Vunoni ca vusiua ku handeka ngecize, mu nja puisile miaka 13 vusamba vuange na Yehova vua tontuele. Nja muene ngue vakuetu ku sikola va kele na ku zituka ca ya-ye, ange co via kele na ku nji hita. Nja vuile ngue masiko a visemi na a mu Mbimbiliya a kele na ku nji vingilika cikuma, kaha na vipanga via mu lutsilielo via puile ngue citeli kuli yange. Cikuavo naua, vutuhu ka nja kele na vimpata nga Yehova kua kala ni kuahi, nja putukile ku ivua ngue vusamba vuange neni vua puile vua mupulungua.

Kaha mu ku linga ka nja tondele ku soloka ngue nji na zeye mu lutsilielo, nja tualeleleho ku linga vipanga via mu lutsilielo, vunoni helu-helu lika. Nja kele na ku tuhuka mu lihia ca ku hona ku liviukisila, ngeci ca kele na ku nji kaluuila ku putuka ku simutuila na muntu ni ku lingamo mu ntunda ya laha. Omo lievi, ku ambulula cange ka ca kele na ku enda vuino kaha ka ca kele na ku nji tovala, ngeci ca nji futukile cikuma. Kaha nja lihuile nguange, ‘Vuno eci cipanga ca vika tue ku linga simano ku simano na ngonde ku ngonde?’

Mu nja puisile miaka 17, nja tondele ku limanena. Ngeci nja longekeyele vikuata viange ku tunda ha ndzivo na ku nungulukila ku Australia. Ku tunda ha  ndzivo ca kaluuilile cikuma visemi vange. Va lisosomuene vunoni va singaniekele nguavo nji ka tualelelaho ku linga viuma via mu lutsilielo.

Mu nja ka hetele ku Australia lutsilielo luange lua kokolokele cikuma honi. Kaha ku kunguluka ca puile noho-noho lika. Nja putukile ku likata na vakua citso cange vaze va kele na ku linga vutsiki vua lelo vaya mu ku kunguluka, vutsiki vua meneco vaya mu kunua na ku kina muaya vibar. Mu nje ku singanieka ha ntsimbu ize, nje ku mona ngecize nja lingile mukono umo mu vusunga ukuavo mu mavu, noku ku nja kundamene vuino kuahi.

Mu nima ya miaka ivali nja tantekeyele umo ndokazi, uze ua nji kuasele hilula ha muono uange ca ku hona ku tantekeya. Nja yoyele na vandumbuetu 5 ku ndzivo. Kaha mu vutanu vuetu tua laniene kaniungi ua ku zinguluka na mpueyeni Tamara, linga va ku kale netu simano imo. Mua kele na ku linga nga yalieni a tala via cikungulukilo, ndumbuetu Tamara ua kele na ku sikama netu mu ku simutuila na ku zola. Nja lemene mua kama ku sikama caco. Ndumbuetu Tamara ua puile ua ku likehesa kaha ua muasi ku simutuila neni. Ca nji ile cikuma ku mutima ku tantekeya muntu ua ku linga ua tuameka via mu lutsilielo, vunoni ue kueha na ku vuisa ndzolela ku kala neni.

Ndumbuetu Tamara ua puile ua ku zanguluka. Cifua ca lemenenemo vusunga na ku ambulula, ca kele na ku vuisa cizango ca ku mu tambuluisa. Nja komokele nguange, ‘Vati honi mukuetu ue ku fuitangana ku pangela Yehova vunoni ka ce ku mu futula, ange co nje ku linga ca helu-helu lika ca nji futuka?” Cifua ca cili ca kele na ku muenamo vipanga via Yehova, kaha na ndzolela ya vusunga ya kele nayo via nji kuatele cikuma ku mutima. Lungano lueni lua nji kuasele ku hilula hali ovu vusunga vua seho: Yehova ua tonda tu vose tu mu pangele “na ndzolela.”—Visa. 100:2.

Nange nja tondele ku kala na cifua ca ndzolela ya kele nayo ndumbuetu Tamara. Vunoni linga nji vi puisemo nja tondekele ku alulula viuma via kama mu muono uange. Mua hitile ntsimbu, vunoni kamandende-kamandende nja putukile ku hana vinanga via katete. Nja putukile ku livuahesela vuino ntsimbu kanda nji tuhuke mu lihia, kaha na ku linga vupioneiro vua ku kuasa vintsimbu vimo. Evi via nji  kuasele ku tepulula ku ku lisosomua cange na ku nji puisa ua ku simpa. Mu nja putukile ku pangesa mua kama Mbimbiliya mu ku ambulula, cipanga caco ca putukile ku nji tovala. Mu ntsimbu ya indende, nja putukile ku linga vupioneiro vua ku kuasa mu vingonde viose.

Nja putukile ku likata na vavusamba va vitso viose, vaze va tuamekele vipanga via Yehova, kaha va lemene ku lingamo. Malungano avo a cili, a nji kuasele ku noneka vuino viuma via kala na seho mu muono, na ku putuka ku tanda Mbimbiliya matangua ose. Cipanga ca ku ambulula ca tualeleleho ku nji tovala, kaha mu nima ya ntsimbu nja puile pioneiro ua ntsimbu yose. Ngeci, mu nima ya miaka ya yingi, nja putukile honi ku ivua ndzolela na ku mona ngecize nja pandama mu cikungulukilo.

Mu nima ya muaka, nja litantekeyele muanetu Alex, ua puile mukua ngozi kaha mukua vusunga, uze ua lemene Yehova na cipanga ca ku ambulula. Ua puile mukua ku kuasa vipanga kaha tele ali laza mu cipanga ca vupioneiro miaka 6. Kaha ntsimbu imo, muanetu Alex ua ka pangelele naua kuze kua tondekele vukuasi ku Malauí. Mua ka keleko, ua ka likatele na vamisionaliu vaze va mu muesele lungano lua cili na ku mu kaniamesa a tualeleleho ku tuameka Vuangana.

Mu 2003, tua liambatele, kaha tue ku tualelelaho mu cipanga ca ntsimbu yose na lelo lino. Tua lilongesa viuma via vingi via seho kaha Yehova ua tu vezikisa mu vinjila ka tu hasa ku tanda.

Mu 2009, va tu laniene ku ka linga vumisionaliu ku Timor-Leste, kamo ka cifuti kakandende ka kala ku hiehi na Indonesia. Tua komokele na ku ivua ndzolela, vunoni tua lisosomuene. Mu nima ya vingonde vitanu, tua ka hetele ku cikota ca cifuti caco, ku Dili.

Ku nunguluka caco, ca tondekele tu alulule viuma via kama mu muono. Tua pandele ku litombuosa ku cisemua, lilimi, via ku-lia kaha na yoyesi ya iha. Mu tua kele na ku ambulula vintsimbu via vingi tua kele na ku mona vantu vali mu vuhutu vua kama, ka va lilongesele,  kaha naua va kele na ku va pakesa. Kaha tua muene naua va vengi va kele na vulema vua ku muvila na vua mu visinganieka omo lia ndzita na vukenia via hitile mu cifuti. *

Vi tua kele na ku uana mu lihia via kele na ku tu komouesa! Ca ku muenako, tangua limo nja uanene umo kanike ua mpuevo ua miaka 13, ua lizina Maria, ali mu vusiua. * Vanaye va tsile imo miaka ku nima, kaha va ise ua kele lika na ku va mona noho-noho. Kaha ngeci mua vanike vavengi va citso ceni, Maria ka kele na muntu ua ku mu tuamenena mu muono. Tangua limo, ua kele na ku lila mua kele na ku nji lomboluela visoti vieni. Vunoni ka njevuisisile via kele na ku handeka muomu tele kanda nji tantekeye vuino lilimi liavo. Nja vundilile kuli Yehova a nji kuase ku lembezieka uze kanike, kaha nja putukile ku mu tandela vinimbu via ku lembezieka via mu Mbimbiliya. Mu miaka ya hateleko, nja muene vusunga vu alulula muono ua Maria, vua aluluile vilinga vieni, cifua ca kele na ku solokelamo na visinganieka vieni. Va mu mbatizile, kaha neni ua kala na vilongesa via Mbimbiliya. Lelo lino, Maria ua kala na vusoko vua kama vua mu lutsilielo, kaha ue ku livua ngecize va mu lema.

Yehova ali na ku vezikisa vipanga vietu mu Timor-Leste. Vutuhu cingi ca vakua ku ambulula va va mbatiza lika mu miaka 10 i na hiti ngeci, cingi cavo va napu laza vapioneiro, vakua ku kuasa vipanga, ni vakuluntu. Vamo ve ku pangela ku viseketa via ku languluila ni nguetu viRTO, mu ku kuasa ku tuhula via-ku-lia via mu lutsilielo mu malimi a cisemua. Mua vusunga, ca kele na ku nji vuisa ndzolela ya kama ku vevua vemba ku viuano, ku mona vihanga viavo via ndzolela, na ku mona ku kola cavo mu lutsilielo.

Cipanga cetu ku Timor-Leste ca kele ku laako-laako, na muono u tua kele nauo ku Australia, vunoni ka nja singaniekele muono ueka ua ku hiana ou. Vintsimbu vimo mu mangendzi, tua kele na ku lilundika mu kalikalu kakandende, ava va na ambata vantsi, ava va na ambata mafo a ku ka landesa na vikuavo via ku liseza-seza. Vintsimbu vimo, tua kele na ku endesa vilongesa via Mbimbiliya mu tundzivo tua tundende tua ntuima, oku naua tusumbi va lizenga-zenga. Vunoni vutuhu tua hitile mu visoti viose evi, vintsimbu via vingi nja kele na ku handeka nguange, ‘Ou ukeuo muono ua ku tovala!’

Mu nje ku singanieka ha muono uange ku nima, nje ku santsela cikuma ku visemi vange ngecize va lihakelele kapandi ka ku nji longesa via Yehova na ku nji kuasa cipue mu miaka ya ikalu ya vunkavala vuange. Visimo 22:6, ya lipuisamo mu muono uange. Vanana na vatate mueka va tu lema nange na yaliange Alex, ve ku viukilila cikuma mu ku mona Yehova a tu pangesa. Tunde mu 2016, tue ku linga vuniungi vua ku zinguluka ku Australasia.

Nje ku komoka mu nje ku mona ngecize, kua kele imo ntsimbu i nja zindile ku ambulula. Muomu lelo lino mueka nja lema cipanga caco! Kaha nja nongonona ngecize, vutuhu tu hasa ku hita mu mpisa-mpisa mu muono, ndzolela ya vusunga ye ku iza omo lia ku pangesa Yehova na mutima uose. Mua vusunga, miaka 18 i nje ku pangela Yehova hamo lika na yaliange, ikeyo miaka ya ndzolela cikuma kuli ange. Lelo lino, nje ku ivuisisa vusunga vua mezi a handekele mukua visamo Ndaviti kuli Yehova ngueni: “Vose vaze va tinina muli ove va viukilile, ntsimbu yose va tambeke na ndzolela. . . . Na vaze naua va lema lizina liove va zolele muli ove.”—Visa. 5:11.