1. Vika Yehova ue ku mona mu vantu veni?

YEHOVA NJAMBI “ua lema vantu veni.” (2 Mizi. 2:11) Aa mezi, a vuisa ndzolela ya kama! Yehova ue ku mona vifua vietu via cili, ue ku mona viuma vi tu hasa ku puisamo, kaha ue ku tu kuasa ku likuata vusamba neni. Cikuavo naua, nga tu muesa lukakatela kuli ikeye, a ka tualelelaho ku pua kavusamba ketu ku miaka yose!—Yoa. 6:44.

2. Omo lia vika vamo ce ku va kaluuila ku tava ngecize Yehova ua va lema?

² Vamo ve ku handeka nguavo, ‘Nji tantekeya ngecize Yehova ua lema vantu veni mu ku pua civunga, vunoni vusunga vuka njili navuo ngecize nange vene ua nji lema?’ Vika vi hasa ku lingisa muntu ku livua ngoco? Ndumbuetu Oksana, * u va yandesele cikuma ku vunike, ngueni: “Nja vuile ndzolela ya kama mu va nji mbatizile kaha nja putukile vupioneiro. Vunoni mu nima ya miaka 15, nja putukile ku vuluka lamba yose i nja hitile ku vunike. Ngeci nja putukile ku livua ngecize ka nje kuya Yehova ku mutima kaha ka nja fuililile ku nji lema kuli ikeye.” Umo ndumbuetu mukuavo ua pua pioneiro ua yandele cikuma ku vunike, ua lizina Yua ngueni: “Nja lihanene kuli Yehova muomu nja tondele ku mu vuisa ndzolela. Vunoni nja kele na vusunga ngecize na limo litangua liahi a ka nji lema.”

3. Vika tu lilongesa mu cilongesa cino?

³ Ngeci mua vandumbuetu vavali va tua tumbula, nenu mua lema Yehova na mutima uenu uose. Vunoni, halumo mue ku takania nga ikeye ua mi lema. Omo lia vika mua pande ku kala na vusunga ngecize Yehova ua mi lema cikuma? Kaha vika vi  hasa ku mi kuasa, nga visinganieka via ku henga vi na putuka ku mi yandesa? Tu hilulenu vikumbululo vievi vihula.

4. Vika ca puila vusonde ku takania nga Yehova ua tu lema?

⁴ Cilemo ca kala na ndzili ya ku tu sindiya ku linga viuma. Ca ku muenako, nga tuli na vusunga ngecize Yehova ua tu lema mpundu kaha ue ku tu kuasa, tu kevua cizango ca ku mu pangela na mutima uetu uose, ambe nga tu hita mu visoti. Vunoni nga tu takania, nga Yehova ua tu lema ni kuahi, ‘ngolo yetu i ka pua ya indende.’ (Visi. 24:10) Kaha nga tu ivua vusiua na ku singanieka nguetu Njambi ka tu lemene, Satana ci ka mu puila ca casi ku tu luisa.—Efe. 6:16.

5. Vika via solokela vamo vamuanetu omo lia ku takania cilemo ca Njambi?

⁵ Vamo vamuanetu, va zeya mu lutsilielo omo lia ku takania. Umo mukuluntu mu cikungulukilo ua lizina James ngueni: “Vutuhu nja kala ha Mbetele, kaha naua nja lema ku ambulula mu cikungulukilo ca lilimi lieka ci nja kala, vunoni laza nja kele na ku takania nga kapandi ka nje ku lihakela ka ku pangela Yehova ke ku muya mpundu ku mutima. Kaha ntsimbu imo, nja putukile vene na ku takania nga Yehova ue ku halakana ku vivundilo viange.” Ndumbuetu Eva neni ua kala mu cipanga ca ntsimbu yose ua handekele ngueni: “Nja nongonuene ngecize ku takania nga Yehova ua tu lema ni kuahi, ca pua vusonde vua kama. Muomu ce ku putuka ku kuata ku viose vi tue ku lingila Yehova. Vie ku zima cizango cetu ca ku kaniamesa lutsilielo luetu na ndzolela i tua kala nayo mu ku pangela Yehova.” Muanetu Michael ua pua pioneiro ua ntsimbu yose kaha naua mukuluntu mu cikungulukilo, ngueni: “Nga ka mua tsilielele ngecize Njambi ua mi lema kaha ua mi haka seho, mu ka putuka ku tanguka kuli ikeye.”

6. Vika tua pande ku linga nga ku takania cilemo ca Njambi ci na putuka ku tu kovela mu visinganieka?

⁶ Eyi mizimbu, ya muesa luvinda lue ku iza mu ku takania cilemo ca Yehova kuli yetu. Vika honi tua pande ku linga nga tu putuka ku takania cilemo ca Yehova kuli yetu? Tua pande ku likela ku visinganieka mu ntsimbu oyo vene! Kaha hingisenu visinganieka viaco na “ciyulo ca Njambi cize ca hiana mana ose,” muomu “ci ka niunga mitima yenu na visinganieka vienu.” (Visa. 139:23; Fili. 4:6, 7) Kaha vulukenu ngecize ka muesi lika lienu. Kua kala vamuanetu na vandumbuetu vakuavo ve ku pinda na visinganieka via ku livua vungoco. Cikuavo naua, vamo vangamba va Yehova va va tumbula  mu Mbimbiliya navo va pindile na visinganieka viaco. Tu talenu vika tu hasa ku lilongesa ku lungano lua kapostolo Paulu.

7. Citanga cika ua kele na ku pinda naco Paulu?

⁷ Vuno vintsimbu vimo mue ku livua ngecize viteli vi na mi lanena cikuma kaha ka mu hasa ku vi puisamo viose ni? Nga mukemuo, kaha mu hasa ku ivuisisa via lihitile navio Paulu. Paulu uomine mutima, kati ku cikungulukilo cimo lika, vunoni ku “zimbunga ziose,” ni nguetu ku vikungulukilo viose. (2 Kol. 11:23-28) Vuno mua kala na cisoti ca cihindu ce ku mi zima ndzolela ni? Paulu neni ua pindile na “lumbimbo mu muvila” kaha lumbimbo luaco halumo lua puile umo musongo mpundu ua kele na ku pinda nauo kaha ua tondele cikuma ku kanguka. (2 Kol. 12:7-10) Vuno ku hona ku tantuluka cenu ce ku mi vuisa vusiua ni? Mukemuo mua livuile Paulu vintsimbu vimo. Kaha ua hetele na ha ku litumbula ngueni, “mukua luvinda” omo lia ku pinda ku sua kumo na ku hona ku tantuluka.—Loma 7:21-24.

8. Vika via kuasele Paulu ku lua na visoti vieni?

⁸ Vutuhu Paulu ua hitile mu vitanga viose evi, vunoni ua tualeleleho ku pangela Yehova. Kulihi ua uanene ndzili ya ku lingamo? Vutuhu ua tantekeyele ngecize ua kele na visevuka via vingi, vunoni ua kulahelele cikuma mu nkombelo. Kaha naua, ua tantekeyele cikulaheso ca Yesu ngecize “uose a tsiliela muli [Yesu] kati a ka nonge, vunoni a kale na muono ka ue kuhua ua ya-ye.” (Yoa. 3:16; Loma 6:23) Cili vene, Paulu ua muesele lutsilielo mu nkombelo ya Yesu. Ua kele na vusunga ngecize Yehova ue ku ecela cipue vaze vene va vulumuine milonga ya kama nga va aluluka.—Visa. 86:5.

9. Vika tu lilongesa ku mezi a Paulu a ku Ngalata 2:20?

⁹ Paulu ua tsilielele naua ngecize Njambi ua mu lema cikuma muomu ua tumine muaneni Yesu mu ku mu tsila. (Tandenu Ngalata 2:20.) Talenu mezi a ku lembezieka a tumbuile Paulu ku ntsongo yeci cinimbu. Ua handekele ngueni: “Muana Njambi . . . “ikeye ua nji lemene, kaha ua liecele ivene omo yange.” Paulu ka tepuluile ku vukama vua cilemo ca Njambi ni nguetu ku handeka ngueni, ‘Nja mono honi via lingisa Yehova ku lema vamuanetu, ange kuahi houe.’ Vunoni ua vuluisile vakua Kilistu mu Loma ngueni: “Muze te tu vakua vipi, Kilistu ua tu tsilile.” (Loma 5:8) Na vimo viahi vi hasa ku imika cilemo ca kala naco Njambi kuli yetu!

10. Vika tu lilongesa ku Loma 8:38, 39?

¹⁰ Tandenu Loma 8:38, 39. Paulu ua tantekeyele ngolo i ca kala naco cilemo ca Njambi. Ua sonekele ngueni: Ka kuesi cuma na cimo cahi “ci hasa ku tu hangununa ku cilemo ca Njambi.”  Paulu ua tantekeyele vukama vua lukakatela lua muesele Njambi ku va Isaleli. Ua tantekeyele cikeketima ca muesele Yehova kuli ikeye mpundu. Ca puile ngue Paulu ua handekele ngueni, ‘Mu ku linga Yehova ua tumine Muaneni mu ku nji tsila, ka nja pandele ku takania nga ua nji lema ni kuahi.’—Loma 8:32.

11. Vutuhu Paulu ua lingile vipi ngeci mua vize vi va tumbula 1 Timoteo 1:12-15, omo lia vika ua kele na vusunga ngecize Njambi ua mu lema?

¹¹ Tandenu 1 Timoteo 1:12-15. Citava halumo vintsimbu vimo Paulu ua kele na ku livua mua ku viha mua kele na ku singanieka ha viuma via lingile tele kanda a pue Mukua Kilistu. Ka ci tu komouesa ku tantekeya ngecize Paulu ua litumbuile ngueni, “yange nja hiana” vakua vupi vose! Muomu tele kanda a tantekeye vusunga, Paulu ua kele na ku yandesa Vakua Kilistu, tunda mbonge ya mbonge. Vamo ua kele na ku va haka mu tumenga kaha vakuavo ua kele na ku hakuila cihangula ca ku va tsiha. (Vili. 26:10, 11) Aci singaniekenu vati ua livuile Paulu mua kele na liuana na vamo vana va vaze Vakua Kilistu va tsihisile. Mua vusunga, ua liveyele visevuka vieni, vunoni ua tantekeyele ngecize ka citava ku alulula viuma via hita laza. Ua tavele ngecize Yesu ua mu tsililile, ngeci na vusunga vuose vua sonekelele ngueni: “Ku kavumbi ka Njambi, ha nji na pu ha nja pua vene.” (1 Kol. 15:3, 10) Vika tu lilongesaho? Tavenu ngecize Kilistu nenu ua mi tsililile kaha ua mi sokoluela njila linga mu likuate vusamba na Yehova. (Vili. 3:19) Vie ku tuala mana Yehova, via pua vize vi tu linga mu ntsimbu ino na ku lutue, kati visevuka vi tua lingile ku nima, cipue nga tua puile tu Vakaleho va Yehova ni kuahi.—Isaya 1:18.

12. Vati mezi a ku 1 Yoano 3:19, 20, a hasa ku tu kuasa nga tu livua ngecize ka tua kele na seho ni ka citava ku tu lema?

¹² Mu tue ku singanieka ha viuma via lingile Yesu mu ku tu tsila, tu hasa ku livua nguetu ka nja fuililile ku nji lingila viuma via ku pua oho.  Omo lia vika mu hasa ku livua ngoco? Muomu mitima yetu ya ku hona ku tantuluka ye ku tuonga ngecize tu vilinge via ngoco ni ka citava ku tu lema. (Tandenu 1 Yoano 3:19, 20.) Ha vintsimbu viaco tua pande ku vuluka ngecize “Njambi ua hiana mitima yetu.” Tua pande ku litavesa etu vavene nguetu Tatetu ua muilu ua tu lema cikuma kaha ua tonda ku tu konekela. Linga tu ivuisise vuino cifua ce ku tu muenamo Yehova, tua pande ku lilongesa Lizi lieni ku sua kumo, ku tualelelaho ku vundila kuli ikeye, kaha na ku likata ntsimbu yose na vangamba veni. Omo lia vika ku linga evi ca pua ca seho?

13. Vati ku lilongesa Lizi lia Njambi ci hasa ku tu kuasa? (Talenu cikasa “ Vukuasi vu ve ku Uana mu Lizi lia Njambi.”)

¹³ Puenu na ku Lilongesa Lizi lia Njambi nkala litangua, kaha mu kevuisisa vuino vuntu vua ku komouesa vua Yehova. Mu ka nongonona vukama vua cilemo ca kala naco kuli yenu. Ku hilula Lizi lia Njambi nkala litangua, ci ka mi kuasa ku sungamesa visinganieka na vizango vienu. (2 Tim. 3:16) Muanetu Kevin ua pua mukuluntu mu cikungulukilo kaha ue ku pinda na visinganieka via ku livua vungoco, ngueni: “Ku tanda na ku hilula Visamo 103, ca nji kuasa ku sungamesa visinganieka viange na ku ivuisisa cifua mpundu ce ku nji muenamo Yehova.” Ndumbuetu Eva u tu na tumbula ha katete ngueni: “Nkala litangua nje ku limanusula mu ku singanieka ha viuma via pua via seho kuli Yehova. Kaha eci, ce ku nji lembamesa mutima na ku kaniamesa lutsilielo luange.”

14. Vati ku vundila ce ku tu kuasa?

¹⁴ Puenu na ku vundila ku-sua kumo. (1 Tes. 5:17) Ku likuata vusamba vua kama na vakuetu vantu, ca hitukila ha ku simutuila ku-sua kumo na ku lileka mpundu vize vili ku mutima. Mukemuo naua mu ca fua ku likuata vusamba na Yehova. Mu tue ku vundila kuli ikeye na ku mu leka cifua ci tue ku livuilamo ku mutima, visinganieka vietu, na ku lisosomua cetu, tue ku muesa ngecize tua mu kulahela kaha tu tantekeya nguetu ua tu lema. (Visa. 94:17-19; 1 Yoa. 5:14, 15) Ndumbuetu Yua, u tu na tumbula ha katete, ngueni: “Mu nje ku vundila kuli Yehova, ka nje ku lengela lika ha ku mu leka viuma vi nji na lingi mu ku hita ca litangua. Vunoni nje ku mu leka vize mpundu vili ku mutima uange. Kaha kamandende-kamandende nja heta ha ku limuena ngecize Yehova ka puile ngue chefi, vunoni ua pua Tatetu uze ua lema vana veni.”—Talenu cikasa “ Mua Tanda Laza Livulu Liaco Ni”

15. Vati Yehova ue ku tu muesa seho muntu ku muntu?

¹⁵ Puenu na ku likata na vamuanoko mu lutsilielo; va pua vuana vua tu hana Yehova. (Tia. 1:17) Tatetu ua muilu ue ku muesa ngecize ua tu haka seho muntu ku muntu, mu ku tu hana vusoko vua mu lutsilielo, ni nguetu vamuanetu vaze ve ku tu “lema ntsimbu yose.” (Visi. 17:17) Mu mukanda ua tumine kuli Vakua Kilistu ku  Kolose, Paulu ua tumbuilemo vamo Vakua Kilistu va mu kuasele kaha ua handekele ngueni “vakevo va na nji lembezieka.” (Kolo. 4:10, 11) Cipue Kilistu Yesu neni ua tondekele vukuasi, kaha ua santselele ku vukuasi vuose vua tambuile ku vavusamba veni, ci pue va muilu ni va hano ha mavu.—Luka 22:28, 43.

16. Vati vamuanetu va hasa ku tu kuasa ku suena kuli Yehova?

¹⁶ Vuno mue ku pangesa vuino vuana vua vamuanetu vua mi hana Yehova ni? Ku lekako visoti vienu kuli umo kavusamba ua kuhia, ka ca puile vuzeye vunoni ci hasa ku mi niunga. Halakanenu via handekele muanetu James u tu na tumbuile laza, ngueni: “Kuli kuata vusamba na Vakua Kilistu va ku hia, ca nji kuasa cikuma mu muono. Mu vie ku nji vula visinganieka via ku livua vungoco, ava vamuanetu ve ku nji halakana na lukakatela na ku nji vuluisa ngecize va nji lema cikuma. Nje ku mona cilemo na seho ya nji haka Yehova ku hitila muli vakevo.” Mua vusunga, ca pua ca seho ku tualelelaho ku kaniamesa lutsilielo na ku likuata vusamba na vamuanetu!

17-18. Iya tua pande ku halakana kaha omo lia vika?

¹⁷ Satana a tonda tu likela ku linga via cili. A tonda tu tsiliele ngecize Yehova ka tu lemene kaha ku tuovola ka ca kele na seho kuli ikeye. Vunoni ngue mu tua limuena, ka kuesi makuli eka a hiana aa.

¹⁸ Yehova ua mi lema. Mua kala na seho ya kama ku meso eni. Nga mu mu ononoka “mu ka kala-kala mu cilemo” ceni ku miaka ya ya-ye ngeci mua Yesu. (Yoa. 15:10) Ngeci mukemuo, kati mu pue na ku halakana kuli Satana ni ku mutima ueni ua ku hona ku tantuluka nga u mi paya. Vunoni puenu na ku halakana kuli Yehova, uze ue ku mona vucili mu nkala muntu. Kalenu na vusunga ngecize Yehova “ua lema vantu veni” hamo lika nenu!