morte.”

13. (a) Vutala vua Kaniungi vua mbunga va vu pangela veya? (b) Vimona vika via cili mua lihita navio mu ku pangesa eci cikuata?

¹³ Vutumbe vua kama vua Vutala vua Kaniungi vua mbunga, vua pua ku lombolola vilongesa via Mbimbiliya ku vantu vaze va  singimika Njambi na Mbimbiliya. Vaze va tantekeyako vimo mu Mbimbiliya, vunoni ka ve ku vi ivuisisa ngue mu ca pande. (Loma 10:2; 1 Timoteo 2:3, 4) Vutala vutatu vua tuhuka mu 2018 vua kumbulula vihula evi: “Vuno Mbimbiliya Kasi ya Kala na Seho Lelo Lino Ni?,” “Vika mua Lavelela ku Lutue?” na “Vuno Njambi ua mi Mbila Kuti Ni?”

14. (a) Vivideo viuana via mu Vikuata Vietu via ku Longesa Navio va vipangela vika? (b) Vimona vika via cili mua lihita navio mu ku lekesa vivideo viaco?

¹⁴ Vivideo. Ku matangua a Yesu, vikuata viose via pangesele kalupindelo via puile via ku mavoko lika. Vunoni lelo lino vakalupindelo va kala naua na vikuata vie ku panga na tuhia tua vunengu, ngeci visaha, vituviso, na viplana. Na vuno vene, mu ku vueza ku mikanda, tua kala naua na vivideo via cili vi tue ku lekesa ku vantu. Mu vikuata vi tue ku longesa navio mua kala viuana: Vika mua Pande ku Lilongesela Mbimbiliya?, Vati ve ku Endesa Cilongesa ca Mbimbiliya?, Vika vie ku Hita mu Ndzivo ya Vuangana?, na Vakaleho va Yehova va pua Veya? Vivideo via vihi citava ku vi tala mu 2 minutu ni muintsi, kaha via cili ku vi pangesa mu vungendzi vua katete. Vivideo via laha co citava ku vi pangesa mu mangendzi a ku hilukila kuli vaze ve ku kalako na imo ntsimbu ya kama. Vivideo via pua vikuata via cili muomu vie ku vuisa vantu cizango ca ku lilongesa Mbimbiliya na ku kunguluka.

15. Vati ve ku livua vantu nga va tala imo ya vivideo vietu mu malimi avo? Tumbulenu vimo vimona.

¹⁵ Ca ku muenako, umo ndokazi ua uanene umo mpuevo ua ku Micronésia mukua ku handeka ciYapese. Ndokazi ua mu lekesele video Vika mua Pande ku Lilongesela Mbimbiliya? mu ciYapese. Mu ya putukile vene ngecize video, mpuevo uaco ngueni: “Video yaco ili mu lilimi liange? Naaana nja komoka! Kaha naua ou muntu a handekamo ua kuimbo lietu mpundu, nji na mu vuila ku handekesi yeni!” Mu nima yaco ua handekele ngueni a ka kovela mu saiti jw.org na ku tanda mikanda na vivideo viose vilimo via mu lilimi lieni. (Vilinga 2:8, 11) Cimona cikuavo, ca umo ndokazi ua ku Estados Unidos. Muihua ueni ua ka tunga ku cifuti ceka ca ku laako. Tangua limo ndokazi ua mu tumine link ya video i tu na tumbula laza, vunoni ua mu tumineyo mu lilimi lieni. Uze muihua ua talele video yaco na ku tuma mesaje kuli tinavala yeni ngueni: “Haze ha ya handeka video via mukua vupi ali na ku sika mavu, hakeho ha nji kuatele cikuma ku mutima. Ngeci nji na vundila cilongesa ca Mbimbiliya mu saiti.” Muzimbu uaco ue ku tu vuisa ndzolela cikuma muomu yala uaco ua kala mu cifuti ci va tu vindika ku ambulula!

16. Lombololenu vutumbe vua: (a) Ivuilila Njambi Ukayoye Miaka Yose. (b) Muzimbu ua Cili u Fuma Kuli Njambi! (c) Veya Vali na ku Linga Cizango ca Yehova Lelo?

¹⁶ Mikanda. Vati tu hasa ku longesa vusunga ku muntu ka tantekeya ku tanda vuino ni mikanda yetu ka ya tuhukile mu lilimi lieni? Tu hasa ku pangesa mukanda Ivuilila Njambi Ukayoye Miaka Yose. * (Talenu ha litota.) Cikuata ca cili ca ku putuka naco vilongesa via Mbimbiliya ca pua Muzimbu ua Cili u Fuma Kuli Njambi! Mu hasa ku lekesa muntu vimpande 14 ku nima ya mukanda na ku mu hula cimpande cika ci na mu i ku mutima.  Kaha putukenu cilongesa ha cimpande caco. Mue ku seteka ku linga evi nga mu linga mangendzi a ku hilukila ni? Mukanda ua mu citatu mu Vikuata Vietu via ku Longesa Navio ua pua Veya Vali na ku Linga Cizango ca Yehova Lelo? Mukanda uaco va u pangela ku longesa vandongesi va Mbimbiliya via lukungulukilo lua Yehova. Linga mu tantekeya vati mu hasa ku pangesa mukanda uaco nga mu endesa cilongesa ca Mbimbliiya, talenu mu Mukanda ua Viuano via Muono Uetu Vakua Kilistu na Vipanga Vietu ua Março ya 2017.

17. (a) Tumbulenu vutumbe vua nkala livulu li tue ku longesa nalio? (b) Vika va pande ku linga vose va ve ku mbatiza, kaha omo lia vika?

¹⁷ Mavulu. Mu nima ya ku putuka cilongesa na muntu mu nkala mukanda u tua tumbula, ntsimbu yose-oyo citava mu lundulukile mu livulu Vika I Hasa ku tu Longesa Mbimbiliya? Eci cikuata ce ku kuasa vantu ku tantekeya vilongesa via ku putukila via mu Mbimbiliya. Nga ndongesi ali na ku kola mu lutsilielo kaha a manusula livulu liaco, mu hasa ku tualelelaho ku lilongesa neni mu luvulu Kalenu mu Cilemo ca Njambi. * Eci cikuata ce ku kuasa ndongesi ku lilongesa mua ku pangesela vitume via mu Mbimbiliya mu muono ueni. Vulukenu ngecize ambe mu nima ya mbatizimu, ndongesi na pande ku tualelelaho ku lilongesa noho na mane aa mavulu ose avali. Muomu a ka mu kuasa ku kala na lutsilielo lua ku kaniama muli Yehova na ku kakatela kuli ikeye.—Tandenu Kolose 2:6, 7.

18. (a) Vika 1 Timoteo 4:16 ua kaniamesa etu valongisi va vusunga, kaha vika vie ku izamo? (b) Mu tue ku pangesa Vikuata via ku Longesa Navio vutumbe vuetu vua pua vuka?

¹⁸ Etu Vakaleho va Yehova, tua kala na citeli ca ku longesa vantu “lizi lia vusunga vua zimpande zia cili” linga va ka uane muono. (Kolose 1:5; tandenu 1 Timoteo 4:16.) Linga tu hase ku vi puisamo, mukuamanda ua tu pangela Vikuata via ku Longesa Navio. (Talenu mu Cikasa “ Vikuata via ku Longesa Navio.”) Tu puenu na ku pangesa evi vikuata na vutongue vuetu vuose. Muntu ku muntu ha kati ketu a hasa ku hangula cikuata cika a pangesa kaha na ntsimbu ika. Vunoni vulukenu ngecize, vutumbe vuetu kati lika ku tepela vantu mikanda, kaha ka tue ku i hana kuli vaze ka va hakele seho ku muzimbu uetu. Vutumbe vuetu ku kuasa vantu vakua vusunga, vakua ku likehesa, vaze mpundu va tonda ku tantekeya Njambi kaha va kala na cizango ca ku ka tambula “muono ka ue ku hua ua ya-ye.”—Vilinga 13:48; Mateo 28:19, 20.