1. Vusunga vuka vua ku lifuila vue ku tu vuisa ndzolela?

TUE KU VIUKILILA cikuma mu ku ivua ngecize vangamba va Njambi va li na ku tua ceke cavo mu mavu ose! Muaka uali, vangamba va Yehova vendesele vilongesa via Mbimbiliya vi tuvakana 10.000,000. Kaha makulukazi a vantu ve ku muesa cizango ca ku lilongesa Mbimbiliya vezile ku Mulalelo na ku lilongesa via vuana vua cikombelo vua tu hana Yehova.​—1 Yoano 4:9.

2, 3. (a) Vika ka vie ku tu vindika ku tua ceke? (b) Vika tu lilongesa mu cilongesa cino?

² Mu mavu ose, Vakaleho va Yehova ve ku handeka malimi a ku liseza-seza. Vunoni eci ka ce ku tu vindika ku sangaziala Yehova ngue vusoko vumo. (Ku-Solola 7:9) Cipue nga tue ku handeka malimi eka ni tua kala ku vihela via ku liseza, kasi tue ku tua “ngue vieke via hano ha mavu.”​—Filipu 2:15.

³ Ku ambulula cetu, ku likata cetu na cifua ci tue ku pangelamo, viose vie ku hana vumpahu kuli Yehova. Vati tu hasa ku tua  ceke mu vinjila evi vitatu?​—Tandenu Mateo 5:14-16.

4, 5. (a) Mu ku vueza ku ku ambulula cetu, mu njila ika naua tu hasa ku tua ceke? (b) Viuma vika via cili vie ku iza mu ku muesa ngozi? (Talenu cikupulo ca ku vuputukilo.)

⁴ Ku ambulula na ku puisa vantu vandongesi via pua vinjila via seho via ku tuilamo ceke. (Mateo 28:19, 20) Mu 1925, cimpande ca mutue “Ceke mu Milima” ca muesele ngecize ku matangua a ku kotokela, na umo uahi a ka muesa ngecize ue ku ononoka Muangana nga “ke ku tua ceke ceni.” Kaha nguaco: “Na pande ku lingamo mu ku ambulula muzimbu ua cili ku vantu ha mavu, na ku tombuesa muono ueni ku vinjila via ceke.” (Vutala vua Kaniungi, vua 1 ya Junho ya 1925, mu Inglês) Mu ku vueza ku cipanga cetu, vilinga vietu navio vie ku sangaziala Yehova. Vantu va vengi ve ku tu tala nga tuli mu ku ambulula. Kaha nga tu zola navo na ku va meneka nga tu hita, ce ku va kuasa ku tu mona ngecize tu vantu va cili na ku zumbangeya Njambi u tue ku lemesa.

⁵ Yesu ua lekele vandongesi veni ngueni: “Kaha omo mu kovela mu ndzivo, i sambelelienu.” (Mateo 10:12) Mu cifuti ca ambuluilile Yesu, vantu va kele na ku lania vangendzi va kovele mu ndzivo. Vunoni lelo lino va vengi ka ve ku lingamo naua. Cingi cavo ve ku lisosomua ni ku niengua nga va mona muntu ka va tantekeya eza ku ndzivo yavo. Ngeci mukemuo, nga tu handeka navo mu cindambo na ndzolela, va ka putuka ku zituka. Mu mue ku ambuluila ku mbunga na tumakalu ni vimesa via mikanda, mua monaho laza ngecize nga mu handeka na vantu mu cindambo na ku zola navo, ve ku zituka na ku iza mu ku nona mukanda ni? Vamo halumo ve ku tonda vene na ku simutuila netu!

6. Vika vie ku kuasa vamo va yala na mpuevo tusinakazi ku kala na ntuima mu ku ambulula?

⁶ Vamo va yala na mpuevo va pua tusinakazi ku Inglaterra, ka ve ku hasa naua ku ambulula ku ndzivo na ndzivo muomu cihindu cavo ca kokoloka. Ngeci ve ku haka mesa ya mikanda ha lutue lua ndzivo yavo. Mu ku linga va tunga ku hiehi na sikola, ve ku hakaho mikanda ize i hasa ku ya ku mitima ya visemi ve ku izila vana vavo ku sikola. Vamo visemi ve ku nonaho imo, ngeci mua Os Jovens Perguntam​—Respostas Prácticas, Volume 1 na 2. Umo ndokazi ua pua pioneira neni ue ku lipandakana navo. Visemi ve ku izako, ve ku mona ngecize ndokazi uaco ua kala na ndzolela kaha tusinakazi co va kala mpundu na cizango ca ku kuasa vantu. Umo ua visemi na putuka ku lilongesa Mbimbiliya.

7. Vati mu hasa ku kuasa vakua ku tina va kala muimbo lienu?

⁷ Matangua ano vavengi ve ku tina ku membo na ku pua vakua ku tina mu vifuti vieka. Vika mu hasa ku linga mu kuase vakua ku tina va kala ku cihela cenu va lilongese via Yehova? Ha katete, mu hasa ku lilongesa vati ve ku meneka mu lilimi liavo. Cikuavo naua mu hasa ku pangesa aplikativu JW Language, mu lilongese amo mezi mu lilimi  liavo a hasa ku va lingisa ku imana mu ku simutuila nenu. Kaha mu hasa ku va lekesa vivideo na mikanda ya tuhuka mu lilimi liavo via mu saiti jw.org.​—Ndeutelonomi 10:19.

8, 9. (a) Vati viuano vietu via mu kati ka simano vie ku tu kuasa? (b) Vati visemi va pande ku kuasa vana vavo ku hana vikumbululo mu viuano?

⁸ Yehova ue ku tu hana viose vi tua tondeka linga tu hase ku kala na vutongue mu ku ambulula. Ca ku muenako, vi tue ku lilongesa mu Ciuano ca Muono Uetu na Vipanga Vietu ce ku tu kuasa ku simpa nga tu linga mangendzi a ku hilukila na ku endesa vilongesa via Mbimbiliya.

⁹ Omo vangendzi ve ku iza ku viuano vietu, ve ku komoka vikumbululo vi ve ku hana vanike. Ngeci mukemuo, puenu na ku longesa vana venu va pue na ku kumbulula mu mezi avo vavene. Vamo vamuanetu via va neha mu vusunga, via puile ku ivua vanike va kumbulula ha viuano mu ku muesa lutsilielo luavo.​—1 Kolintu 14:25.

10. Vati ku lemesa mu vusoko ce ku kuasa masoko ku likuata kumo?

¹⁰ Mu tue ku lihakela kapandi ka ku longesa vusoko vuetu vu pangele hamo lika mu ciyulo, tue ku hana vumpahu kuli Yehova. Ca ku muenako, nga mua pua cisemi, lihakelenu kapandi ka ku pua na ku Lemesa mu Vusoko ku sua kumo. Vamo vavusoko ve ku tala JW Broadcasting hamo lika, kaha mu nima yaco va simutuila vika va na lilongesamo. Vulukenu nguenu ku tuamenena ca tondeka ku kanike ca litepa na ku tuamenena  ca tondeka ku kankavala. Lingenu viose vi mu hasa mu ku kuasa nkala muntu ha ndzivo yenu a uane vukuasi mu ku lemesa ca mu vusoko.​—Visamo 148:12, 13.

11-13. Vika tu hasa ku linga mangana cikungulukilo cetu ci likuate kumo?

¹¹ Ambe nga u kanike nove u hasa ku kuasa vantu vose va livue ngecize va kala na seho mu cikungulukilo. Njila imo ya pua mu ku likuata vusamba na vamuanetu va ku kola. Va hule vika vie ku va kuasa ku pangela Yehova mu miaka ya ingi. Nga u lingamo, va ka ku longesa viuma via seho ya kama. Evi vi ka va kaniamesa na ku ku kaniamesa nove naua! Kaha tu vose ci pue tu vanike ni tu vakuluntu, tu hasa ku lingisa vose ve ku iza mu ku likungulula netu ku livua ngecize tu na va tambula na mavoko avali. U hasa ku va meneka lika, ku va lekesa cihanga ca ndzolela, ku va kuasa ku uana cihela ca ku tumama na ku va lekesa ku vamuanetu. Ku va kuasa va livue ngue vandambo.

¹² Nga va mi hangula ku endesa viuano via ku tuhuka mu lihia, mu hasa ku kuasa tusinakazi va tualeleleho ku tua ceke cavo. Va tondelenu cihela ca ku ambuluila ca litombola navo. Puenu na ku va hanguila vamo vamuanetu va vakuendze na vahumbe va pange navo. Vamuanetu vakua cihindu ca cindende na tusinakazi, vintsimbu via vingi ve ku ivua vusiua omo lia ku hona ku ambulula cikuma ngue mu va lingile laza. Vunoni va kevua vuino nga va mona ngecize mua va haka seho kaha mue ku ivuisisa evi visoti viavo. Ambe nga va na kulupa cikuma ni vali mu vusunga miaka ya ingi, ku va muesa ngozi ci hasa ku va kaniamesa va tualeleleho ku ambulula.​—Levitiku 19:32.

¹³ VaIsaleli va lemene ku lemesa Yehova hamo lika. Mukua Visamo ua sonekele ngueni: “Tenu, mu ca [viuka] na mu ca tovala Omo vana va naye va kala hamo na cizango cimo!” (Tandenu Visamo 133:1, 2.) Ua setekesele ovu vukovelelo vuaco na mazi a ku vuavesa nao, aze eku votsikisa cikanda kaha a kala na vueko vua cili. Netu tu hasa ku vueza ku ndzolela ya vamuanetu mu ku va muesa vuviuke na ngozi. Evi vie ku lingisa cikungulukilo ku likuata kumo. Mue ku lihakela kapandi ka ku tantekeya vuino vamuanetu mu cikungulukilo cenu ni?​—2 Kolintu 6:11-13.

14. Vati mu hasa ku tua ceke muimbo lienu?

¹⁴ Ceke cenu ci hasa ku tua, kuose-okuo ku muli. Ngozi yeni i hasa ku lingisa vantu va mua lihata navo ku tonda ku lilongesa via Yehova. Lihulenu nguenu: ‘Vati ve ku nji mona vakuetu va nja lihata navo? Vuno ha ndzivo yange ha pua ha ku lela ni? Vuno ha ndzivo yange he ku lingisa muimbo liose mu solokeko nahoko ni? Vuno nje ku kuasa vantu va nja lihata navo ni?’ Hulenu vakuenu Vakaleho va mi leke vati ngozi na lungano luavo lua cili lua kuata ku vavusoko vuavo, vakuavo va va lihata navo, vakuavo ku vipanga na ku sikola.​—Efeso 5:9.

15. Omo lia vika tua pande ku tualelelaho ku vingila?

¹⁵ Nga tu tonda ku tualelelaho ku tua ceke  cetu, tua pande ku tantekeya vuino ino ntsimbu i tuli na ku yoyela. Vintsimbu via vingi Yesu ua lekele vandongesi veni ngueni: “Ngoco vene vingilenu.” (Mateo 24:42; 25:13; 26:41) Nga tue ku singanieka nguetu “lamba ya kama” ili ku laako, ka tu ka zangama mu ku pangesa nkala vukovelelo vu tu solokela tu kuase vantu va lilongese via Yehova. (Mateo 24:21) Kaha ka tu ka tua to ceke, vunoni cika tepuluka na ku zima.

16, 17. Vika mu hasa ku linga mangana ntuima yenu kati i tontole.

¹⁶ Ino ikeyo ntsimbu i tua pande ku vingila cikuma ku hiana na laza. Muomu visoti via hano ha mavu kasi vi tualelelaho ku pihia. Vunoni tua tantekeya ngecize ku kotoka ci keza mpundu ha ntsimbu ya ci hanguila Yehova. (Mateo 24:42-44) Vutuhu ngoco mu ntsimbu ino, tua pande ku muesa lukakatela na ku tuala mana ku muono uetu ua ku lutue. Puenu na ku tanda Mbimbiliya matangua ose kaha kati mu likele ku vundila kuli Yehova na limo litangua liahi. (1 Petulu 4:7) Lilongesenu ku lungano lua vamuanetu va vamala na va vampuevo va li na ku pangela Yehova mu miaka ya ingi. Ca ku muenako, Mu hasa ku tanda mizimbu  yavo ngeci mua cimpande: “Setenta anos ‘agarrando a aba da veste de um judeu.’” Ca tuhukile mu Vutala vua Kaniungi vua 15 ya Abril ya 2012, mafo 18-21.

¹⁷ Kalenu na via vingi via ku linga mu cipanga ca Yehova. Puenu na ku muesa ngozi ku vakuenu, na ku uana ntsimbu ya ku kala hamo na vamuanoko va vamala na va vampuevo. Kaha mu kevua ndzolela, na ku mona ngue ntsimbu ili na ku tunta. (Efeso 5:16) Vangamba va Yehova va na lingi viuma via vingi-vingi mu cihita cimo lika ca miaka. Kaha ano matangua vipanga vi na livuezelela cikuma mu lukungulukilo. Vipanga via Yehova vi na livuezelela ku hiana na muze mua ile visinganieka vietu. Mua vusunga ceke cetu ci li na ku tua cikuma!

18, 19. Vati vakuluntu va hasa ku tu kuasa ku pangela Yehova na ntuima? Hanenu cimueso.

¹⁸ Vutuhu tue ku sevuka vintsimbu via vingi, Yehova ua tonda tu tualeleleho ku mu pangela. Mu ku tu kuasa, ua tu hana “vuana kuli vantu” ni nguetu vakuluntu mu cikungulukilo. (Tandenu Efeso 4:8, 11, 12.) Ngeci mukemuo nga vakuluntu veza mu ku mi meneka ku ndzivo, pangesenu vukovelelo vuaco mu lilongese via vingi ku mana na vimamuna viavo.

¹⁹ Ca ku muenako, vamo va yala na mpuevo ku Inglaterra va kele na visoti mu vulo, va vundilile vukuasi ku vakuluntu vavali. Mpuevo ua muene ngueni yala kesi na ku tuama ku lutue mu ku pangela Yehova. Yala co ua livuile ngueni ka puile mulongisi ua cili ngeci ua litavelele ngueni vimo vintsimbu ka kele na ku kungulula vakua ndzivo yeni linga va lemese mu vusoko. Vakuluntu va kuasele vaze va yala na mpuevo va singanieke ha lungano lua Yesu. Va kaniamesele yala a tambuluise cifua ca kele na ku niungilamo Yesu vandongesi veni. Kaha va kaniamesele mpuevo a muese lukakatela kuli yalieni. Mu nima yaco, va va lekesele vimo vi va hasa ku linga mu ku lemesa mu vusoko na vana vavo vavali. (Efeso 5:21-29) Ngeci yala ua fuitanganene linga a pue mutue ua cili ua vusoko vueni. Vakuluntu va mu kaniamesele linga kati a likele vunoni a tualeleleho ku kulahela mu sipilitu ya Yehova. Cilemo na ngozi vi va muesele vaze vakuluntu via kuasele cikuma vuze vusoko!

20. Nga mu tua ceke cenu, vika vi kezamo?

²⁰ “Ua vezika uose a zuzukila Yehova, Uze enda mu zinjila zieni.” (Visamo 128:1) Mua vusunga nenu mu ka vezika nga mu tua ceke cenu. Ngeci mukemuo, puenu na ku longesa vakuenu via Njambi, lingenu cose mu ku kuasa vusoko vuenu na cikungulukilo vi likuate kumo kaha vingilenu. Omo vakuenu va ka mona lungano luenu lua cili va ka tonda ku sangaziala Tatetu ua muilu Yehova.​—Mateo 5:16.