TUNDE ku laza, vaIsaleli va kele na ciizilila ca ku hana vimbongo via ku kuasa ku lemesa ca vusunga. Vunoni ku matangua a Yesu, masimu a livuezelele cikuma kaha a himpukile citeli kuli vaIsaleli.

Mu ku kuasa ku cipanga ku tavenakulu kaha mu nima ya ntsimbu ku tembele, vose vaIsaleli ni nguetu vaYundeya va ku kola, va pandele ku fueta mutamba ua sikulu ni nguetu (vimbongo vivali via palata). Ku sekulu ya ku livanga, vimbongo viaco, va kele na ku vi pangesa mu ku tuala ku lutue vipanga na vikombelo via ku tembele ya tungile Helonde. Vamo vaYundeya vehuile Petulu ku tuala ha vati ua kele na ku muenamo Yesu cimpande caco. Kaha Yesu ua muesele ngecize ku fueta lisimu ka ca puile citanga.—Mat. 17:24-27.

Mu nima yaco, Yesu ua tumine Petulu a ka ambate imo mbongo linga a ku fuete lisimu. (Levi. 27:30-32; Num. 18:26-28) Ku ntsimbu ize, vakua ku lemesa Njambi, va pandele naua ku fueta cimo ku likumi ni nguetu mutamba ua vu likumi ua vimbuto viavo ni mingoso yavo. Vunoni vakuluntu va malombelo, va kakateyele vantu ku fueta cimo ca ku likumi, cipue ku viuma ngeci mua mafo a kulia kaha na tumafo tueka tu va kele na ku lumba mu via kulia ngeci mua “oletelá na éndulu na kuminiu.” Yesu ka payele via ku fueta cimo ku likumi, vunoni ua payele cifua ca civembulu ci va kele na ku endeselamo vakua ku soneka na vaFaliseo cipanga caco.—Mat. 23:23.

Kaha cikuavo naua, ku ntsimbu ize vaYundeya va kele na ku va sika kuli vakua Loma. Ngeci va va kakateyele ku fueta masimu a engi, kua kele lisimu li va pandele ku fueta vaze va kele na mehia kaha va fuetele cipue vimbongo ni vikuata. Vamo ve ku handeka nguavo, citava va kakateyele vantu ku fueta mutamba ua mu ciuana ni ua mu citanu ua vimbuto vi va kele na ku tia. Kaha kua kele naua lisimu lia pandele ku fueta nkala kaYundeya. Eli lisimu liaco, likelio lize li vehuile vaFaliseo kuli Yesu. Ngeci Yesu ua va muesele cifua ca kele na ku muenamo via masimu ngueni: “Mu hienu Sezale viuma via Sezale; na Njambi viuma via Njambi.”—Mat. 22:15-22.

Kua kele naua lisimu lia pandele ku fueta muntu nga a tundisa vikuata ku mbonge imo ku tuala ku ikuavo. Kua kele naua lisimu lia ku fueta ku vikuma, viavu, mankano, na ku vukovelelo vua vimbonge ni vitanda.

Mua vusunga, masimu a va kele na ku fuetesa vakua nguvulu ya Loma, a puile citeli ca kama ku vantu. Tasitu, mukua mizimbu ua ku Loma, ua handekele ngueni: “Mu ku sika ca muangana Timbeliu, omo Yesu ua kele ha mavu, vakua Silia na vaYundeya va vundilile ku va tepululako amo masimu, muomu a va loluele cikuma.”

Cifua ci va kele na ku tambuilamo masimu aco, ca vuezele naua ku vulemu. Cipanga caco va kele na ku ci hana ku muntu uze na fuete vimbongo via vingi mu ku ci linga. Kaha vaze va kele na ku kovela ha vipanga viaco, navo va kele na ku fuetela vantu linga vaye na ku hita mu membo mu ku tambula masimu aco. Kaha vose ava vakua ku tambula masimu aco, va kele na ku linga vuezelela u ka vuezelele linga navo va ka uanemo lukulu ni kandzumba-ndando. Ci soloka ngue Sangeo neni ua kele na vantu va kele na ku mu tambuila lisimu. (Luka 19:1, 2) Cili vene, vantu va kele na vusunga vua ku kala na nkulundundu kaha na ku zinda vaze va kele na ku iza mu ku tambula masimu aco.