CILONGESA 5
Tu ka ya Nove
“Tu ka ya nove, muomu tu nevu ngecize Njambi ua kala nove.”—ZAK. 8:23.
MUASO 26 Yange Mua vi Pangelele
VI TU LILONGESAMO *
Vampanga veka (“likumi lia vamala”) va kala na civezikiso ca ku lemesa Yehova hamo lika na va ku vuavesa (“kaYundeya”) (Talenu vinanga 1-2)
1. Vika ua handekele Yehova ngueni vi ka soloka ku matangua ano?
YEHOVA ua handekele ngueni ku ntsimbu yetu, “likumi lia vamala va ku malimi ose a vakua vifuti va ka kuata, ku mukunduilo uo uze ikeye kaYundeya, nguavo, Tu ka ya nove, muomu tu nevu ngecize Njambi ua kala nove.” (Zak. 8:23) “KaYundeya” uemanena vaze va ku vuavesa na sipilitu santu. Ve ku va sana naua nguavo “vaIsaleli va Njambi.” (Ngal. 6:16) “Vamala likumi” vemanena vose vakua lulavelelo lua ku yoyela ha mavu miaka yose. Va tantekeya ngecize Yehova ue ku vezikisa civunga ca vaze va ku vuavesa, kaha va na mono ngecize ca pua ku vezika ku lemesela hamo navo
2. Vati “likumi lia vamala” va ka ya hamo na Vakua Kilistu va ku vavuesa?
2 Vutuhu lelo lino ka citava ku tantekeya mazina a vose va ku vuavesa, * vunoni vaze va kala na lulavelelo lua ku yoyela hano ha mavu va kaya hamo na vaze va ku vuavesa. Mu njila ika? Mbimbiliya nguayo “likumi lia vamala” va ka kuata ku mukunduilo uo uze ikeye kaYundeya nguavo, Tu ka ya nove, muomu tu nevu ngecize Njambi ua kala nove.” Mu Mbimbiliya eci cinimbu cili na ku handeka via kaYundeya umo lika. Vunoni aa mezi “nove” na “ua kala nove” a lomboloka vantu va tuvakana umo. Eci calomboloka ngecize ku va tumbuile kaYundeya umo lika houe vunoni ue manena civunga cose ca Vakua Kilistu va ku vuavesa. Ngeci vaze kati va ku vuavesa ve ku pangela Yehova hamo lika na vaze va ku vuavesa. Kaha ka ve ku va mona ngue vantuamena vavo, muomu va tantekeya ngecize Yesu ikeye ua pua Ntuamena ya vose.—Mat. 23:10.
3. Vihula vika tu kumbulula mu cilongesa cino?
3 Mu ku linga na lelo lino kasi kua kala Vakua Kilistu va ku vuavesa, vamo va hasa ku lihula nguavo: (1) Vati Vakua Kilistu va ku vuavesa ve ku li muenamo? (2) Vati tua pande ku muenamo vaze ve kulia mbolo na ku nua viniu ku Mulalelo? (3) Vuno tua pande ku lisosomua nga tu mona ku livuezelela ca vakua kulia ku mulalelo ni? Cino cilongesa ci kumbulula vino vihula.
VATI VAZE VA KU VUAVESA VA PANDE KU LIMUENAMO?
4. Cimamuna cika cili ku 1 Kolintu 11:27-29 ci va na pande ku hilula Vakua Kilistu va ku vuavesa, kaha omo lia vika?
4 Vakua Kilistu va ku vuavesa va pande ku hilula vuino ha cimamuna ca ku 1 Kolintu 11:27-29. (Tandenu.) Vati ua ku vuavesa a hasa ku lia mbolo na ku nua viniu ha Mulalelo “na ku viukila cahi,” ni nguetu oku ka ca mu pandele? Nga ikeye kesi na vusamba vua cili na Yehova kaha kati mukua vusunga, vunoni a lia ku mbolo na ku nua ku viniu, a muesa kasahuntu. (VaHe. 6:4-6; 10:26-29) Eci cimamuna ca ntsindo, ci vuluisa vose va ku vuavesa ngecize va pande ku pua va ku konkama nga va tonda ku ka tambula “cilunguiso ca ku-sana cize ca Njambi ca muli Kilistu Yesu.”—Filp. 3:13-16.
5. Vati Vakua Kilistu va ku vuavesa va na pande ku limuenamo?
5 Sipilitu santu ye ku kuasa vangamba va Yehova ku pua va ku likehesa. (Efe. 4:1-3; Kolo. 3:10, 12) Va ku vuavesa ka ve ku limona ngue va kala na seho ya kama cikuma ku hiana vakuavo. Muomu va tantekeya ngecize Yehova ue ku hana sipilitu santu ku vangamba veni vose cipue vaze kati va ku vuavesa. Kaha ka ve ku limona ngue vakevo lika ve ku ivuisisa vuino vusunga vua mu Mbimbiliya ku hiana nkala muntu. Cikuavo naua ka ve ku leka muntu a lie mbolo na ku nua ku viniu ha Mulalelo. Vunoni ve ku likehesa muomu va tantekeya ngecize Yehova ikeye lika ali na mpoko ya ku lania vantu va ka ye muilu.
6. Kuliya na 1 Kolintu 4:7, 8 kakesi ka ka va pande ku kala nako Vakua Kilistu va ku vuavesa?
6 Vutuhu va ku vuavesa va tantekeya ngecize cilanio ca ku ya muilu ca pua ku vezika ca kama, ka ve ku tonda va va mone ngue va hiana seho. (Filp. 2:2, 3) Vakevo naua va tantekeya ngecize, omo Yehova ua va vuavesele ka zimbuile ku vantu linga va vi tantekeye. Ngeci mukemuo, muntu ua ku vuavesa ke ku komoka nga vantu ha katete ka va tsiliela ngecize va na mu vuavesa. Ue ku vuluka vi ya handeka Mbimbiliya nguayo ka tua pande ku tsiliela vuasi-vuasi muntu a litumbula ngueni Njambi na mu hana cipanga ca ku lifuila cikuma. (Ku-So. 2:2) Omo tua tantekeya nguetu, ua ku vuavesa ke ku tonda va mu mone mu njila ya ku lifuila cikuma, ke ku ya na ku leka vose va uana lua mbangelo ngueni ua ku vuavesa. Mua vusunga ka ka sanduola eyi mizimbu yaco. Ni ku lipamba omo lia viuma via cili via ka linga muilu.—Tandenu 1 Kolintu 4:7, 8.
7. Viuma vika ka ve ku linga Vakua Kilistu va ku vuavesa, kaha omo lia vika?
7 Vakua Kilistu va ku vuavesa ka ve ku singanieka nguavo va pande lika ku kala na vakuavo va ku vuavesa, va linge honi ngue kamo ka civunga ka ku lifuila. Kaha ka ve kuya na ku tonda vakuavo va ku vuavesa linga va simutuile via ku ka sika cavo muilu ni cipue ku lilongesela hamo Mbimbiliya. (Ngal. 1:15-17) Nga va ku vuavesa va lingamo, kaha cikungulukilo ku cende vuino. Ci ka pua ku luisa sipilitu santu, ize ye ku kuasa vantu va Njambi ku kala mu ciyulo na ku pangela hamo.—Loma 16:17, 18.
VATI TUA PANDE KU MUENAMO VA KU VUAVESA?
Kati ca cili ku mona vamuanetu va ku vuavesa ni vakua ku tu tuamenena ngue vakua lutsimo (Talenu cinanga 8) *
8. Omo lia vika mua pande ku zangama ha cifua ci mue ku muenamo vakua ku lia mbolo na ku nua viniu ku Mulalelo? (Kaha talenu litota.)
8 Vati tue ku muenamo vamuanetu va ku vuavesa? Ku komoka cikuma muntu ka ca puile ca cili, cipue nga muanaye ya Kilistu. (Mat. 23:8-12) Mbimbiliya mu ye ku handeka via vakuluntu mu cikungulukilo, ye ku tu mamuna ku tambuluisa “ku-tsiliela cavo,” vunoni nguayo ka tua pandele ku puisa muntu ntuamena yetu. (VaHe. 13:7) Cili vene Mbimbiliya nguayo vamo va pande “tusingimiko tuvali.” Muomu “vakua ku sika mua cili” kaha “ve ku panga mu lizi na mu ku longesa,” kati omo lia ku pua va ku vuavesa houe. (1 Tim. 5:17) Nga tu halesa cikuma Vakua Kilistu va ku vuavesa na ku va haka seho ya kama cikuma, tu ka va vuisa ntsuamua. * Kaha tu hasa ku va lingisa va lihalese. (Loma 12:3) Ngeci mukemuo ka tu tondo ku linga vimo vi hasa ku suntsuisa umo ua vamuanaye ya Kilistu!—Luka 17:2.
9. Vati mu hasa ku muesa kasingimiko ku Vakua Kilistu va ku vuavesa?
9 Vati tu hasa ku muesa kasingimiko ku vantu va vuavesa Yehova? Tu hasa ku lingamo nga ka tu vehula vati va va vuavesele. Muomu eyi ya pua mizimbu yavo lika, kaha ka tuesi na mpoko ya ku i tantekeya. (1 Tes. 4:11; 2 Tes. 3:11) Kaha ka tua pandele ku singanieka nguetu mukua ndzivo yavo, ni vavusoko vavo navo va pua va ku vuavesa. Muomu muntu ke ku suana lulavelelo lua ku ya muilu ku vusoko. Muomu Njambi ikeye ue ku hangula. (1 Tes. 2:12) Kaha ka tua pandele ku pua na ku linga vihula vi vavalesa vakuetu ha mitima. Ca ku muenako, ka citava ku hula ndumbuetu ua somboka ku muanetu ua ku vuavesa, vati ue ku ivua ku tuala ha ku ka yoyela ha mavu miaka yose ca ku hona yalieni. Muomu tua tantekeya nguetu, mu mavu a aha Yehova a ka “kutisa cizango ca viuma viose vili na muono.”—Visa. 145:16.
10. Vati ku likela ku komoka vantu ci hasa ku tu niunga?
10 Nga ka tu mono va ku vuavesa ku pua va seho ya kama cikuma ku hiana vamuanetu vakuavo, ci ka tu niunga. Mu njila ika? Mbimbiliya nguayo vamo va ku vuavesa halumo ka va ka tualelaho ku pua vakua ku ononoka. (Mat. 25:10-12; 2 Pet. 2:20, 21) Vunoni nga tu viana ku komoka vantu, ka tu ka suamangeya va ku vuavesa ni vaze va tsimana, ni vene vaze va sua laza ku pangela Yehova. (Yunda 16) Kaha cipue nga va na vulumuna ni ku seza cikungulukilo, ka tu ka zeye mu lutsilielo ni ku likela ku lemesa Yehova.
VUNO TUA PANDE KU LISOSOMUA NA NUMELU YA VAKUA KU LIA NA KU NUA KU MULALELO NI?
11. Vika vili na soloka ku numelu ya vakua ku lia ku mbolo na ku nua ku viniu ku Mulalelo?
11 Mu miaka ya ingi, numelu ya vantu va kele na ku lia mbolo na ku nua viniu ha Mulalelo ya kele na ku tepuluka. Vunoni mu miaka ino, numelu yaco ili na ku livuezelela. Vuno tua pande ku lisosomua ni? Houe. Tu tantekeyenu omo lia vika.
12. Omo lia vika ka tua pandele ku lisosomua na ku livuezelela ca vakua ku lia mbolo na ku nua viniu ku Mulalelo?
12 “Muangana [Yehova] a tantekeya vaze va na pu veni.” (2 Tim. 2:19) Vamuanetu ve ku tanda vakua ku lia mbolo na ku nua viniu ha Mulalelo ka va tantekeya iya ua ku vuavesa mpundu. Vunoni Yehova ava tantekeya. Kaha numelu yaco ya ambatela kumo na vamo ve ku singanieka nguavo va ku vuavesa nkuma kuahi. Ca ku muenako, vamo va kele na ku lia mbolo na ku nua viniu ha Mulalelo va likela. Vamo halumo omo lia mavezi a mu vuongo ni ku lana ca visoti mu muono, ve ku singanieka nguavo va ka sika hamo na Kilistu muilu. Mua vusunga, ka tu tantekeya vangahi va ku vuavesa va na lisupu ha mavu lelo lino.
13. Vika ya handeka Mbimbiliya ku tuala ha numelu ya vakua ku vuavesa va ka kala ha mavu ntsimbu kanda lamba ya kama kanda i putuke?
13 Va ku vuavesa vavengi va ka kala ku mitamba ya ingi ya mavu omo Yesu a ka vezila na ku va tuala muilu. (Mat. 24:31) Mbimbiliya nguayo ku matangua a ku kotokela, va vandende lika va ku vuavesa va ka lisupa ha mavu. (Ku-So. 12:17) Vunoni ka ya tumbuile vangahi mpundu va ka kalako omo ika putuka lamba ya kama.
Vati tua pande ku linga nga muntu ali na ku lia ku mbolo na ku nua ku viniu ku Mulalelo? (Talenu cinanga 14)
14. Ngue mu ya muesa Loma 9:11, 16 vati tua pande ku ivuisisa cifua ce ku hanguilamo Yehova ve ku vuavesa?
14 Yehova ikeye ue ku hangula ntsimbu ya na pande ku vuavesa muntu. (Loma 8:28-30) Yehova ua putukile ku hangula va ku vuavesa mu nima ya ku sangula Yesu. Eci ci muesa ngecize, ku sekulu ya ku livanga, Vakua Kilistu va vusunga vose va puile va ku vuavesa. Mu nima ya vihita via miaka, cingi ca vaze va litumbuile Vakua Kilistu ka va kavele Kilistu. Vutuhu ngoco, mu miaka yaco Yehova ua vuavesele vaze Vakua Kilistu va vusunga va vandende va lisupileho. Va puile ngue tiliku ize ya tumbuile Yesu ngueni ika kola hamo lika na muila ni visoni. (Mat. 13:24-30) Ku matangua a ku kotokela, Yehova kasi ali na ku tualelelaho ku hangula vantu va kovele mu mukana ua 144.000. * Nga Njambi ali na ku hangula vamo ntsimbu kanda ku kotoka ci hete, tuli na vusunga nguetu ali na ku linga vuino. (Tandenu Loma 9:11, 16.) * Tua pande ku zangana linga kati tu pue ngue vangamba vaze va tumbuile Yesu mu cisimo. Muomu va putukile ku linienga omo lia vuhuanga vua muesele sukuluavuo ku li vaze va pangele mu ntsimbu ya indande.—Mat. 20:8-15.
15. Vuno vose Vakua Kilistu va ku vuavesa va kala mu civunga ca mukua manda ua cili mukua mana ngue mu ya muesa Mateo 24:45-47 ni? Lombololenu.
15 Kati vose va li na lulavelelo lua ku ka yoyela muilu, va kala mu civunga ca “mukuamanda ua cili mukua mana.” (Tandenu Mateo 24:45-47.) Ngue mu ca puile ku sekulu ya ku livanga, Yehova na Yesu lelo lino ve ku pangesa vantu va vandende lika mu ku lisa na ku longesa vavengi. Ku sekulu ya ku livanga Yehova ua pangesele Vakua Kilistu va vandende lika mu ku soneka mikanda ya ciNgelengu. Na lelo lino, Njambi ua hana Vakua Kilistu va ku vuavesa va vandende lika cipanga ca ku lisa vantu veni “ku ntsimbu ya ku lia.”
16. Vika mu na lilongesa mu cilongesa cino?
16 Vika tua lilongesa mu cilongesa cino? Yehova ua likuminia ku ka hana muono ka ue ku hua ku vantu vavengi ha mavu na vavandende lika muilu vaze va ka sika hamo na Yesu. Yehova a hana cilunguiso ku vangamba veni vose, ku “kaYundeya” na “vamala likumi,” kaha ua tonda vose va niunge masiko eni na ku pua va ku konkama. Vose va na pande ku likehesa. Tu vose tua pande ku pangela hamo na mutima umo lika. Kaha tu vose tua pande ku niunga ciyulo mu cikungulukilo. Omo tu li mu hiehi na ku kotoka ca mavu, tu tualelelenuho ku pangela Yehova na ku kava Kilistu mu ku pua “vutanga vumo lika.”—Yoa. 10:16.
^ cin. 5 Mu muaka uno Mulalelo ua ku-tsa ca Yesu u ka kalako Lia mu Civali, 7 ya Abril. Vati tua pande ku muenamo vaze ve ku lia ku mbolo na ku nua ku viniu ku ciuano caco? Vuno tua pande ku lisosomua nga numelu ya vakua ku-lia na ku nua i tualelelaho ku livuezelela ni? Evi vihula tu vi ku mbulula mu cilongesa cino, ca tsindika ha cilongesa ca tuhukile mu Vutala vua Janeiro ya 2016.
^ cin. 2 Kuliya na Visamo 87:5, 6, citava ku lutue tangua Njambi a ka solola mazina a vose va ka sika hamo na Yesu.—Loma 8:19.
^ cin. 8 Talenu mu cikasa “Cilemo ka ce ku Lisahuisa” muVutala vua Janeiro ya 2016.
^ cin. 14 Vutuhu Vilinga 2:33 ya muesa ngecize Yesu neni ua kala mu cipanga ca ku vuavesa, Yehova lika ikeye ua kala na mpoko ya ku lania muntu
^ cin. 14 Nga mu tonda ku tantekeya mizimbu ikuavo, talenu “Vihula via Vakua ku Tanda” mu Vutala 1 de Maio 2007 Mu putu.
MUASO 34 Ku Endela mu Vuoloke
^ cin. 56 VILI HA VIKUPULO: Aci singaniekenu nga vamuanetu va zengeleka muluua ua ku cikota cetu na mpueyeni mu ku va nona vikupulo. Ku lingamo ci ka pua kasahuntu ka kama!
