MUTUE ua ciuano ca muhato ca 2017 ua puile, “Kati mu Likele!” Ciuano caco ca tu muesele vati tu hasa ku kolesa mu visoti. Mua hiti miaka 4 tunde ha tua kelelele na ciuano caco. Vunoni na lelo lino kasi tuli ka ku tualelelaho ku kolesa mu visoti via mu mavu ano.

1-2. Vati cikulaheso ca Yehova ca ku Isaya 65:16, 17, ci hasa ku tu kuasa ku tualelelaho ku muesa lukakatela?

² Visoti vika muli na ku lihita navio mu ntsimbu ino? Vuno mua tsisa umo kavusoko ni kavusamba ni? Muli na ku pinda na cisoti ca cihindu ni? Muli na ku pinda na vukulupe? Muli na ku pinda na visoti ngeci mua, viyovo via mavu, vukenia, ni ku mi luisa? Muli na ku yanda omo lia musongo ua COVID-19, ni visoti vieka ni? Tua lavelela na ndzolela ya kama litangua li vi ka hua visoti viose. Kaha ka tu ka vi vuluka naua na limo litangua liahi!—Tandenu Isaya 65:16, 17.

3. Vika tua pande ku linga kaha omo lia vika?

³ Muono mu mavu ano u na kaluua cikuma, kaha citava halumo tu ka hita mu visoti via ku hiana ku lutue. (Mat. 24:21) Mua vusunga, tua tondeka ku tualelelaho ku kaniamesa lukakatela luetu. Omo lia vika? Muomu Yesu ua handekele ngueni: “Miono yenu mu ka i nganiala na lukakatela luenu.” (Luka 21:19) Ku singanieka ha vati vakuetu ve ku hasa ku kolesa mu visoti ngeci mua vietu, ci hasa ku tu kuasa ku kolesa.

4. Omo lia vika tu hasa ku handekela nguetu Yehova ua pua lungano lua cili lua ku muesa lukakatela?

⁴ Iya ua pua lungano lua cili cikuma lua ku muesa lukakatela? Mua vusunga Yehova Njambi. Vuno eci cikumbululo ca mi komouesa ni? Mu vuasi-vuasi ci hasa ku mi komouesa vene. Vunoni nga mu talaho vuino, ano mavu a kala ku ngolo ya Satana, kaha mua sula visoti. Yehova ua kala na ngolo ya ku fumisako visoti viose ambe mu ntsimbu ino vene, vunoni ua lavelela ku ka lingamo  ku lutue. (Loma 9:22) Mu ntsimbu yose eyi, Yehova ue ku lavelela na lukakatela ntsimbu ya hangula ku lingamo. Tu hilulenu ha viuma 9 via hangula Yehova ku muesa lukakatela.

5. Vati lizina lia Njambi ve ku lizualesa, kaha vati ce ku mi vuisa ku mutima?

⁵ Ku zualesa lizina lieni. Yehova ua lema cikuma lizina lieni kaha ua tonda vantu vose va li singimike. (Isaya 42:8) Vunoni tunde imo miaka 6.000 ku nima, lizina lia Njambi kasi ve ku lizualesa. (Visa. 74:10, 18, 23) Kasahuntu kaco ka putukile mu citungu ca Endene omo Ndiavu (ni nguetu “Mukua Visaki”) ua vangeyele Njambi ngecize ua vingilikile viuma via cili vi va tondekele vaAndama na Eva linga va yoye mu ndzolela. (Njen. 3:1-5) Kaha tunde tangua lize, Yehova ve ku mu vangeya ngecize ue ku vingilika vantu viuma via cili vi va tondeka. Yesu ua lisosomuene na kasahuntu ka va kele na ku muesa vantu ku lizina lia Ise. Ngeci mukemuo, ua longesele vandongesi veni ku vundila ngecize “Tatetu u li muilu, va [lelese] lizina liove.”—Mat. 6:9.

6. Omo lia vika Yehova ali na ku hitisamo ntsimbu ya kama linga a muese ngecize ikeye ua fuila ku sika melu na mavu?

⁶ Ku luisa mpoko ya Yehova ya ku sika. Yehova ikeye ua kala na mpoko ya ku sika melu na mavu, kaha ku sika ceni cikeco ca cili. (Ku-So. 4:11) Vunoni Satana ua hungumuine tungelo na vantu, mu ku va lingisa ku singanieka ngecize Njambi ka kele na mpoko yaco. Ka ca tavele ku manusula cimpande ca ku pua aha mu litangua lia ngongo. Ca tondekele ntsimbu ya kama linga vantu va limuene ngecize na limo litangua liahi va ka hasa ku lisika vuino vavene, ca ku hona ku va tuamenena kuli Sakatanga uavo. Yehova ua muesa mana mu ku ecelela cimpande caco mu miaka yose eyi, linga vantu va limuene vakevo vavene. (Yele. 10:23) Omo lia Yehova ku muesa lukakatela, cimpande caco a ka ci manusulako mu vutuntu. Kaha omo liaco, na umo uahi a ka kala na vimpata ngecize Njambi ikeye lika ua kala na mpoko ya ku sika melu na mavu. Cikuavo naua, vantu vose va ka tantekeya ngecize Vuangana vua Njambi vukevuo lika vu ka neha ciyulo ca vusunga na ku lembama hano ha mavu.

7. Veya va alulukilile Yehova kaha vati va ka va linga?

⁷ Lisino li va muesele vamo vana veni. Viose via tangele Yehova ka via kele na vipenga, cipue tungelo na vantu navo va puile va ku tantuluka. Vunoni umo ua tungelo ua alulukilile Njambi na ku pua Satana (ni nguetu “Mukua Nkole”) na ku hungumuna vaAndama na Eva linga navo va muese lisino kuli Njambi. Kaha vamo tungelo na vantu va lipandakanene kuli Satana mu ku muesa lisino. (Yun. 6) Mu nima ya ntsimbu, cipue vene vamo vakua cifuti ca hanguile Yehova, vaIsaleli, navo va mu vianene na ku lemesa vanjambi va makuli. (Isaya 63:8, 10) Mua vusunga, vendele Yehova vungungu. Vutuhu ngoco, Yehova ali na ku tualelelaho ku muesa lukakatela, noho ha li ka hetela litangua lia hangula mu ku nongesa vakua lisino vose. Kaha eci ci ka vuisa Yehova hamo lika na vangamba veni vakua lukakatela ndzolela ya kama!

8-9. Vika ve ku vangeya Yehova, kaha vika tue ku linga ku tuala ha makuli aco?

⁸ Makuli eku sanduola Satana ku-sua kumo. Satana ua vangeyele Yombi na vangamba va Yehova vakuavo va ku nima ngecize va kele na ku pangela Njambi omo lia vukuasi vua kele na ku va hana. (Yombi 1:8-11; 2:3-5) Kaha na lelo lino Satana ue ku vangeya vangamba va Yehova ngueni va pua tuvinga mu sukuma ni nguetu ve ku mu pangela omo lia vukuasi vue ku va hana. (Ku-So. 12:10) Vunoni tu hasa ku lingako mutamba uetu mu ku muesa ngecize Satana ua pua mukua makuli. Vati tu hasa ku lingamo? Mu ku tualelelaho ku muesa lukakatela mu visoti na ku pua vakua vuoloke kuli Yehova, muomu tua mu lema cikuma. Kaha ngeci mua Yombi, Yehova a ka vezikisa lukakatela luetu.—Tia. 5:11.

 ⁹ Satana ue ku pangesa vakuluntu va malombelo, mu ku vangeya Yehova ngecize ua pua cikenia kaha naua ikeye ue ku koka lamba. Nga ku tsa umo kanike, vamo ve ku handeka nguavo Njambi ikeye na mu sana linga a ka pue kangelo muilu. Mua vusunga aka ka pua kasahuntu ka kama! Muomu tu tantekeya ngecize Yehova ua pua Tata ua cilemo. Ngeci mukemuo, cipue nga tu pinda na cimo cisoti ca cihindu ni tua tsisa muntu u tua lema, na limo litangua liahi tu ka vangeya Njambi ngecize ikeye kavikoka. Vunoni tua tsiliela nguetu Njambi tangua a ka manusulako mavezi na ku-tsa. Cikuavo naua, tu hasa ku lekako vose vaze ve ku tu halakana ngecize Yehova ua pua Njambi ua cilemo. Mu tue ku lingamo, tue ku kuasa Yehova ku kumbulula uze ue ku mu tsopa, Satana.—Visi. 27:11.

10. Visamo 22:23, 24 ya handeka vika ku tuala hali Yehova?

¹⁰ Lamba i ve ku mona vangamba veni. Yehova ua pua Njambi mukua cikeketima. Ka lemene ku mona vangamba veni va yanda omo lia ku va luisa, ku vavala, ni vene omo lia ku hona ku tantuluka. (Tandenu Visamo 22:23, 24.) Yehova ue ku ivua ku vavala ku mutima nga a tu mona tu yanda. Ngeci mukemuo, a ka manusulako lamba yose. (Setekesenu na Ezundu 3:7, 8; Isaya 63:9.) Litangua li ka heta, omo a ka hunda masozi ose ku meso etu “na ku-tsa ka ci ka kala naua; cipue ku-linienga na vusiua ka ci ka kala naua, cipue ku lila, cipue ku vavala.”—Ku-So. 21:4.

11. Vati Yehova ue ku livua ku mutima ku tuala ha vangamba veni va tsa?

¹¹ Ku-tsa ca vavusamba veni. Vati Yehova ue ku livua ku mutima ku tuala ha vavusamba veni vakua lutsilielo va tsa? (Yombi 14:15) Vuno mua singaniekaho laza ha vusona vue ku ivua Yehova ku tuala hali kavusamba keni Avilahama ni? (Tia. 2:23) Ni vusona vue ku vuila Mosesa uze ya handekele neni “cihanga ku cihanga”? (Ezu. 33:11) Kaha naua ue ku ivua vusona vua miaso ya ku sangaziala ya kele na kuimba Ndaviti na  vakuavo vakua visamo! (Visa. 104:33) Vutuhu ava vavusamba veni va kosa mu tulo tua ku tsa, Yehova ka va suvile. (Isaya 49:15) Kaha naua ue ku vuluka viose ku tuala hali vakevo. Mu mezi akuavo tu hasa ku handeka nguetu, kuli Yehova ngue “vose vali na muono.” (Luka 20:38, Litavasyano Lyaliha.) Tangua, Yehova a ka va sangula na ku halakana naua ku vivundilo viavo, kaha na ku tava naua ku lemesa cavo. Nga mua tsisa muntu u mua lema, ku vuluka viuma viose evi, ci hasa ku mi lembezieka na ku mi kaniamesa cikuma.

12. Kuno ku matangua a ku kotokela, vika vili na ku vuisa cikuma Yehova ku vihia ku mutima?

¹² Vantu va vapi ve ku pakesa vakuavo. Omo lisino lia putukile mu citungu, Yehova ua tantekeyele ngecize viuma vi ka tualelelaho ku vihia noho ha aka vi sungamesela. Yehova ua zinda ku mona mavu a ku sula na vilinga via ku vihia, vuhenge na vukenia. Ntsimbu yose Yehova ua haka seho ya ku lifuila ku vakua ku yanda, ngeci mua vana vantsiua na vantuluue. (Zak. 7:9, 10) Cikuavo naua, Yehova ue ku ivua ku vavala ku mutima cikuma-kuma mue ku mona vangamba veni vakua lutsilielo va va pakesa na ku va mbila mu tumenga. Ngeci mukemuo, enu vose mu mue ku lihakela kapandi ka ku kolesa hamo lika neni kalenu na vusunga ngecize Yehova ua mi lema.

13. Vilinga vika via ntsoni vie ku mona Yehova ha kati ka vantu kaha vika a ka linga?

¹³ Ku vihia ca vantu. Satana a tantekeya ngecize vantu va va tangele mu ciseteko ca Njambi, ngeci ua lema ku va popolola. Ku matangua a Noa, omo Yehova ua muene ngecize ‘vipi via muntu via lanene cikuma ha mavu,’ “ua lisimuokele” kaha “ca mu vavalesele ku mutima.” (Njen. 6:5, 6, 11) Vati co lelo lino, viuma vi na sungama ni? Na limo litangua liahi! Satana ue ku ivua ndzolela ya kama mue ku mona vupangala vua lisanduoka mu vifua viose, ngeci mua ku limona ku mivila ca yala na mpuevo ku va liambatele na ca vakua vilio vimo! (Efe. 4:18, 19) Kaha ndzolela ya Satana ye ku livuezelela cikuma-kuma, mue ku uisila umo ngamba ya Yehova mu vupi vua kama. Vunoni vuovuno Yehova a ka muesa mpundu ngecize ua zinda vupangala mu ku nongesa vose vakua ku vu linga, vaze ve ku viana ku aluluka.

14. Vika vantu ve ku linga ku viuma via ku tanga?

¹⁴ Ku vihisa viuma via ku tanga. Njambi ua hana citeli ca ku niunga mavu ku vantu. Vunoni vantu ka ve ‘ku sika lika vakuavo mu ku liyandesa vakevo vavene’, vunoni naua ve ku vihisa mavu na ku yandesa tusitu va va va kundika mu ku niunga. (Ekel. 8:9; Njen. 1:28) Vamo vakua siensia nguavo, omo lia viuma vi ve ku linga vantu, vamo tusitu na miti tangua va ka huaho hano ha mavu. Ngeci mukemuo vantu ve ku lisosomua cikuma na viuma via ku tanga! Tue ku santsela cikuma kuli Yehova muomu ua kulahesa ku “enieka vaze venieka mavu,” kaha ose aka a puisa citungu.—Ku-So. 11:18; Isaya 35:1.

15-16. Vika vie ku tu vuisa cizango ca ku muesa lukakatela ngeci mua Yehova? Hanenu cimueso.

¹⁵ Singaniekenu ha viuma viose vie ku muesa Yehova lukakatela mu makulukazi a miaka. (Talenu cikasa “ Viuma vie ku Muesa Yehova Lukakatela.”) Yehova nga ua nongesa laza ano mavu a ku vihia. Vunoni ali na ku tualelelaho ku muesa lukakatela, kaha eci ca pua civezikiso ca kama kuli etu! Aci singaniekenu ha cimueso eci. Vamo vayala na mpuevo, vali na ku lavelela ku semuka ca kakeke. Vunoni ndotolo a va leka ngecize kakeke ali na citanga ca kama ca cihindu, kaha muono ueni u ka kaluua cikuma ni a ka yoya lika mu ntsimbu ya indende. Vunoni ambe ngoco, visemi va na vuahelela na ku semuka ca kakeke. Vutuhu va na tantekeya ngecize va ka tondeka ku lihakela kapandi ka kama ka ku mu lela.

¹⁶ Na vuno vene, vana vose va Andama na Eva ve ku semuka na ku hona ku tantuluka. Vutuhu  ngoco, Yehova kasi ua va lema na ku va haka seho. (1 Yoa. 4:19) Vunoni hali cimo ku litepa ha kati ka Yehova na visemi va tu na tumbula mu cimueso. Ku litepa cika? Muomu Yehova a hasa ku sungamesa visoti vi ve ku mona vana veni. Kaha ua hangula ntsimbu ya ka fumisako mu vutuntu visoti viose vi tue ku lihita navio. (Mat. 24:36) Ku handeka vusunga, eci cilemo ca Yehova ce ku tu vuisa cizango ca ku mu tambuluisa mu ku muesa lukakatela ambe nga tu hita mu visoti.

17. Vati muzimbu ua Yesu u tu uana ku VaHevelu 12:2, 3, u hasa ku tu kuasa ku tualelelaho ku kolesa?

¹⁷ Yehova ua pua lungano lua ku tantuluka ku tuala ha ku muesa lukakatela. Yesu ua tambuluisile mua cili Ise mu ku muesa lukakatela. Yesu mua kele hano ha mavu, ua kolesele na lukakatela omo va mu tsopele, ku mu vuisa ntsoni, kaha na ku mu sukika ha citi ca kayando. (Tandenu VaHevelu 12:2, 3.) Lungano lua Yehova ku tuala ha ku muesa lukakatela, lua kuasele Yesu ku kolesa mu visoti. Kaha netu lu hasa ku tu kuasa.

18. Vati 2 Petulu 3:9, u tu kuasa ku ivuisisa viuma vi li na ku lipuisamo omo lia lukakatela lua Yehova?

¹⁸ Tandenu 2 Petulu 3:9. Yehova a tantekeya ntsimbu ya cili ya ka manusulako vupi vuose hano ha mavu. Omo lia lukakatela lueni, makulukazi na makulukazi a vantu va uana vukovelelo vua ku mu tantekeya na ku lihana kuli ikeye mu ku va mbatiza. Ava vantu vaco, va kala mu civunga ca kama kaha ve ku tualelelaho ku kolesa mu ku muesa ku santsela cavo kuli Njambi. Ku lutue, omo makulukazi na makulukazi a vaze va ka kolesa na ku ntsongo va ka tambula vivezikiso, vose va ka mona ngecize nkuma lukakatela lua Yehova ka lua ile mu ngoco!

19. Kapandi kaka tua pande ku lihakela kaha civezikiso cika tu ka tambula?

¹⁹ Lungano lua Yehova, lu na tu longesa vati tu hasa ku muesa lukakatela na ndzolela. Vutuhu Satana ua koka vusiua na lamba ya kama, vunoni Yehova kasi ue ku tualelelaho ku pua Njambi ua ndzolela. (1 Tim. 1:11) Ngeci mukemuo, netu tu hasa ku tualelelaho ku muesa lukakatela noho ha i ka hetela ntsimbu omo Yehova a ka lelesa lizina lieni, mpoko yeni ya ku sika, ku tundisako vupi vuose, kaha na lamba yose i tue ku pinda nayo lelo lino. Tu vose tu lihakelenu kapandi ka ku tualelelaho ku muesa lukakatela, na ku vuluka ngecize Tatetu ua muilu neni ali na ku lingamo. Nga tu lingamo, muntu ku muntu a ka limuena ku lipuisamo ca aa mezi: “Na vezika yala uze a kolesa ku vieseko; muomu omo va na mu eseka laza, a ka tambula cilongo ca muono, cize Muangana ua ci sikile kuli vaze va mu lema.”—Tia. 1:12.