MUANETU Diana a li na miaka i tuvakana 80 kaha na yanda cikuma mu miaka i na hiti ngeci. Yalieni ua kele ku ndzivo i ve ku niungila vakulupe, muomu tele ua vavala vumo vuvezi vua mu vuongo vu va tumbula nguavo vuvezi vua Alzheimer. Kaha vana vavo vavali navo va tsile, kaha muanetu Diana ua kele na cançer ya ku mavele. Vunoni ua pua mukua ndzolela ntsimbu yose, cipue mue ku ya mu ku kunguluka ni mu lihia.

Muanetu John ua puile kaniungi ua ku zinguluka mu miaka i tuvakana 43. Ua lemene cikuma cipanga caco kaha cikeco lika ca mu kele mu visinganieka! Vunoni ua pandele ku sezela ha kati cipanga ca vuniungi vua ku zinguluka linga a niunge umo kavusoko keni ua kele na ku vavala. Omo vamuanetu va mu tantekeya ve ku liuana neni ku viuano via limbo ni via muhato, ve ku handeka nguavo ka alulukile. Kasi ua pua vene mukua ndzolela ya kama!

Vati muanetu Diana na John ve ku niunga ndzolela yavo? Muomu ca cikalu muntu ali mu lamba ku zolela! Vati ve ku vi puisamo? Vati muntu na sezela ha kati cimo citeli ca lema mu cikungulukilo, a hasa ku kala na ndzolela? Mbimbiliya ya kumbulula nguayo: “Mukua vuviuke a ka zolela muli Yehova.” (Visamo 64:10) Tu hasa ku ivuisisa vuino eci cinimbu nga tu tantekeya vika vi hasa ku tu hana ndzolela ya vusunga na vika ka vi tu hanayo.

Vimo viuma kampe vie ku neha ndzolela ntsimbu yose. Ca ku muenako aci singaniekenu ha yala na mpuevo va tonda ku liambata. Ni ha muntu nga na tantekeya ngueni a pua cisemi ni nga muntu na tambula citeli mu vipanga via Yehova. Viose evi vie ku tu vuisa ndzolela muomu viose via pua vuana vua kuli Yehova. Ua tu hana vuana vua vulo, civezikiso ca ku sema vana, na vipanga mu lukungulukilo lueni.—Njenisisi 2:18, 22; Visamo 127:3; 1 Timoteo 3:1.

Vunoni vimo viuma vie ku neha ndzolela vi hasa ku pua via ntsimbu ya indende lika. Ku tuala ha vulo ca vusiua ku handeka ngecize mukua ndzivo ya muntu a hasa ku tsa ni ku enda mukuavo vungungu. (Ezekiele 24:18; Hoziya 3:1) Vana navo va hasa ku pua vakua lisino ku visemi na kuli Njambi, halumo na kuua vene mu cikungulukilo. Ca ku  muenako, vana va Samuele ka va pangelele Yehova mu njila ya muya ku mutima, kaha Ndaviti ua kele na visoti via vingi mu vusoko omo lia ku vulumuna na Mbateseva. (1 Samuele 8:1-3; 2 Samuele 12:11) Mu vie ku soloka viuma via cifua eci, ka vie ku tu nehela ndzolela vunoni vusiua na ku vavala ca kama ku mutima.

Kaha naua, vamo ha kati ka vaze vali mu cipanga ca ntsimbu yose ka ve ku hasa ku tualelelaho ku kalamo omo lia ku vavala, ku niunga vusoko, ni omo lia cimo ku aluluka ca viuma mu lukungulukilo. Vamo va sezela ha kati viteli viavo ve ku handeka nguavo ve ku ivua vusona vua ndzolela i va vuile mu va kele mu cipanga caco.

Mua vusunga ca casi ku mona ngecize vintsimbu vimo ndzolela yaco ka ye ku simbula. Evi vie ku katula cihula: Vuno kua kala cimo cifua ca ndzolela ye ku tualelelaho ambe vene nga muntu a hita mu visoti ni? Eyo noho ci kaleko, muomu Samuele, Ndaviti, na vakuavo ka va zimbalesele ndzolela yavo, cipue vene mu va hitile mu vieseko.

Yesu ua tantekeya vika ya pua ndzolela ya vusunga. Tele kanda a ci ize ha mavu, Mbimbiliya nguayo ua puile “ku viukilila ntsimbu yose ku meso” a Yehova. (Visimo 8:30) Vunoni muezile ha mavu ua hitile mu visoti via vikalu cikumakuma. Vunoni Yesu ua kele na ndzolela mu ku linga cizango ca Ise. (Yoano 4:34) Amba co mu va mu sukikile? Vutuhu ua kele mu ku vavala ca ku hiana, Mbimbiliya nguayo ua kolesele omo lia “ndzolela ize i va mu hakelele.” (VaHevelu 12:2) Ngeci mukemuo tu hasa ku lilongesa via vingi ku viuma vivali via handekele Yesu ku tuala ha ndzolela ya vusunga.

Tangua limo, mu nima ya ku tuma vandongesi 70 mu ku ambulula, va hilukile kuli ikeye. Vezile na ndzolela ya kama omo lia viuma vi va hasele ku linga, ngeci mua ku tundisa vandemone. Vunoni Yesu ua va lekele ngueni: “Cipue ngoco, kati mu zolele omo vimbembesi vi na mi ononoka; vunoni zolelenu muomu va na soneka mazina enu muilu.” (Luka 10:1-9, 17, 20) Mua vusunga, ku tu tava kuli Yehova ca hiana seho kaha ce ku vuisa ndzolela ku hiana nkala cipanga ceka ca ku lifuila.

Tangua lieka, tele Yesu ali na ku longesa civunga ca kama, umo mpuevo ua komokele cikuma vilongesa via Yesu ngeci ua handekele ngueni vanaye ya Yesu va puile mpuevo ua ku vezika. Vunoni Yesu ua mu kumbuluile ngueni: “Va vezika vaze vevua lizi lia Njambi na ku li niunga.” (Luka 11:27, 28) Vilinga via vana vi hasa ku vuisa muntu  ndzolela. Vunoni ndzolela ka ye ku hua, muntu ue ku ivua omo lia ku ononoka Yehova na ku likuata vusamba vua cili neni.

Ku ivua ngecize Yehova na viukilila netu ce ku tu vuisa ndzolela ya kama. Kaha vutuhu vieseko vie ku tu vuisa vusiua, ka vi hasa ku tu zima ndzolela yaco. Vunoni mu tue ku kolesa mu vieseko, ndzolela yetu ye ku livuezelela. (Loma 5:3-5) Cikuavo naua Yehova ue ku hana sipilitu yeni kuli vaze va mu kulahela, kaha ndzolela yaco ya pua umo ua mihako ya sipilitu yaco. (Ngalata 5:22) Eci ce ku tu kuasa ku ivuisisa vi ya handeka Visamo 64:10 nguayo: “Mukua vuviuke a ka zolela muli Yehova.”

Eci naua ca tu kuasa ku ivuisisa via kuasele vamuanetu Diana na John ku tualelelaho ku ivua ndzolela vutuhu va hitile mu visoti. Ndokazi Diana ngueni: “Nja tinina muli Yehova ngue mue ku tinina muana kuli cisemi ceni.” Kaha naua ngueni: “Nje ku ivua ngecize ua nji vezikisa na vuhasi vua ku tualelelaho ku ambulula ntsimbu yose na cihanga ca ndzolela.” Vika via kuasele ndolome John ku tualelelaho ku muesa ndzolela na ku fuitangana mu lihia mu nima ya ku sezela ha kati citeli ca kele naco? Ivene ngueni: “Tunde mu 1998 va nji hanguile ku pua mulongisi ua Escola de Treinamento Ministerial, nja vueza ku kapandi kange ka ku lilongesa mu vulika.” Kaha ngueni ku aluluka ci va pandele ku linga neni na mpueyeni ca puile ca casi muomu ntsimbu yose va kele na cizango ca ku linga viose via va tumine Yehova. Ua vuezeleko naua ngueni: “Tue ku pangela Yehova mu nkala cipanga ca tu hana ca ku hona ku liveya.”

Cingi ca vamuanetu vakuavo navo va limuena ngecize vi ya handeka Visamo 64:10, via vusunga. Ca ku muenako, umo muanetu na mpueyeni va pangelele ha Mbetele ya ku Estados Unidos miaka 30, va va tumine mu vupioneiro vua ku lifuila. Kaha va litavelele nguavo: “Muntu uose ue ku linienga nga na zimbalesa cuma ca lema. Vunoni ka ci tondeka ku linienga ku miaka yose.” Ngeci mukemuo, mu va tambuile cipanga ca vupioneiro, va ile na ku putuka ku panga ca ku hona ku kuata-kuata mu masinde. Kaha va handekele nguavo: “Kaha tua vundilile vimo vi tua tumbuile mpundu ha mazina kuli Yehova. Ku mona cifua ca kumbuluililemo Yehova vivundilo vietu ca tu kaniamesele na ku tu vuisa ndzolela. Kaha tele tu cili lika ntsimbu ya indende mu cikungulukilo vamo vamuanetu mu cikungulukilo navo va putukile vupioneiro, kaha tua kele na civezikiso ca ku putuka ku endesa vilongesa via Mbimbiliya ku vantu vavali va kolele vuasi mu lutsilielo.”

Tua tantekeya nguetu ku kala na ndzolela ntsimbu yose kati ca casi. Vintsimbu vimo tu kevua vusiua. Vunoni Yehova ua tu hana vusunga na mezi a ku Visamo 64:10. Ambe tu li mu vusiua vunoni nga tu kolesa mu nkala ceseko ci tu hita, tu kalenu na vusunga ngecize tu ka “zolela muli Yehova.” Kaha tua lavelela naua ku lipuisamo ca cikulaheso ca Yehova ca “melu a aha na mavu a aha.” Ku ntsimbu yaco tu vose tu ka pua va ku tantuluka kaha tu ka ‘zolela na ku viukilila ku miaka yose’ omo lia viose via ka tu lingila Yehova.—Isaya 65:17, 18.

Aci singaniekenu vati u ka fua muono. Tu ka kala na cihindu ca ku tantuluka kaha matangua ose tu ka hinduka na ndzili ya kama. Ambe nga mu mavu ano kuli vimo via tu vuisile vusiua vua kama, ka tu ka vi vuluka naua. Yehova ua tu hana vusunga vuaco ngueni: “Vize via laza ka va ka vi vuluka, cipue ku heta ku visinganieka.” Tu ka tambula vavusoko vuetu va tsa na ku ivua ngue mu va vuile visemi va uze kanike ua miaka 12 ya sanguile Yesu. Mbimbiliya nguayo “va vuile ndzolela ya kama cikuma-kuma.” (Mako 5:42; NW) Kaha muntu uose ha mavu a ka pua mukua vuviuke mu vutantuluke na ku “zolela muli Yehova” ku miaka yose.