Vihula via Vakua ku Tanda
Vuno citava Vakaleho va Yehova va pangese visaiti via malo, mu ku tonda muntu ua ku liambata neni ni?
Yehova ua tonda vaze ve ku liambata va yoye mu ndzolela, na ku tualelelaho ku likuata kumo umo na mukuavo. (Mat. 19:4-6) Nga mua tonda ku ambata ni ku somboka, vati mu hasa ku uana muntu ua cili ua ku liambata neni? Mu ku pua Sakatanga uetu, Yehova a tantekeya vati vantu va hasa ku litantekeya, ku liambata na ku yoya mu ndzolela mu vulo. Ngeci mukemuo, nga mu kava vitume via tu hana, mu ka uana vukuasi vua vuingi. Tu hilulenu vimo vitume viaco.
Ha katete, tua pande ku ivuisisa evi ku tuala hali etu vavene: “Mutima uonga mu ku hiana viuma viose, na ukeuo ua hiana ku pihia.” (Yele. 17:9) Nga va yala na mpuevo ve ku tonda muntu ua ku liambata neni va liuana, mitima yavo ye ku lua cikuma ku tuala hali umo na mukuavo. Kaha eci ci hasa ku va kaluuisa ku linga vihangula via mana. Nga cuma ca kama ci lingisa vantu vavali ku liambata ci pua lika cifua ci ve ku livuilamo ku mitima ku tuala hali umo na mukuavo, va hasa ku ka liveya ku lutue. (Visi. 28:26) Ngeci mukemuo, nga vantu va ci li ku vuputukilo vua ku litantekeya cavo, ka ca puile ca cili ku lileka mezi a cilemo a ku hianesamo, ni ku likulahesa viuma ntsimbu kanda va ci litantekeye vuino.
Visimo 22:3 nguayo: “Mukua liano a mona vupi, kaha a vanda: vunoni visiname va hitako kaha va ci yandela.” Vusonde vuka vu hasa ku kala ha ku pangesa visaiti via malo? Ca vusiua ku handeka nguetu, vamo va liuanenene mu visaiti viaco, mu nima ya ntsimbu va nongonuene ngecize muntu u va kele na ku litantekeya neni ua vendele ha vuongo. Cikuavo naua, vakua lizangamena, va panga vikonta via visaki linga va zangamene vantu vimbongo. Vintsimbu vimo, vamo ve ku linga ovu vuizi vuaco, ve ku litumbula ku pua Vakaleho.
Kua kala naua vusonde vukuavo. Vimo visaiti via malo, vie ku pangesa viprograma via vikomputador mu ku tombuesa vantu. Vunoni ka kuesi vukaleho vua muesa ngecize evi vinjila viaco vie ku kuasa mpundu. Vuno ci ka pua ku muesa mana, ku kulahela muli imo programa ya komputador ya ku panga ku vantu, linga tu puisemo cuma ca seho ya kama ngeci mua vulo ni? Vuno viprograma via mu vikomputador citava vi lipuise hamo na vitume via mu Mbimbiliya ni?—Visi. 1:7; 3:5-7.
Citume ca ku Visimo 14:15 nguaco: “Cisiname a tsiliela mezi ose; Vunoni mukua liano a tala vuino ku vinanga vieni.” Ntsimbu kanda mu singaniekele umo ku pua muntu ua ku liambata neni, ca pua ca cili ku livanga ku mu tantekeya vuino-vuino. Vunoni ci hasa ku kaluua ku puisamo evi nga vantu va liuanena mu internete. Ambe nga mua lihana mizimbu ya umo na mukuavo, kaha mue ku simutuila ntsimbu ya kama na ku lituma vimesaje, vuno mu hasa ku handeka vene nguenu mu mu tantekeya vuino ni? Vamo va singaniekele nguavo va na uana mukua cilemo cavo, va lisimuokele cikuma litangua li va liuanene mpundu citona meso.
Mukua Visamo ua handekele ngueni: “Ka nja tumamene hamo na vamala vakua makuli; cipue ka nji ka kovela hamo na vakua civembulu.” (Visa. 26:4) Vavengi va kala na ciizilila ca ku haka mizimbu ya makuli mu vikonta viavo via mu internete, linga vaye ku mitima ya vantu. Va hasa ku sueka vuntu vuavo ni ka vu lisolola ha toma omo lia ku kala mu internete. Ca ku muenako, vamo vantu va hasa ku litumbula nguavo Vakaleho va Yehova, vuno va pua mpundu va ku mbatiza ni? Va ku-hia mu lutsilielo ni? Va likuata mpundu vusamba na Yehova ni? Vuno ve ku va mona ku pua lungano lua cili mu cikungulukilo cavo ni? Ni va pua lungano lua ku vihia kaha citava vene ku va tumbula ku pua “vusamba vua vupi”? (1 Kol. 15:33; 2 Tim. 2:20, 21) Kuliya na Mbimbiliya, vuno va zituka mu ku ambata cipue ku somboka ni? Evi viuma via pua via seho ku vi tantekeya, vunoni ca pua ca cikalu ku vi puisamo ca ku hona vukuasi vua vakuetu Vakaleho va tantekeya vuino muanetu ni ndumbuetu uaco. (Visi. 15:22) Kaha ka kuesi ngamba ya Yehova ua ku ononoka a heta ha ku singanieka ku likutila “ku mukambo hamo na vaze ka va tsilielele.”—2 Kol. 6:14; 1 Kol. 7:39.
Mu ku linga ku litantekeyela mu visaiti via malo muli vusonde vuose ovu, kua kala vinjila vieka via cili vi tu hasa ku tondelamo muntu ua ku liamba neni linga vulo vuetu vu kaye Njambi ku mutima. Vati honi mu hasa ku uana muntu ua cili ua ku liambata neni? Nga viuano via mbunga ka va vi vindikile, Vakaleho va Yehova ve ku hasa ku litantekeya citona meso na vakuavo ku hitila mu viuano via mu cikungulukilo, viuano via limbo, viuano via muhato, na viuano vikuavo naua.
Omo mu tualelelaho ku uana ntsimbu ya ku kala hamo lika, mu ka mona ha toma nga vizango na matumbe enu via litombola ni kuahi
Vunoni nga viuano via mbunga va vi vindika, ngeci muze mu va na lingi mu ntsimbu ino ya musongo ua COVID-19, tue ku likungulula ku hitila mu internete, kaha vaze va tonda muntu ua ku liambata neni va hasa ku mu uana ha vintsimbu viaco. Mu viuano viaco, mu ka kala na vukovelelo vua ku va mona va linga mitamba mu ciuano na ku ivua vikumbululo viavo via lutsilielo. (1 Tim. 6:11, 12) Kaha naua, mu nima ya viuano, citava ku pangesa viprograma viaco na ku litepa-tepa mu vivunga mu ku simutuila. Ku hitila mu viuano evi via mu luhundzi ni nguetu via mu internete mu hasa ku tantekeya vuntu vua muntu, ku tala ku cifua ca a simutuilamo na vamuanetu vakuavo. (1 Pet. 3:4) Kaha mu ku hita ca ntsimbu omo mu tualelelaho ku litantekeya, mu hasa ku nongonona nga vizango na matumbe enu, via litombola kaha naua nga nenu mpundu mua litombola umo na mukuavo ni kuahi.
Nga Vakua Kilistu va tonda vinjila via ku liambatelamo vize via litombola na vitume via mu Mbimbiliya, va ka hasa ku limuena vusunga vueci cisimo: “Uze a uana mpuevo [ni yala] a uana cuma ca ku viuka kaha na uana kavumbi kuli Yehova.”—Visi. 18:22.
