1-2. Omo lia vika kaha vati Yehova ua sokolola njila linga tu pue mutamba ua vusoko vueni?

YEHOVA na tu lania tu kovele mu vusoko vueni vua vakua ku mu lemesa. Ca pua cilanio ca seho ya kama mpundu! Mu vusoko vuaco mua kala vaze va lihana kuli Njambi na ku muesa lutsilielo mu nkombelo ya Muaneni. Tua kala mu vusoko vua ndzolela. Tue ku yoya muono ua ndzolela kaha tua lavelela muono ka ue ku hua cipue nga muilu ni ha mavu mu citungu.

² Ku cilemo ceni, Yehova ua sokolola njila linga netu tu hase ku pua mutamba ua vusoko vueni. (Yoa. 3:16) Va tu landele “na ndando” ya kama. (1 Kol. 6:20) Ku hitila mu nkombelo, Yehova ua asiuisile viuma linga tu hase ku likuata vusamba neni. Ngue mu tua lilongesele mu cilongesa ci na hiti Yehova ua pua Tatetu ua cilemo.

3. Vihula vika tu hasa ku linga? (Kaha talenu mu cikasa “ Vuno Yehova ue ku Nji Mona Ni?”)

³ Netu tu hasa ku livua ngue mua sonekele umo mukua Visamo ngueni: “Vika nji ka fueta kuli Yehova Omo vivezikiso vieni viose kuli ange?” (Visa. 116:12) Cikumbululo cetu nguetu viahi vi tu hasa ku hiluisila Tatetu ua muilu. Ngeci tue ku ivua ntsindiye ya ku mu lema. Kapostolo Yoano ua sonekele ngueni: “Etu tu lema, muomu ikeye ua livangele ku tu lema.” (1 Yoa. 4:19) Mu vinjila vika tu hasa ku muesa cilemo cetu kuli Tatetu ua muilu?

4. Kuliya na Tiango 4:8, omo lia vika tua pande ku linga cose tu suene kuli Yehova?

⁴ Yehova ua tonda tu suene mu hiehi neni na ku simutuila neni. (Tandenu Tiango 4:8.) Ua tu mamuna ngueni: “Kakatelenu mu ku vundila,” kaha na likuminia ku tu halakana ntsimbu yose. (Loma 12:12) Ke ku ivua cisulila ca ku tu ivua. Netu naua tue ku halakana kuli ikeye mu ku tanda lizi lieni Mbimbiliya, hamo na mikanda ye ku tu kuasa ku ivuisisa. Tue ku mu halakana naua mu ku tuala mana ku viuano vietu. Ngeci mua vana ve ku livua mu hiehi na visemi vavo mu ku simutuila navo ku sua kumo, netu tu ka livua mu hiehi na Yehova nga tu pua na ku simutuila neni ku sua kumo.

5. Vati tu hasa ku tovalesa vivundilo vietu?

⁵ Aci singaniekenu ha cifua ci mue ku handekelamo na Njambi. Yehova ua tonda tu pue na ku sokolola mutima uetu kuli ikeye mu vivundilo. (Visa. 62:8) Ca pua ca seho ku lihula nguetu: ‘vuno vivundilo viange via pua lika via helu-helu ni ngue via ku soneka laza, ni vie ku tunda ku mutima, ngue mukanda ua ku soneka ku mavoko?’ Mua vusunga mua lema Yehova na mutima uose, kaha mu tonda ku kaniamesa vusamba vuenu neni. Vunoni linga vi lipuisemo, ca tondeka mu pue na ku simutuila neni ku sua kumo. Mu mu leke vimo via mu vusueke. Mu lekeni vie ku mi vuisa ndzolela ni ku mi umisa mutima. Kalenu na vusunga ngecize mu hasa ku mu vundila vukuasi.

6. Vika tua pande ku linga tu suene mu hiehi na Tatetu?

⁶ Linga tu suene mu hiehi na Tatetu ua muilu, tua pande ku mu santsela. Tue ku livua vene ngue mukua Visamo ua sonekele ngueni: “A Yehova Njambi yange, via vingi vipupu viove via ku komouesa vi u na lingi, Na visinganieka viove via kuli etu: Na umo a hasa ku ku lekavio uahi; Nga nja hiangele ku vi zimbula na ku vi tumbula, Via hiana ku vi tanda cavio.” (Visa. 40:5) Ka tue ku muesa lika ku santsela; vunoni tue ku muesa mu mezi na vilinga vietu ku santsela cetu kuli Yehova. Kaha eci ce ku tu tepesa cikuma ku vantu vavengi lelo lino. Tua yoya ha kati ka vantu ka ve ku haka seho ku viose vie ku va lingila Njambi. Cimo ca vi tantekeyeso ca ku “matangua aze a ku kotokela” ca pua ku hona ku santsela. (2 Tim. 3:1, 2) Ka tu tonda ku muesa cifua caco!

7. Yehova ua tonda tu linge vika, kaha omo lia vika?

⁷ Ngeci mua visemi ka ve ku tonda vana vavo va lizinde, vunoni va pue vavusamba. Na vuno vene Yehova ua tonda vana veni va yoye vuino umo na mukuavo. Mua vusunga cilemo cetu ku umo na mukuavo ce ku tu solola ku pua Vakua Kilistu va vusunga. (Yoa. 13:35) Visinganieka vietu via pua ngue via mukua Visamo ua sonekele ngueni: “Tenu, mu ca cuka na mu ca tovala Omo vana va naye va kala hamo na cizango cimo!” (Visa. 133:1) Mu tue ku lema vamuanetu tue ku muesa naua cilemo cetu kuli Yehova. (1 Yoa. 4:20) Ca pua ku vezika ca kama ku pua mutamba ua vusoko vua vamuanetu “vakua mitima ya cili, vakua cikeketima.”—Efe. 4:32.

8. Kuliya na 1 Yoano 5:3, vusunga vuka vue ku tu lingisa ku lema Yehova?

⁸ Yehova ua tonda ngecize vana vononoke visemi vavo, kaha ua lavelela ngecize netu vene tu mu singimike. (Efe. 6:1) Na fuila ku tambula kasingimiko ketu muomu ua pua Sakatanga, ue ku niunga miono yetu kaha ua pua cisemi ua mana ku hiana vose. Vunoni vutumbe vuetu vua kama vue ku tu lingisa ku lema Yehova vua pua muomu tua mu lema. (Tandenu 1 Yoano 5:3.) Vutuhu kua kala vusunga vua vuingi vu tu lingisa kuononoka Yehova, ikeye ke ku tu sindiya ku lingamo. Yehova ua tu  hana vuana vua ku lihanguila, ngeci ue ku viukilila mu tue ku hangula ku mu ononoka ku cizango.

9-10. Omo lia vika ca tondeka ku tantekeya vitume via Yehova na ku viononoka mu muono?

⁹ Visemi va tonda vana vavo va kale vuino. Ngeci mukemuo ve ku tumbika vimo vitume vi va pande kuononoka vana, linga vi va kuase. Vana mu ve ku singimika vimamuna viaco, ve ku muesa ngecise va tsiliela visemi vavo na ku va singimika. Mua vusunga ca tondeka tu tantekeye vuino Tatetu ua muilu na masiko eni linga tu a niunge mu muono uetu. Mu tue ku lingamo, tue ku muesa nguetu tua lema Yehova na ku mu singimika kaha tue ku uanamo ku vezika. (Isa. 48:17, 18) Amba co vaze ve ku viana Yehova na vitume vieni? Ve ku uanamo ku vindama ca kama.—Ngal. 6:7, 8. 

¹⁰ Mu tue ku yoya muaya cizango ca Yehova, tue ku liohiela ku visoti via ku muvila, mu visinganieka na mu lutsilielo. Yehova a tantekeya vika via cili kuli yetu. Ndumbuetu Aurora, ua ku Estados Unidos ua handekele ngueni, “Njili na vusunga ngecize muono ua ndzolela ya vusunga ua hitukila lika ha ku ononoka Yehova.” Tu vose tua tava nguetu ua handekele vusunga. Ku vezika cika tua uana mu kuononoka vimamuna via Yehova via cilemo?

11. Vati ku vundila ce ku tu kuasa?

¹¹ Ku vundila ce ku tu kuasa ku ononoka cipue nga ku lingamo ca cikalu. Vintsimbu vimo, ci ka kaluua ku ononoka Yehova, vunoni tua pande ku lua na vuzeye vuetu vua  zendemena ku vupi. Mukua Visamo ua vundilile kuli Njambi ngueni: “Nji kuatese na cimbembesi ca ku ononoka.” (Visa. 51:12) Ndumbuetu Denise, ua pua pioneiro ua ntsimbu yose, ngueni: “Mu ce ku nji kaluuila kuononoka masiko a Yehova, nje mu vundila a nji hane ndzili ya ku linga via cili.” Tu hasa ku kala na vusunga nguetu Yehova a ka kumbulula vivundilo vietu ntsimbu yose.—Luka 11:9-13.

12. Kuliya na Efeso 5:1, vika tua pande ku linga?

¹² Tandenu Efeso 5:1. Mu ku pua “vana va a lema,” tue ku lihakela kapandi ka ku tambuluisa Yehova. Tue ku mu tambuluisa mu ku muesa vifua ngeci mua cilemo, ngozi, na ku ecela vakuetu. Vaze ka va tantekeya Njambi mu ve ku mona kakesi ketu, va hasa ku ivua cizango ca ku tonda ku lilongesa via vingi ku tuala hali ikeye. (1Pe. 2:12) Visemi Vakua Kilistu vali na vusunga vua vuingi vua pande ku va lingisa ku tambuluisa Yehova mu cifua ci ve ku lelelamo vana vavo. Mu ve ku lingamo, vana navo ve ku tonda ku likuata vusamba na Tatetu ua cilemo.

13. Ku vika tua pande ku tuala mana etu?

¹³ Muana ua lema ise ue ku ivua ndzolela ya ku handeka vieni ku vakuavo. Netu naua tua lema Tatetu ua muilu Yehova, kaha tua tonda vakuetu va mu tantekeya. Tue ku ivua ngue Muangana Ndaviti ngueni: “Muono uange u ka lipamba kuli Yehova.” (Visa. 34:2) Vatico nga tu va ku holoka? Vati tu hasa ku pua va ku  simpa? Tu ka pua va ku simpa nga tu tuala mana ku ndzolela ya kevua Yehova na ku vezika ci va ka uana vakuetu nga tu va longesa vieni. Yehova a ka tu hana ku simpa ci tondeka. Nga ua kuasele vamuanetu va ku sekulu ya ku livanga va pue va ku simpa. Netu vene a ka tu kuasa.—1 Tes. 2:2.

14. Omo lia vika ca pua ca seho ku kala na mutamba mu cipanga ca ku puisa vantu vandongesi?

¹⁴ Yehova ka kele na kahangu, ngeci ue ku vuahelela mue ku tu mona tu muesa cilemo cetu ku vakuetu, kuose-oko ku va tunda. (Vili. 10:34, 35) Imo ya vinjila vi tu hasa ku mueselamo cilemo cetu ku vakuetu ya pua ku va tualela muzimbu ua cili. (Mat. 28:19, 20) Vika vi hasa ku iza mu cipanga caco? Vaze ve ku tu halakana miono yavo i hasa ku aluluka mu ntsimbu ino na ku ka tambula muono ka ue ku hua ku lutue.—1 Tim. 4:16.

15-16. Vusunga vuka tua kala navuo vu tu lingisa ku yoya mu ndzolela?

¹⁵ Yehova ua pua cisemi ua cilemo, ngeci ua tonda vana veni va yoye mu ndzolela. (Isa. 65:14) Kua kala vusunga vua vuingi vua pande ku tu vuisa ndzolela ntsimbu ino, vutuhu tu hasa ku hita mu visoti via kama. Ca ku muenako, tuli na vusunga ngecize Tatetu ua muilu ua tu lema mpundu. Tua tantekeya vusunga ku tuala hali ikeye mu lizi lieni. (Yele. 15:16) Ku vueza kuli evi, tua pua mutamba ua vantu va lema Yehova, masiko eni kaha na ku lilema umo na mukuavo.—Visa. 106:4, 5.

¹⁶ Tua yoya muono ua ndzolela, muomu tuli na vusunga nguetu tu ka yoya muono ua cili ku lutue. Tua lavelela nguetu vuovuno Yehova a ka fumisako vupi vuose ku hitila mu Vuangana vueni, kaha mavu a ka aluluka na ku pua citungu. Tua kala na lulavelelo ngecize vose va tsa tangua va ka sanguka na ku ka yoyela hamo na vavusoko vavo. (Yoa. 5:28, 29) Mua vusunga i ka pua ndzolela ya kama! Vunoni helu lia viose, tuli na vusunga ngecize kua litulu ntsimbu ya indende, vuovuno uose-ouo muilu ni ha mavu aka hana vumpahu kuli Tatetu ua muilu, ngue muze mu ca pande.