1. Vika ua pandele ku puisamo muntu linga a ka handeke na muangana ua Pelesia?

SINGANIEKENU nga mua yoyele imo miaka 2.500 mu vuangana vua Pelesia. Kaha mu tonda ku tuala cimo cimpande kuli muangana, ngeci mu hita mu mbonge ya Susane. Vunoni ku citava mu suene cipue kavundende ku nganda ya muangana ca ku hona ku mi tavesa. Nga mu seteka ku lingamo ku-tsa ceni!—Estele 4:11.

2. Vati tua pande ku livua ku tuala ha ku suena kuli Yehova?

² Ce ku lembezieka ku tantekeya ngecize Yehova ka puile ngue uze muangana ua vakua Pelesia! Vutuhu Yehova ua hiana nkala muangana, kasi vene ua tonda ku tu halakana ntsimbu yose oyo. A tonda tu livue ku zituka omo tu suena kuli ikeye. Vutuhu Yehova ua kala na vinkumbu, ngeci mua Sakatanga, Mukua Ngolo yose na Sukulu, tu vose ua tu lania tu pue na ku mu sana “Tatetu.” (Mat. 6:9) Ci vuisa ndzolela ku tantekeya ngecize Yehova ua tonda tu mu suene mu hiehi!

3. Omo lia vika tu hasa ku sana Yehova “Tatetu,” kaha vika tu lilongesa mu cilongesa cino?

³ Tu hasa ku sana Yehova nguetu “Tatetu” ca ku hona ku takania—muomu ikeye ndundzi ya muono. (Visa. 36:9) Mu ku linga ua pua Tatetu, ka pua kapandi ketu ku mu singimika. Nga tu mu ononoka, tu ka tambula vivezikiso via kama. (VaHe. 12:9) Vivezikiso viaco vi ambatesela kumo na muono ua ya ye, muilu ni ha mavu. Kaha tue ku uanamo naua vivezikiso cipue ku ntsimbu ino. Cino cilongesa ci tu kuasa ku mona vusunga vu muesa ngecize Yehova ue ku tu niunga,  ngue vana va lema ku ntsimbu ino kaha ka ka tu mbila kuti. Ha katete tu talenu vusunga vu muesa ngecize Yehova ua tu lema na ku tu niunga.

4. Omo lia vika vamo ce ku va kaluuila ku mona Yehova ku pua Tatetu?

⁴ Ce ku mi kaluuila ku mona Yehova ku pua Iso ni? Vamo ve ku limona cikuma vundende na ku hona seho mu ve ku singanieka ha vukama vua Yehova. Va kala na vimpata nga cili vene Njambi ua ngolo yose ue ku va tuala mana. Vunoni Tatetu ka tondo tu pue na ku singanieka ngoco. Ikeye ua tu hana muono kaha a tonda tu likuate vusamba neni. Kapostolo Paulu mu nima ya ku lombolola ovu vusunga vuaco ua handekele via Yehova ngueni, “ikeye kesi ku laako netu vose.” (Vili. 17:24-29) Njambi a tonda tu vose muntu ku muntu a mu suene ngue mue ku suena kanike kuli ise ua mu lema.

5. Vika tu lilongesa ku cimona ca umo ndumbuetu?

⁵ Vamo ce ku va kaluuila ku ivuisisa ngecize va hasa ku mona Yehova ku pua Ise, omo lia vika? Muomu halumo va Iseavo va ku va sema, ka va va muesele cilemo cipue kavundende. Halakanenu via handekele umo ndumbuetu, ngueni: “Vatata va puile vakua vukalu, ngeci mu nja putukile ku lilongesa Mbimbiliya ca nji kaluuilile ku suena mu hiehi na Yehova mu ku pua Tata ua muilu. Vunoni mu nja putukile ku tantekeya vuino Yehova, viose via alulukile.” Nenu mue ku livua ngue ou ndumbuetu ni? Nga mukemuo, kalenu na vusunga ngecize nenu mu hasa ku mona Yehova ngue Iso ua mi lema cikuma.

6. Kuliya na Mateo 11:27, vika ua linga Yehova vie ku tu kuasa tu mu mone ngue Tatetu?

⁶ Yehova ua tu kuasa tu mu mone ngue Tatetu ua cilemo, ku hitila mu mizimbu ya handeka Yesu na viuma via lingile. (Tandenu Mateo 11:27.) Yesu ua muesele vifua via Ise mu vutantuluke ngeci ua handekele ngueni: “Ou na nji mono ange, na mono Tata.” (Yoa. 14:9) Yesu vintsimbu via vingi, ua handekele ha vipanga vie ku puisamo Yehova mu ku pua Tatetu. Mu mikanda iuana ya handeka via muzimbu ua Yesu, lizi “Tata” va tumbuila Yehova lua ku pua 165. Omo lia vika Yesu ua handekele cikuma via Yehova? Vumo vusunga vua pua, linga vantu va tsiliele ngecize Yehova ua pua Tatetu ua cilemo.—Yoa 17:25, 26.

7. Vika tu lilongesa hali Yehova ku tuala ha cifua ca niungililemo Muaneni?

⁷ Tu talenu vika tu hasa ku lilongesa ku cifua ca niungililemo Yehova muaneni Yesu. Yehova ua halakanene vivundilo via Yesu ntsimbu yose. Kaha ka vi halakanene lika vunoni na ku vi kumbulula. (Yoa. 11:41, 42) Mu nkala vieseko via hitile Yesu, ua muene vukuasi vua Ise ua cilemo.—Luka 22:42, 43.

8. Mu njila ika Yehova ua hanene vukuasi kuli Yesu?

⁸ Yesu ua tantekeyele ngecize muono ueni ua hitukilile hali Ise, ngeci ua handekele ngueni: “Ange nji yoya omo Tata.” (Yoa. 6:57) Yesu ua tsilielele muli Ise na mutima uose, ngeci Yehova ua mu hele viose via tondekele mu muono. Vunoni ku hiana novio, Yehova ua niungile Yesu mu lutsilielo.​—Mat. 4:4.

9. Vati Yehova ua lisoluelele ku pua cisemi ua ngozi kuli Yesu?

⁹ Yehova mu ku pua cisemi ua cilemo, ua lingile cose linga Yesu a kale na vusunga ngecize a mu kuasa. (Mat. 26:53; Yoa. 8:16) Vutuhu Yehova kohielele Yesu ku viose via mu solokelele, vunoni ua mu kuasele ku kaniama. Yesu ua kele na vusunga ngecize nkala kayando ka mona ka ntsimbu ya indende lika. (VaHe. 12:2)  Yehova ua muesele ngecize ua niungile Yesu mu ku mu halakana, ku mu niunga, ku mu longesa, na ku mu kuasa. (Yoa. 5:20; 8:28) Tu talenu honi vati Tatetu ua muilu ue ku tu niunga mu vinjila via ku liseza-seza.

10. Kuliya na visamo 66:19, 20, vati Yehova ue ku muesa ngecize ua tu lema?

¹⁰ Yehova ue ku halakana ku vivundilo vietu. (Tandenu Visamo 66:19, 20.) Ka tondo tu pue na ku vundila lika noho-noho, vunoni tu pue na ku vundila ntsimbu yose. (1 Tes. 5:17) Tu hasa ku vundila kuli Njambi nkala ntsimbu na kuose-oko ku tuli. A hasa ku tu halakana ntsimbu yose-oyo i tu tonda. Mue tue ku nongonona ngecize Yehova ue ku halakana vivundilo vietu, tue ku livua mu hiehi neni. Ngeci mukua Visamo ua handekele ngueni: “Nji lema Yehova, muomu evua Lizi liange na vivundilo viange.”—Visa. 116:1.

11. Vati Yehova ue ku kumbulula vivundilo vietu?

¹¹ Tatetu ke ku halakana lika vivundilo vietu vunoni na ku vi kumbulula. Kapostolo Yoano ngueni: “Nga tu vundila vimosi via litombola na cizango ceni, ikeye a ku tu ivua.” (1 Yoa. 5:14, 15) Tua tantekeyamo naua nguetu, halumo ke ku kumbulula vivundilo vietu mu cifua ci tua tonda. Omo lia vika? Muomu a tantekeya, via cili ku tuala hali yetu, cikuavo naua halumo cikumbululo ceni ci hasa ku pua, houe ni a tonda tu laveleleko kavundende.—2 Kol. 12:7-9.

12-13. Mu vinjila vika Tatetu ua muilu ue ku tu tuala mana?

¹² Yehova ue ku tu lela. Ue ku puisamo viose via tondeka ku cisemi ua yala. (1 Tim. 5:8) Ue ku hana vi tondeka ku muvila ku vana veni. Ka tondo tume mutima ku tuala ha viakulia, vuzalo, na vindzivo. (Mat. 6:32, 33; 7:11) Mu ku pua cisemi ua cilemo, Yehova na viukisa viose linga a ka tu hane viose vi tu ka tondeka ku lutue.

¹³ Kati ovio lika, Yehova ue ku tu hana naua vi tua tondeka mu lutsilielo. Ku hitila mu lizi lieni, ku tuala hali ikeye, vutumbe vueni, vutumbe vua muono na viuma vi tua lavelela ku lutue. Ua tu tualele mana muntu ku muntu mu tua lilongesele vusunga ku tuala hali ikeye, halumo ku hitila mu visemi ni nkala mulongisi. Kaha kasi tue ku tualelelaho ku tambula vukuasi vueni ku hitila mu vakuluntu va mu vikungulukilo na vamuanetu vakuavo va ku hia. Cikuavo naua, Yehova ue ku tu longesa ku hitila mu viuano, ku tue ku lilongesela na vavusoko vuetu va mu lutsilielo. Yehova ue ku tu niunga ku hitila mu vinjila evi na vikuavo via vingi, mua vusunga ue ku tu muesa cilemo ngue ca cisemi ua yala.—Visa. 32:8.

14. Omo lia vika Yehova ue ku tu longesa, kaha vati ue ku lingamo?

¹⁴ Yehova ue ku tu longesa. Yesu ua puile ua ku tantuluka, yetu co kuahi. Cimo cifua ce ku tu longeselamo Yehova ca ambatesela kumo na ku tu sungamesa. Lizi lieni ngualio: “Uze uose [Yehova] Njambi a mu lema a mu longesa.” (VaHe. 12:6, 7) Yehova ue ku tu longesa mu vinjila via ku liseza-seza. Halumo tu hasa ku ivua vimo ni ku tanda vimo mu lizi lieni ku viuano. Ni halumo vukuasi vu tu tondeka vue ku tunda ku vakuluntu. Muosemuo mue ku tu sungameselamo, Yehova ue ku lingamo omo lia cilemo.—Yele. 30:11.

15. Mu vifua vika Yehova ue ku tu niungilamo?

¹⁵ Yehova ue ku tu kuasa mu ntsimbu ya visoti. Ngeci mua cisemi ua cilemo ue ku kuasa vana veni mu ntsimbu ya visoti, Tatetu ua muilu neni ue ku tu kuasa. Ue ku pangesa sipilitu santu yeni mu ku tu niunga mu lutsilielo. (Luka 11:13) Kaha naua Yehova ue ku tu  niunga mu tue ku uma mutima. Ca ku muenako, ua tu hana lulavelelo lua ku komouesa. Olu lulavelelo luaco lue ku tu kuasa ku kolesa mu vieseko. Vulukenu ovu vusunga, cipue tu hite mu visoti viose-ovio Tatetu kasi a ka vi zimangana. Nkala vieseko vie ku tu solokela via pua via kantsimbu ka kandende lika, vunoni vivezikiso via Yehova via ku miaka yose ya ya-ye.—2 Kol. 4:16-18.

16. Vika via solokele omo Andama ua muesele lisino kuli Ise?

¹⁶ Tue ku mona cilemo ca Yehova mu cifua cendeselemo cimpande ca katukile Satana ha vana veni va ha mavu. Omo Andama ua muesele lisino kuli Njambi, ua zimbalelesele cihela ceni mu vusoko vua Yehova vua ndzolela. Evi ka via kuatele lika kuli ikeye, vunoni na kuli vana veni vose. (Loma 5:12; 7:14) Kasi vene Yehova ua lingileko mumo, mu ku hana vukuasi vua tondekele ku vana va Andama.

17. Vika Yehova ua lingile vuasi-vuasi mu nima ya Andama ku mu alulukila?

¹⁷ Yehova ua hele Andama kasitiku, vunoni ka sile vana ve ku semene ca ku hona lulavelelo. Vuasi-vuasi ua kulahesele vantu va ku ononoka ngueni tangua va ka sanguka. (Njen. 3:15; Loma 8:20, 21) Yehova ua sungamesele viose ku hitila mu nkombelo ya muaneni ya lema cikuma Yesu. Mu ku tuma muaneni omo lietu, Yehova ua tu muesa vukama vua cilemo ceni.—Yoa 3:16.

18. Omo lia vika tu hasa ku kala na vusunga nguetu Yehova a tonda tu pue vana veni cipue nga tua suntsuka?

¹⁸ Vutuhu ka tua tantulukile, Yehova ua tonda tu pue mutamba ua vusoko vueni, kaha na limo litangua liahi a ka tu mona ku pua citeli. Vintsimbu vimo tu hasa ku sevuka ni ku vulumuna, vunoni Yehova ke ku tu seza. Yesu ua muesele vukama vua cilemo ca Yehova mu  ku pua Tatetu mua tele cisimo ca muana ua zimbalele. (Luka 15:11-32) Cisemi u va na tumbula mu cisimo caco ka likelele ku lavelela ngecize muaneni a ka hiluka. Nga muntu na seza Yehova vunoni a liveya mu vusunga, a hasa ku kala na vusunga ngecize Tatetu ua cilemo a ka mu tambula.

19. Vati Yehova aka sungamesa luvinda lua koka Andama?

¹⁹ Tatetu a ka sungamesa luvinda lua koka Andama. Mu nima ya Andama ku muesa lisino, Yehova ua tumbikile vutumbe vua ku hangula vamo va ku pua 144.000 ha kati ka vantu va ka pua vamiangana na vasasendote muilu, hamo na Muaneni Yesu. Yesu na vaze va ka sika neni va ka kuasa vantu vakua ku ononoka va hete ha ku tantuluka mu mavu a aha. Mu nima ya ku hita mu ceseko ca ku manusuila, Njambi a ka va hana muono ka ue ku hua. Kaha Tatetu a ka viukilila mu ku mona mavu ose a na sulu na vana veni va ku tantuluka. I ka pua ntsimbu ya ndzolela!

20. Mu vinjila vika Yehova na muesa ngecize ua tu lema, kaha vika tu ka lilongesa mu cilongesa ci na hatako?

²⁰ Yehova na muesa ngecize ua tu lema cikuma. Ua pua Tatetu. Ue ku halakana vivundilo vietu na ku tu hana viose vi tu tondeka, ku muvila na mu lutsilielo. Ue ku tu longesa na ku tu kuasa. Ua tu tulikila vivezikiso via vingi ku lutue. Ce ku tu lembezieka ku tantekeya ngecize Tatetu ua tu lema na ku tu niunga! Mu cilongesa ci na hatako tu ka lilongesa vati netu naua mu ku pua vana tu hasa ku muesa seho ku cilemo ceni.