Omo lia vika Yesu ua tumbuile mezi a Ndaviti a ku Visamo 22:1, tele a lingila ku tsa?

▪ Tele Yesu kanda a ci tse, ua handekele mezi a ku Mateo 27:46, ngueni: “Njambi yange, Njambi yange, vikandzo u na nji sila?” Mu ku handeka aa mezi, Yesu ua puisilemo mezi a handekele Ndaviti ku Visamo 22:1. (Mako 15:34) Ka citava tu singanieke nguetu mu ku handeka aa mezi, Yesu ua tondele ku paya Ise ngecize na mu seza, ni ku singanieka nguetu Yesu ua likelele ku kulahela Ise ha ntsimbu yaco, houe. Muomu Yesu ua tantekeyele vuino vika ua pandele ku tsila. Kaha ua lihanene ku cizango mu ku lingamo. (Mat. 16:21; 20:28) Cikuavo naua, Yesu ua tantekeyele ngecize Yehova ka ka mu “sitila citungu” na cimo cahi mu ku mu niunga. Omo lia vika? Muomu ku-tsa ceni ca tondekele. (Yombi 1:10) Kaha Yehova ua likelele ku niunga Yesu, linga Yesu a muese ha toma ngecize a ka tualelelaho ku ononoka Ise, cipue nga ku-tsa ceni ci kaluua vati.—Mako 14:35, 36.

Amba vika honi Yesu ua handekelele mezi a ku Samo 22:1? Vutuhu ka tuesi na vusunga vuaco, vunoni tu hilulenu ha vimo viuma halumo via mu lingisilemo. *

Vuno mu ku handeka aa mezi, Yesu ua tondele ku muesa ngecize Yehova ka ka lingi na vimo viahi ku tuala ha ku-tsa ceni ni? Yesu ua pandele ku fueta nkombelo ca ku hona vukuasi vua Yehova. Kaha mu ku linga Yesu ua puile muntu, ua pandele vene ku-tsa linga “a makele ku-tsa omo vose.”—VaHe. 2:9.

 Vuno Yesu mua tumbuile mezi a ku cinimbu cimo lika, ua tondele vantu va singanieke ha Samo yaco yose ni? Ku matangua aze, vaYundeya va kele na ciizilila ca ku patekela visamo. Ngeci mukemuo, ku va vuluisa cinimbu cimo, ce ku va lingisile ku vuluka Samo yaco yose. Nga evi vikevio via tondele Yesu, kaha cili vene ua hasele ku kuasa vaYundeya va kele na ku mu kava, va vuluke vupolofeto vua ku liseza-seza vua kala ku Samo yaco ku tuala ha ku-tsa ceni. (Visa. 22:7, 8, 15, 16, 18, 24) Cikuavo naua, ku Samo yaco va handekako via ku vula ca Vuangana vua Yehova, cize ci ka lisanduoka na kua lenga mavu.—Visa. 22:27-31.

Mu ku tumbula aa mezi a Ndaviti, vuno Yesu ua tondele ku muesa ngecize ka kele na mulonga ni? Tele kanda va mu tsihe, Yesu va mu sompesele mu vuhenge na ku mu tuika mulonga ua ku sahula Njambi. (Mat. 26:65, 66) Mu va kuatele Yesu, vakua mpunga vuasi-vuasi va likunguluile na ku mu sompesa ku vutsiki, vutuhu ku lingamo ca puile ku tsiha lisiko lia cifuti. (Mat. 26:59; Mako 14:56-59) Mu ku hula ngueni, “Njambi yange, Njambi yange, vikandzo u na nji sila?” halumo Yesu ua tondele ku muesa ngecize ka vulumuine mulonga na umo uahi ua pandele ku tsila.

Vuno Yesu ua tondele ku vuluisa vakuavo ngecize, vutuhu Ndaviti ua yandele, vunoni eci ka ca lombolokele ngecize ka kele na kuya Yehova ku mutima ni? Cihula ca Ndaviti ka ca muesele ngecize ua likelele ku kulahela muli Njambi. Muomu mu nima ya ku linga cihula caco, Ndaviti ua putukile ku sangala Yehova omo lia ngolo yeni ya ku ohiela, kaha Yehova ua tualeleleho ku mu vezikisa. (Visa. 22:23, 24, 27) Na vuno vene, vutuhu “muana Ndaviti” Yesu va mu sukikile ha citi, vunoni eci ka ca lombolokele ngecize vilinga vieni ka via kele naua na kuya Yehova ku mutima.—Mat. 21:9.

Vuno Yesu ua tondele ku muesa ku linienga ceni ngecize Yehova ua likelele ku mu niunga linga a muese mu vutuntu ku ononoka ceni kuli Ise ni? Tundeko, Yehova ka kele na vutumbe vua ku ecelela Muaneni a yande na ku-tsa. Evi via tondekele lika mu nima ya ku vulumuna ca va Andama na Eva. Yesu ka lingile vupi na vumo vuahi, vunoni ua pandele ku tsa linga a kumbulule vihula via katuile Satana na ku hana cikombelo cize ca tondekele mu ku tu patula. (Mako 8:31; 1 Pet. 2:21-24) Linga evi vi lipuisemo, ca tondele Yehova a likele ku niunga Muaneni mu ntsimbu imo. Kaha ntsimbu yaco, ikeyo ya katete ya kele Yesu ca ku hona vukuasi vua Ise.

Vuno Yesu ua kele na ku kuasa vandongesi veni va tuale mana ku vusunga vua lingisile Yehova ecelele Yesu ku tsa mu cifua cize ni? * Yesu ua tantekeyele ngecize ku-tsa mu ku mu sukika ha citi ngue mbanditu, ce ku suntsuisile vantu vavengi. (1 Kol. 1:23) Vunoni nga vakua ku mu kava va tualele mana ku vutumbe vua tsililile, kaha ve ku ivuisisile seho ya ku tsiha mu cifua cize. (Ngal. 3:13, 14) Ve ku ivuisisile ngecize ua puile Muovole uavo kati mbanditu.

Ka tu tantekeya via lingisile Yesu ku handeka mezi a ku Visamo 22:1, vunoni ua tantekeyele ngecize ku-tsa ceni ca litombuele na cizango ca Yehova. Kaha mu nima ya ntsimbu ya indende, tunde ha handekelele mezi a ku samo yaco, Yesu ua handekele ngueni: “Vi na hu.” (Yoa. 19:30; Luka 22:37) Cili vene ku ecelela Yesu ca ku hona ku mu kuasa mu ntsimbu imo, ca mu hele vukovelelo vua ku puisamo vize mpundu vi va mu tuminine hano ha mavu. Kaha ca mu hele naua vukovelelo vua ku puisamo viose vi va sonekele ku tuala hali ikeye “ku mezi a lisiko a Mosesa na ku vapolofeto na ku visamo.”—Luka 24:44.