1. Omo lia vika Yehova ke ku tu setekesa na vakuetu?

YEHOVA ua lema ku liseza-seza ca viuma. Tu tantekeya ngoco muomu ua tangele miti, tusitu na vantu va ku liseza-seza. Muntu ku muntu ua lifuila, ngeci mukemuo Yehova ke ku tu setekesa ku vakuetu. Ikeye ue ku hilula mutima uenu, ni nguetu, vuntu vuenu mpundu. (1 Sam. 16:7) Kaha a tantekeya vize vi mu hasa ku puisamo, vuzeye vuenu, na cifua ci mua kolelamo. Ke ku mi vundila vize ka mu hasa ku puisamo. Tua pande ku tambuluisa Yehova mu ku limona mu cifua ce ku mi muenamo ikeye. Nga tu lingamo tu ka pua va “ku silikinia,” ni nguetu ka tu ka limono ngue tu va seho cikuma ni ku lipopolola naua cikuma.—Loma 12:3.

2. Omo lia vika ka ca puile ca cili ku lisetekesa na vakuetu?

² Tu hasa ku lilongesa via vingi ku vakuetu. Ca ku muenako, tu hasa ku lilongesa via vingi kuli umo muanetu ni ndumbuetu ua kala na vutongue mu ku ambulula. (VaHe. 13:7) Kaha nga tu mu tambuluisa, tu ka vueza ku vutongue vuetu. Vunoni ha kala ku litepa ha ku tambuluisa lungano lua cili lua muntu na ku lisetekesa neni. (Filp. 3:17) Muomu ku lisetekesa na vakuetu ci hasa ku tu lingisa ku ivua cipululu, ku ivua vusiua, kaha na ku limona ngue ka tua kele na seho. Ngue mu tua lilongesele mu cilongesa ci na hiti, ku lisetekesa na vamuanetu mu cikungulukilo ci hasa ku zeyesa vusamba vuetu na vakuetu. Ngeci ku cilemo ceni, Yehova ua tu mamuna ngueni: “Muntu uose a hilule vilinga vieni, kaha a ka lipambe nevi via ivene, kati nevi via mukuavo.”—Ngal. 6:4.

3. Viuma vika vi mua puisamo mu lutsilielo vie ku mi vuisa ndzolela?

³ Yehova ua tonda linga mu viukilile na vize vi mue ku hasa ku puisamo mu lutsilielo. Ca ku muenako, nga va mi mbatiza mua  pande ku viukilila na cinanga caco. Enu vavene mua lingilile cihangula caco. Vunoni mua lingilemo omo lia cilemo cenu kuli Njambi. Aci singaniekenu ha cifua ci mua kolelamo mu lutsilielo tunde ha mbatizimu. Ca ku muenako, vuno mua putuka ku lema ku tanda na ku lilongesa Mbimbiliya mu vulika ni? Vuno vivundilo vienu via putuka ku pua mpundu via ku mutima ni? (Visa. 141:2) Vutongue vuenu vua ku handeka na vantu mu lihia na ku pangesa vikuata vietu via mu ku ambulula, vua livuezelela ni? Vuno Yehova na mi kuasa ku pua yala, mpuevo ni cisemi ua cili ni? Nga kuli vimo vi mua puisamo hali evi vi tua tandanga, muli na vusunga vua ku ivua ndzolela.

4. Vika tu simutuila mu cilongesa cino?

⁴ Tu hasa ku kuasa vakuetu ku viukilila na vize vi ve ku hasa ku puisamo mu lutsilielo. Kaha naua tu hasa ku va kuasa linga kati va lisetekese na vakuavo. Mu cilongesa cino tu mona vati visemi va hasa ku kuasa vana vavo, vati vaze va liambata va hasa ku likuasa umo na mukuavo, kaha na vati vakuluntu na vamuanetu vakuavo va hasa ku likuasa umo na mukuavo. Mu ku manusuila, tu simutuila ha vitume via mu Mbimbiliya vi hasa ku tu kuasa ku lihakela vizango via mu lutsilielo vi tu hasa ku puisamo kuliya na vuhasi vuetu.

5. Kuliya na Efeso 6:4, vika ka va pandele ku linga visemi?

⁵ Visemi va na pande ku linga cose mangana kati va setekese vana vavo, umo na mukuavo. Cipue ku lavelela va linge vize ka va hasa ku puisamo. Muomu ku lingamo, ci hasa ku vuisa vana vusiua. (Tandenu Efeso 6:4.) Umo ndumbuetu ua lizina Sachiko * ngueni: “Valongisi ku sikola va nji songangeyele linga nji hiane vakuetu vose. Kaha vanana navo va kele na ku nji songangeya ku lingamo, nguavo linga nji hane vukaleho kuli mulongisi uange, na vatate vaze ka va puile Vakaleho. Ha vieseko via ku sikola vanana ka va tondele nji sevukeho na cimo cahi, vunoni ca pua ca cikalu ku hona ku sevukaho vimo. Vutuhu laza nja manusuile sikola, vunoni kasi nje ku singanieka ngecize viuma vi nje ku linga mu cipanga ca Yehova ka via puilemo mu ku muya ku mutima.”

6. Vika visemi va hasa ku lilongesa ku Visamo 131:1, 2?

⁶ Ku Visamo 131:1, 2 kua kala cilongesa ca seho ku visemi. (Tandenu.) Muangana Ndaviti ua handekele ngueni ka kele na “ku eseka viuma via kama” cipue viuma via ku mu hiana. Ku likehesa na ku konkama ceni via ‘lembamesele na ku  holuesa’ muono ueni. Vika visemi va hasa ku lilongesa ku lungano lua Ndaviti? Visemi va hasa ku muesa ku likehesa na ku konkama, mu ku hona ku hianesamo ku tuala ha viuma vi ve ku lavelela kuli vakevo vavene na kuli vana vavo. Visemi va hasa ku kuasa vana vavo va livue ngecize va kala na seho mu ku muesa ngecize va tantekeya vuhasi na vuzeye vua kala navuo nkala muana, omo va mu kuasa ku lihakela vizango mu muono. Umo ndumbuetu ua lizina Marina a vuluka ngecize na limo litangua liahi va naye va mu setekesele na vamuanaye vatatu ni na vanike veka. Ivene ngueni: “Vanana va nji longesele ngecize muntu ku muntu ua kala na vuana vua ku lifuila, kaha tu vose tua kala na seho ku meso a Yehova. Omo lia viuma vi va nji longesa vanana, ca cikalu ku lisetekesa na vakuetu.”

7-8. Vati yala a hasa ku muesa kavumbi kuli mpueyeni?

⁷ Yala Mukua Kilistu na pande ku muesa kavumbi kuli mpueyeni. (1 Pet. 3:7) Kavumbi ka pua ku muesa seho ya ku lifuila na kasingimiko ku vakuetu. Ca ku muenako, yala ue ku muesa kavumbi kuli mpueyeni mu ku mu vuisa ngecize ua kala na seho. Kaha ke ku mu vundila vize ka hasa ku puisamo. Cikuavo naua, na limo litangua liahi ue ku mu setekesa na vampuevo veka. Vati a hasa ku livua mpuevo nga yalieni a mu setekesa na vakuavo? Yala lia ndumbuetu Rosa ka puile mukaleho ue ku mu setekesa na vampuevo veka. Kaha vilinga vieni via ku vihia via lingisa ndumbuetu Rosa kati lika a livue vungoco, vunoni na ku livua ngecize na umo uahi ua mu lema mpundu. Ivene ngueni: “Omo liaco ce ku tondeka ku nji vuluisa ku sua kumo ngecize Yehova ua nji haka seho.” Vunoni yala Mukua Kilistu na pande ku muesa kavumbi kuli mpueyeni. Muomu a tantekeya ngecize ku lingamo ca kuata ku ku likata ceni na mpueyeni na ku vusamba vueni na Yehova. *

⁸ Yala ue ku hana kavumbi kuli mpueyeni, ue ku mu sangala na ku mu vuluisa ntsimbu yose ngecize ua mu lema. (Visi. 31:28) Evi vikevio via lingile yala lia ndumbuetu Katerina u tu na tumbuile mu cilongesa ci na hiti linga a hase ku kuasa mpueyeni ku vula citanga ca ku livua vungoco. Ndumbuetu Katerina mua puile kanike, vanaye va kele na ku mu popolola kaha na ku mu setekesa na vakuavo vampuevo na vavusamba veni. Omo liaco, ua kele na ku lisetekesa na vakuavo cipue vene mu nima ya ku lilongesa vusunga. Vunoni yalieni uze ua pua Mukua Kilistu ua mu kuasa ku sungamesa evi visinganieka vieni na ku mu kuasa ku limona mu njila ya cili. Ivene Katerina ngueni: “Yaliange ua nji lema, ue ku nji sangala, kaha ue ku nji kundika mu vivundilo. Ue ku nji vuluisa naua vifua via cili via Yehova na ku nji kuasa ku sungamesa visinganieka viange.”

9-10. Vati vakuluntu va kuasele umo ndumbuetu ku vula citanga ca ku lisetekesa mu njila ya ku vihia na vakuavo?

⁹ Vati vakuluntu va hasa ku kuasa vaze va kala na citanga ca ku lisetekesa na vakuavo? Tu talenu muzimbu ua umo ndumbuetu ua lizina Hanuni. Ndumbuetu uaco, ku vunike ka va kele na ku mu sangala. Ivene a vuluka ngueni: “Nja puile nji muekelu, kaha nja muene ngue vakuetu vanike va nji hiana mu viose. Ngeci nja putukile ku kala na citanga ca ku lisetekesa na vakuetu, tunde vene ku vunike vuange.” Kaha cipue vene mua lilongesele vusunga, ndumbuetu Hanuni kasi vene ua kele na ku lisetekesa na vakuavo. Evi via mu lingisile ku livua ngecize ka kele na seho mu cikungulukilo. Vunoni lelo lino, ue ku pangela Yehova na ndzolela mu cipanga ca vupioneiro. Vika via mu kuasele ku alulula visinganieka vieni?

¹⁰ Ivene ngueni: “Vakuluntu mu cikungulukilo  vakevo va nji kuasele.” Va kele na ku mu leka nguavo, va mu kulahela, kaha na ku mu sangala omo lia ku pua lungano lua cili mu lutsilielo. Ndumbuetu Hanuni ngueni: “Vintsimbu vimo, vakuluntu mu cikungulukilo va kele na ku nji vundila linga nji ka kaniamese vamo vandumbuetu va tondekele vukuasi. Ku nji kundika vipanga ngeci muevi, ca nji vuisile ngecize nja kala na seho mu cikungulukilo. Nji vuluka ntsimbu imo, vakuluntu vezile mu ku nji santsela omo lia ku kaniamesa vamo vandumbuetu va vanike. Va nji tandelele 1 Tesalonika 1:2, 3. Evi via nji kuatele cikuma ku mutima! Na vukuasi vua vaze tuniungi va cilemo, lelo lino nje ku livua ngecize nja kala na seho mu lukungulukilo lua Yehova.”

11. Vati tu hasa ku kuasa vakua “mutima ua ku-tsa na cimbembesi ca ku vavala” va va tumbula ku Visamo 34:18?

¹¹ Tandenu Visamo 34:18. Yehova ua haka seho ya kama kuli vakua “mutima ua ku-tsa” na vakua “cimbembesi ca ku vavala.” Tu vose mu cikungulukilo, tu hasa ku kuasa ava vamuanetu, kati lika vakuluntu. Imo njila i tu hasa ku va kuaselamo, ya pua mu ku va muesa seho ya vusunga. Yehova ua tonda tu lipuise vuhitilo vua cilemo ceni kuli vakevo. (Visi. 19:17) Tu hasa naua ku kuasa ava vamuanetu, mu ku pua va ku likehesa na ku konkama. Ka tua pandele ku lihalesa, muomu ku lingamo ci hasa ku koka cipululu. Vunoni nkala vutongue vu tua kala navuo, tua pande ku vu pangesa mu ku likaniamesa umo na mukuavo.—1 Pet. 4:10, 11.

12. Omo lia vika vantu vaze ka va kele na lutsimo va lemene ku likata na Yesu? (Talenu cikupulo ca helu lia Vutala.)

¹² Tu hasa ku lilongesa via vingi ku tuala ha vati tu yoya na vakuetu, mu ku hilula cifua ca yoyelelemo Yesu na vantu. Yesu ikeye ua puile mukua vukama ku hiana vantu vose ha mavu. Vunoni, ua puile ua ku konkama kaha “mukua ku likehesa mu mutima.” (Mat. 11:28-30) Yesu ka lihalesele cipue ku lipamba omo lia mana eni. Cipue mu vilongesa vieni, ua pangesele mezi a asi na visimo via viasi, vize via kuatele vantu va ngoco ku mitima. (Luka 10:21) Yesu ka lifuile na vakuluntu va malombelo, muomu ka lingisile na umo uahi a livue ngecize ka kele na seho kuli Njambi. (Yoa. 6:37) Vunoni ua muesele kasingimiko ku vantu nkala.

13. Vati Yesu ua muesele ngozi na cilemo ku vandongesi veni?

¹³ Yesu ua muesele ngozi na cilemo ku vandongesi veni. Ua tantekeyele ngecize vandongesi veni va puile vantu va ku liseza-seza kaha va kele na vutongue vua ku liseza-seza. Ngeci mukemuo, ka va hele viteli vimo lika, ni ku lavelela ngecize va puisemo viuma vimo lika mu cipanga ca ku ambulula. Kaha ua santselele ku kapandi ka lihakelele nkala muntu. Ku ivuisisa ca Yesu, ca lisolola ha toma mu cisimo ca vitalentu. Mu cisimo caco, uze mpite ua hele nkala ngamba yeni vipanga ngue ku mana eni. Kaha vaze vangamba vavali va ku ononoka, va fuitanganene, vunoni ka va puisile hamo lika. Vutuhu ngoco, omo mpite ua hilukile, vose ua va sangalele na mezi amo lika, ngueni: “Mua cili, u mukuamanda ua ku viuka.”—Mat. 25:14-23.

14. Vati tu hasa ku tambuluisa cifua ca yoyelelemo Yesu na vantu?

¹⁴ Yesu ue ku tu muesa ngozi na cilemo. A tantekeya ngecize, tua liseza-seza na vuhasi vuetu vua liseza-seza. Kaha ue ku santsela ku kapandi ka tue ku lihakela. Tua pande ku tambuluisa eci cifua ce ku muenamo viuma Yesu. Muomu ka tu tondo ku lingisa na umo muanetu uahi a livue vungoco ni evue ntsoni, omo lia ku hona ku puisamo viuma vi tue ku puisamo yetu. Vunoni tu puenu na ku tonda vukovelelo vua ku sangala vamuanetu, ku kapandi kose ka ve ku lihakela mu ku pangela Yehova.

15-16. Vukuasi vuka ua uanene umo ndumbuetu mu ku lihakela vizango via hasele ku puisamo?

¹⁵ Ku kala na vizango via mu lutsilielo, ce ku tu hana vutumbe mu muono na cifua ca cili ca ku yoyelamo. Vunoni lihungu lia ku puisamo vizango vietu, lia pua ku lihakela vizango kuliya na vuhasi vuetu kati vua vakuetu. Muomu nga tu lingamo, tu hasa ku uila mu vusiua na ku lava ku mutima. (Luka 14:28) Tu hilulenu lungano lua umo ndumbuetu lizina lieni Midori.

¹⁶ Vaise ya ndumbuetu Midori ka va puile Vakaleho, kaha va kele na ku mu setekesa na vamuanaye na vakuavo ku sikola. Ndumbuetu Midori ngueni: “Ngeci nja kele na ku livua vungoco.” Vunoni mua kolele, ua putukile ku livua naua ngecize ua kala na seho. Vika via mu kuasele? Ivene ngueni: “Nja kele na ku tanda Mbimbiliya matangua ose kaha ku lingamo ca nji vuisile ngecize Yehova ua nji lema.” Cikuavo naua, ua lihakelele vizango vize via hasele ku puisamo, na ku vundila Yehova a mu kuase ku puisamo mpundu vizango viaco. Evi via lingisile ndumbuetu Midori ku viukilila na vize via hasele ku puisamo mu lutsilielo.

17. Vati tu hasa ku tualelelaho ku pua vantu va vaha mu cimbembesi ca mitima yetu, kaha vika vi hasa ku izamo?

¹⁷ Visinganieka via ku livua vungoco, ka vie ku zimangana mu litangua lia ngongo. Ngeci Yehova ua tu mamuna ngueni: “Puenu vantu va vaha mu cimbembesi ca mitima yenu.” (Efe. 4:23, 24) Linga tu vi puisemo, tua pande ku vundila, ku lilongesa Lizi lia Njambi na ku hilula. Lihakelenu kapandi ka ku linga evi na ku vundila ngolo kuli Yehova. Sipilitu santu yeni, i ka mi kuasa ku vula nkala cisinganieka ca ku lisetekesa na vakuenu. Cikuavo naua, Yehova a ka mi kuasa ku nongonona na ku litundisa vuasi nkala cisinganieka ca cipululu ni ca ku lihalesa cize ci hasa ku mi iza mu mutima.

18. Ku lembezieka cika mu hasa ku uana ku 2 Mizimbu 6:29, 30?

 ¹⁸ Tandenu 2 Mizimbu 6:29, 30. Yehova a tantekeya mitima yetu. Kaha a tantekeya naua vindzita vi tue ku lua. Ndzita ya ku viana cimbembesi ca mavu na ndzita i tue ku lua na visevuka vietu vavene. Yehova mue ku mona kapandi ka tue ku lihakela mu ku lua vindzita viaco, cilemo ceni kuli yetu ce ku livuezelela.

19. Cimueso cika ua pangesa Yehova mu ku muesa ku likata ceni netu?

¹⁹ Mu ku muesa ku likata ceni netu, Yehova ua pangesa cimueso ca cilemo na ku likata ca kala hali cisemi ua mpuevo na kakeke keni. (Isaya 49:15) Halakanenu ku likata ca kele hali ndumbuetu Rachel na muaneni ua mpuevo. Ivene ngueni: “Muanange Stephanie, ua semukile tele kanda a hie. Mu nja mu muene lua katete, ua solokele cikuma vundende na ku zeya. Vutuhu va mu fuikilile mu muhela ua tuhia tua vunengu, vunoni ndotolo ua nji tavesele ku mu nona-nonamo na ku mu vumbatela mu kantsimbu ka kandende matangua ose. Kaha nja lingilemo mu ngonde ya mutuntu. Vize vintsimbu viaco, vutuhu via puile via vindende, vunoni via tu kuasele ku likata cikuma na munange. Lelo lino, munange na puisa miaka 6, kaha ua mundende ku hiana vakuavo vakua citso ceni. Vutuhu ngoco, nja mu lema mua kama, muomu ua yandele cikuma, kaha ua tu nehela ndzolela ya kama mu muono.” Na vuno vene, ce ku tu lembezieka cikuma, ku tantekeya ngecize Yehova neni ue ku tu vuila cilemo ca cifua eci omo lia ku mu pangela na mutima uose!

20. Vika vie ku vuisa vangamba va Yehova ndzolela?

²⁰ Mu ku pua ngamba ya Yehova, mua lifuila kaha mua kala na seho ya kama mu vusoko Vueni. Yehova ka mi laniene mu ize mu vusunga muomu mua hianene vakuenu, houe. Ua mi kokele, muomu ua talele mu mutima uenu kaha ua muene ngecize citava ku mi longesa, ku mi munga, na ku mi puisa muntu ue ku muya ku mutima. (Visa. 25:9) Kalenu na vusunga ngecize Yehova ue ku ivua ndzolela ya kama mue ku mi mona mu lihakela kapandi ka ku mu pangela na ndzili yose. Lutsilielo na lukakatela luenu, vua pua vukaleho vua muesa ngecize mua pua mukua “mutima ua vusunga ua cili.” (Luka 8:15) Ngeci mukemuo, tualelelenuho ku pangela Yehova na ndzili yenu yose. Kaha mu ka kala na vusunga vua ku viukilila na viuma vi mue ku puisamo enu vavene.