1-2. Vika kangelo ua lekele vampuevo ku cihilo ca Yesu, kaha na vika Yesu ua va lekele?

KU CIMENE ca 16 ya Nisane, 33 T.K.N. Mu nima ya viola 36 fume ha va tsindilile Yesu, vamo vampuevo vakua lutsilielo va ile ku cihilo ceni. Vampuevo vaco va ile na vutumbe vua ku ka kuita mazi ku muvila ueni, vunoni mu va ka heteleko, va ka komokele cikuma muomu va ka uanene mbumbo ya mupulungua! Mu nima yaco, umo kangelo ua lekele vaze vampuevo ngueni Yesu na sanguka. Kaha ua va lekele naua ngueni: “A ya ku lutue luenu ku Ngalileya; kuze mu ka mu mona.”—Mat. 28:1-7; Luka 23:56; 24:10.

² Kaha mu va tundile ku cihilo, Yesu ua va solokelele na ku va leka ngueni: “Hamenu mu ka ambulule kuli vana va nana, va ye ku Ngalileya, kukekuo va ka nji muena.” (Mat. 28:10) Mua vusunga, Yesu ua kele na amo mezi a seho a tondele ku leka vandongesi veni, muomu cuma ca ku livanga ca lingile mu nima ya ku sanguka ceni, ca puile ku lania vandongesi veni va ka liuane neni!

3-4. Vika tu hasa ku handekela nguetu lisiko lia ku Mateo 28:19, 20, Yesu ka li hanene lika ku vapostolo veni? (Talenu cikupulo ca helu lia Vutala.)

³ Tandenu Mateo 28:16-20. Ku ciuano caco, Yesu ua lekele vandongesi veni via cipanga ca seho cikuma ci va pandele ku linga. Kaha eci cipanga cikeco ci tue ku linga netu lelo lino. Ngeci Yesu ua handekele ngueni: “Ngoco vene hamenu puisenu vantu vose vandongesi vange, . . . na ku va longesa ku niunga viuma viose vi nja mi sikile.”

⁴ Yesu ua tonda vose vakua ku mu kava va pue na ku ambulula. Cipanga caco ka ci hele lika ku vapostolo 11 houe. Vati tua tantekeyamo? Tua tantekeyamo muomu omo Yesu ua hele lisiko lia ku  ambulula ha muncinda ua mu Ngalileya, kati vapostolo lika va keleho. Uze kangelo ua solokele ku vihilo, ua lekele vaze vampuevo ngueni: “Kuze [ku Ngalileya] mu ka mu mona.” Aa mezi a muesa ngecize vampuevo vaco navo ku va ile. Vunoni kati vakevo lika. Kapostolo Paulu ua handekele ngueni Yesu ua “limuesele ntsimbu imo lika [ku vamuanetu] va ku hiana vihita vitanu.” (1 Kol. 15:6) Ku cihela cika Yesu ua lisoluele kuli vakevo?

5. Vika tu lilongesa ku 1 Kolintu 15:6?

⁵ Tuli na vusunga vua tu lingisa ku singanieka nguetu Paulu ua kele na ku handeka vene via cize ciuano ca ku Ngalileya ci va tumbula ku Mateo 28. Vusunga vuka? Vua katete, cingi ca vandongesi va Yesu va puile vakua Ngalileya. Ngeci mukemuo, ca puile ca casi ku likungulula na civunga ca kama ca vantu ha muncinda mu Ngalileya, kati mu ndzivo ya muntu. Vua mu civali, ha ntsimbu ize, Yesu tele ua lisolola laza ku vapostolo veni 11 mu imo ndzivo ya mu Yelusalema. Nga Yesu ua tondele cipanga ca ku ambulula na ku puisa vantu vandongesi va ci linge lika ku vapostolo veni, nga ua va lekelele vene mu ndzivo yaco ku Yelusalema. Nga ka ka va lekelele ku muncinda ua mu Ngalileya, kuze kua kele vaze vampuevo na vantu veka.—Luka 24:33, 36.

6. Vati Mateo 28:20 ya muesa ngecize lisiko lia ku puisa vantu vandongesi ka lia lengelele lika ku laza? Haka ci li na ku endela cipanga caco lelo lino?

⁶ Talenu naua vusunga vua mu citatu vua seho. Lisiko lia Yesu lia ku puisa vantu vandongesi ka lia lengelele lika hali Vakua Kilistu va ku livanga. Vati tua tantekeyamo? Muomu ku ntsongo ya lisiko lia hanene Yesu ku vandongesi veni, ua vuezeleko ngueni: “Yange nji li nenu matangua ose, na ha ku-kotoka ca miaka.” (Mat. 28:20) Cili vene, ngue mua handekele Yesu, cipanga ca ku puisa vantu vandongesi ci li ha ntuitui lelo lino. Muaka ku muaka, ve ku mbatiza vantu va heta ku 300.000 ku pua Vakaleho va Yehova na vandongesi va Kilistu!

7. Vika tu simutuila mu cilongesa cino, kaha omo lia vika?

⁷ Cingi ca vantu ve ku lilongesa Mbimbiliya ve ku kola mu lutsilielo na ku heta ku mbatizimu. Vunoni, vamo ve ku likanuuela ku pua vandongesi va Yesu. Vutuhu va lema ku lilongesa Mbimbiliya, ka ve ku kola mu lutsilielo na ku heta ku mbatizimu. Uose mukua ku ambulula ua tonda ku kuasa ndongesi yeni a pangese vie ku lilongesa na ku pua ndongesi ua Kilistu. Cino cilongesa ci ka muesa vati tu hasa ku heta ndongesi ku mutima na ku mu kuasa a kole mu lutsilielo. Omo lia vika eci cimpande ca seho? Muomu halumo tangua ci ka tondeka tu hangule nga tu tualelelaho ku lilongesa na muntu ni kuahi.

8. Omo lia vika vintsimbu vimo ce ku pua ca cikalu ku kuasa vandongesi vetu ku lema Yehova?

⁸ Yehova a tonda vantu va mu pangele omo lia ku mu lema. Ngeci mukemuo, vutumbe vuetu vua pua ku kuasa vaze va tue ku longesa vevuisise ngecize Yehova ua va haka seho kaha ua va lema mpundu muntu ku muntu. Kaha naua tu tonda ku va kuasa va mone ngecize Yehova ua pua “ise ya vantsiua, na ngazi ya vantuluue.” (Visa. 68:5) Nga vilongesa vienu vevuisisa ngecize Yehova ua va lema mpundu navo va ka putuka ku mu lema. Vamo vandogesi vetu ce ku va kaluila ku mona ngecize Yehova ua pua tatetu ua cilemo muomu halumo visemi vavo ka ve ku va muesa cilemo. (2 Tim. 3:1, 3) Nga muli na ku endesa cilongesa ca Mbimbiliya puenu na ku tsindika ha vifua via Yehova. Cikuavo naua va kuasenu ku ivuisisa ngecize Njambi yetu ua cilemo a tonda linga navo va ka tambule muono ua yaye, kaha na livuikisila mu ku va kuasa ku vi puisamo. Vika naua tua pande ku linga?

9-10. Mavulu a ka tua pande ku pangesa nga tu endesa vilongesa via Mbimbiliya, kaha omo lia vika?

⁹ Pangesenu mavulu “Vi I Hasa ku tu Longesa Mbimbiliya” na “Tualelenuho ku Lema Njambi.”  Aa mavulu va a viukisa mu cifua ce ku tu kuasa ku heta ku mitima ya vandongesi vetu. Ca ku muenako, kapitulu 1 ka livulu Vi I Hasa ku tu Longesa Mbimbiliya, mua kala vihula ngeci muevi: Vuno Njambi ua tu haka seho ni cikenia? Vati Njambi ue ku ivua ku mutima nga vantu va yanda? na Mu hasa ku pua kavusamba ka Yehova ni? Amba mu livulu Tualelenuho ku Lema Njambi co? Livulu liaco li hasa ku kuasa ndongesi yetu ku ivuisisa vati a hasa ku pangesa vitume via mu Mbimbiliya mu muono ueni. Li hasa naua ku mu kuasa ku pua kavusamba ka Yehova. Ngeci mukemuo, nga mue ku endesa cilongesa mu mavulu aa, puenu na ku liviukisila vuino nkala cilongesa na ku pua na ku singanieka ha vika mpundu a tondeka ndongesi yenu.

¹⁰ Vunoni, aci singaniekenu nga ndongesi yenu a tonda ku tantekeya umo muzimbu ka ua kele mu mikanda ya mu Vikuata vi tue ku Longesa Navio. Vati mu linga? Citava mu mu leke ku ka tanda mukanda mua kala muzimbu uaco, hose oho ha uanena ntsimbu, linga mu hase ku tualelelaho ku endesa cilongesa mu livulu li va tu mamuna ku pangesa.

11. Omo lia vika tua pande ku kuasa ndongesi yetu a mone seho ya kala ha ku putuka cilongesa na civundilo?

 ¹¹ Puenu na ku putuka cilongesa na civundilo. Vintsimbu via vingi, ca pua ca cili cikuma ku putuka na ku manusula cilongesa na civundilo. Kaha ca pua ca cili nga tu lingamo mu nima ya visimano via vindende lika tunde ha tu putukila ku lilongesa na muntu. Ku lingamo, ci ka mu kuasa ku nongonona ngecize tu hasa lika ku ivuisisa Lizi lia Njambi, na vukuasi vua sipilitu santu yeni. Kaha vamo vakua ku ambulula ve ku katula cimpande ca ku vundila, mu ku tanda na ndongesi yavo Tiango 1:5. Cinimbu caco nguaco: “Nga umosi ha kati kenu na zela mangana, a a vundile kuli Njambi.” Kaha mu nima yaco, ue ku hula ndongesi ngueni, “Vati tu hasa ku tambula mangana kuli Njambi?” Eci ci hasa ku lingisa ndongesi a tave ku pua na ku putuka, kaha na ku manusula nkala cilongesa na civundilo.

12. Vati mu hasa ku pangesa Visamo 139:2-4 mu ku kuasa ndongesi yenu a pue na ku vundila na mutima uose?

¹² Longesenu ndongesi yenu vati ve ku vundila. Kuasenu ndongesi yenu a kale na vusunga ngecize Yehova ua tonda ku ivua vivundilo vieni. Mu lombololuenu ngecize mu vivundilo via mu vulika, citava tu leke Yehova viose vili ku mutima uetu, ngeci mua viuma ka tue ku livua ku zituka mu ku vi leka ku vakuetu vantu. Ka tua pande ku likanuuela ku mu lekavio, muomu na laza a vi tantekeya. (Tandenu Visamo 139:2-4.) Kaha, tu hasa naua ku mu kaniamesa a pue na ku vundila vukuasi vua Yehova mu ku vula visinganieka na vilinga via ku vihia, cipue nga visinganieka viaco vi na mu tengula. Ca ku muenako, halumo ndongesi ua lema vilika via vakua mavu, vunoni a tantekeya ngecize vilika viaco Njambi ua vi zinda. Vika mu hasa ku linga? Mu kaniamesenu a pue na ku leka Yehova vati ue ku livua ku tuala ha cimpande caco, na ku mu kuasa a leme vize via lema Yehova.—Visa. 97:10.

13. (a) Omo lia vika ka tua pandele ku hitisamo ntunda ya kama mu ku lania vandongesi mu ku kunguluka? (b) Vati tu hasa ku kuasa ndongesi yetu a ka livue ku zituka ku Ndzivo ya Vuangana?

¹³ Kati mu hitisemo ntunda ya kama mu ku lania ndongesi yenu ku viuano. Muomu viuma via ka mona na ku ivua ku viuano, vi hasa ku ka mu vuisa cizango ca ku kola mu lutsilielo na ku pangela Yehova. Vati honi mu hasa ku mu lania? Mu muesenu video Vika vie ku Hita mu Ndzivo ya Vuangana? Kaha mu lanienu na ndzolela nguenu mu tonda a kaye nenu mu ku kunguluka. Nga citava likuminienu ku ka mu ambata mu liendelo lienu ni ku mu hana kamo kambongo ka ku londesa. Ca pua naua ca cili ku pua na ku tuhuka mu lihia na vakua ku ambulula va ku liseza-seza. Muomu ku lingamo, ci ka kuasa ndongesi yenu a tantekeye vamuanetu va vengi va mu cikungulukilo. Kaha ambe mua ka ya mu ku kunguluka a ka livua ku zituka muomu a ka uana vamo vantu va tantekeya.

14. Vika vi hasa ku kuasa ndongesi ku kola mu lutsilielo?

¹⁴ Vutumbe vuetu vua pua ku kuasa ndongesi yetu ku kola mu lutsilielo. (Efe. 4:13) Muntu mue ku tava ku lilongesa Mbimbiliya, halumo ue ku tuala lika mana ku vukuasi vua hasa ku uana mu cilongesa caco. Vunoni mue ku putuka ku lema Yehova, ue ku putuka ku mona seho ya kala ha ku kuasa vakuavo, ci pue vaze vali laza mu cikungulukilo. (Mat. 22:37-39) Vunoni kua kala mutamba ukuavo ua na pande ku tantekeya: civezikiso ca ku hana milambu. Ngeci mukemuo, hose ha mu muena nguenu citava ku leka ndongesi yenu via milambu, kati mu likanuuele ku mu leka via civezikiso caco.

15. Vati mu hasa ku kuasa ndongesi yenu ku pinda na visoti vi ka mu solokela?

¹⁵ Mu longesenu via na pande ku linga nga ku na soloka visoti. Ca ku muenako, nga ndongesi yenu ua pua mukua ku ambulula ua ku hona ku  mbatiza, a mi leka ngueni umo muanetu na mu vulumuina. Kati muamene na umo uahi. Vunoni mu lekenu via na pande ku linga ngue mu ya tu mamuna Mbimbiliya. Mbimbiliya ya muesa ngecize a hasa ku ecela muanetu, vunoni nga kasi vili na ku mu vavala ku mutima, na pande ku ka handeka na muanetu uaco mu cilemo linga va lihambe. Ku lingamo ci ka mu kuasa ku ‘nganiala muanaye.’ (Setekesenu na Mat. 18:15) Kaha mu kuasenu ku livuahesela via ka handeka. Mu lekesenu vati a hasa ku pangesa JW Library^® , Guia de Pesquisa na saiti jw.org^® linga a lilongesa vati na pande ku lua na visoti via cifua eci. Ku mu longesa via vingi ku tuala ha ku pinda na visoti ntsimbu kanda va mu mbatize, ci ka mu kuasa ku litombola na vamuanetu mu cikungulukilo mua ka pua Mukaleho ua Yehova.

16. Vika ca puila ca cili ku lania vamuanetu va ku liseza-seza omo mu kendese cilongesa cenu?

¹⁶ Puenu na ku lania vamuanetu va ku liseza-seza omo mu kendesa cilongesa ca Mbimbiliya na ku lania kaniungi ua ku zinguluka nga ali na ku meneka cikungulukilo cenu. Omo lia vika? Ku tundisako vusunga vu tu na tumbula laza helu, vakua ku ambulula vakuavo va hasa ku hana ndongesi yenu vukuasi vuze ka mu hasa ku hana yenu. Ca ku muenako, aci singaniekenu nga ndongesi yenu ali na ku lihakela kapandi ka ku likela ku sipa, vutuhu na seteka vintsimbu via vingi vunoni kesi na ku hasa. Mu hasa ku lania umo muanetu ua luile na citanga caco, aye nenu ku cilongesa caco. Nga mu lingamo, muanetu uaco a ka hasa ku kuasa ndongesi a mone via na pande ku linga mangana a vule citanga ceni. Nga ka muesi na ku livua ku zituka ku endesa cilongesa ha meso a muanetu ua vutongue ku hiana yenu, citava mu mu vundile linga mu litangua liaco a ka mi endeseleco ikeye. Mua vusunga, ku lania vakua ku ambulula veka, ci ka kuasa cikuma ndongesi yenu. Vulukenu ngecize, vutumbe vuetu vua pua ku kuasa vandongesi vetu ku kola mu lutsilielo.

17-18. Vika mua pande ku hilula nga mu tonda ku likela ku lilongesa na umo ndongesi?

¹⁷ Nga ndongesi yenu kesi na ku kola mu lutsilielo, ci ka tondeka mu lihule nguenu, ‘Vuno nja pande ku likela ku mu longesa ni?’ Ntsimbu kanda mu hangule vi mu linga, singaniekenu ha mana a kala nao ndongesi yenu mu ku ivuisisa viuma. Mu ku linga vantu va liseza-seza, na ku kola cavo mu lutsilielo ca liseza-seza. Ngeci mukemuo mua pande ku lihula nguenu: ‘Vuno ndongesi yange a li na ku kola mu lutsilielo kuliya na vuhasi vueni ni?’ ‘Vuno na putuka “ku niunga” ni nguetu ku pangesa’ vize viali na ku lilongesa ni?’ (Mat. 28:20) Citava ndongesi ambate ntsimbu ya kama mu ku kola mu lutsilielo, vunoni na pande ku muesa ngecize ali na ku kola, kati ku kala mu cifua cimo lika, houe.

¹⁸ Vatico nga umo ndongesi vutuhu ue ku lilongesa mu ntsimbu ya laha, vunoni kesi na ku muesa seho ku cilongesa, vati tua pande kulinga? Aci singaniekenu ha cimueso eci: Nga ndongesi na manesa ku lilongesa livulu, Vika i Hasa  ku tu Longesa Mbimbiliya kaha halumo ali ku putuka livulu Tualelenuho ku Lema Njambi, vunoni kanda a ciye mu kunguluka. Ambe vene ku Mulalelo kanda a ci liateko! Kaha vintsimbu via vingi ue ku lingisa viose ovio vi mu tangule ku lilongesa . Nga mua kala na ndongesi ua cifua eci, mua pande ku simutuila neni ca ku hona ku mu ongoloka. *

19. Vika mu ka simutuila na ndongesi ke ku muesa seho ku ku lilongesa, kaha vika mua pande ku hilula ha cimpande eci?

¹⁹ Mu hasa ku putuka mu ku muihula nguenu, ‘Mu ku mona cenu, cuma cika ci ka mi kaluuila cikuma mu mu ka pua Mukaleho ua Yehova?’ Nga mu linga eci cihula, mu hasa ku lavela vikumbululo vivali. Ca ku muenako, halumo ndongesi a hasa ku kumbulula ngueni, ‘Mbimbiliya citava nji lilongese, vunoni ku pua Mukaleho ua Yehova na limo litangua liahi!’ Nga ndongesi uaco mu na lilongesa neni mu ntsimbu ya ku puamo, vunoni a mi leka ngoco, nkuma ikeye muntu u va ka tualelelaho ku longesa ouo ni? Houe! Ni halumo a hasa ku mi leka vika mpundu vili na ku mu tangula ku kola mu lutsilielo. Ca ku muenako, a hasa ku mi leka ngueni cuma ci ka mu kaluuila ca pua ku ambuluila ku ndzivo na ndzivo. Mua vusunga, ku tantekeya eli liova lia ndongesi, ci hasa ku mi kuasa ku uana njila ya cili ya ku mu kuaselamo.

20. Vati ku ivuisisa Vilinga 13:48 ci hasa ku mi kuasa ku hangula nga mu tualelelaho ku longesa muntu ni kuahi?

²⁰ Ca vusiua ku handeka ngecize, vamo vandongesi va pua ngue vaIsaleli va ku matangua a Ezekiele. Omo lia vilinga viavo, Yehova ua lekele Ezekiele ngueni: “Tala, u na pu kuli vakevo ngue muaso ua ku viuka cikuma ua umo ua kala na lizi lia ku viuka, kaha a hasa ku sika cisandzi vuino; muomu vevua mezi ove, vunoni ka ve ku a linga.” (Ezek. 33:32) Ku leka ndongesi nguetu tu likela ku mu longesa, ci hasa ku pua ca cikalu. Vunoni kati mu suve ngecize “ntsimbu ya litulu va na i kehesa.” (1 Kol. 7:29) Kati tu vihise ntsimbu yetu mu ku longesa muntu kesi na ku kola mu lutsilielo, vunoni tu tondenu vaze vali na cizango ca ku ka tambula “muono ka ue ku hua ua ya-ye.”—Tandenu Vilinga 13:48.

21. Tumbulenu mukanda ua uno muaka, na ku muesa vati u tu kuasa.

²¹ Mu ku hita ca muaka ua 2020, mukanda ua muaka uaco, u ka tu kuasa ku lihakela kapandi ka ku vueza ku vutongue vuetu mu cipanga ca ku puisa vantu vandongesi. Mukanda uaco ua tsindika ha mezi a handekele Yesu, ha litangua lia cimo ciuano ca kama ca hitilile ha muncinda ua ku Ngalileya, ngueni: “Hamenu puisenu vantu vose vandongesi vange . . . , na ku va mbatiza.”—Mat. 28:19.